રાખી સાવંતની વધી મુશ્કેલી! સમીર વાનખેડેએ દાખલ કર્યો માનહાનિનો કેસ
મુંબઈ: નાર્કોટિક્સ કંટ્રોલ બ્યુરો (NCB)ના ભૂતપૂર્વ અધિકારી સમીર વાનખેડેએ ‘બિગ બોસ 14’ સ્પર્ધક રાખી સાવંત અને તેના વકીલ અલી કાશિફ ખાન વિરુદ્ધ માનહાનિનો કેસ દાખલ કર્યો છે. તેણે 11 લાખ રૂપિયા વળતરની રકમ માંગી છે. આ કેસ મુંબઈમાં મલાડની દિંડોશી સિટી સિવિલ કોર્ટમાં દાખલ કરવામાં આવ્યો છે. આવો જાણીએ શું છે સમગ્ર મામલો. સમીર વાનખેડેએ પોતાની અરજીમાં ઉલ્લેખ કર્યો છે કે રાખી સાવંત અને અલી કાશિફ ખાને તેની છબી ખરાબ કરવાનો અને તેને બદનામ કરવાનો પ્રયાસ કર્યો હતો.
મળતી માહિતી અનુસાર અલી કાશિફ ખાને માનહાનિના કેસ અંગે કહ્યું, ‘કાયદાનું અર્થઘટન એ છે કે જ્યારે સાર્વજનિક હિત માટે સત્ય બોલવામાં આવે ત્યારે કોઈ બદનક્ષી થતી નથી. IPCની કલમ 499 માં બીજો અપવાદ ‘પબ્લિક કન્ડક્ટ ઓફ પબ્લિક સર્વન્ટ્સ’ છે એટલે કે જો કોઈ જાહેર સેવકના જાહેર કાર્યમાં તેના વર્તન અથવા ચારિત્ર્ય વિશે સદ્ભાવનાથી અભિપ્રાય આપવામાં આવે, તો તે બદનક્ષી નથી.
સમીર વાનખેડેને યોગ્ય જવાબ આપશે
હાલમાં આ મામલો કોર્ટમાં પેન્ડિંગ છે તેથી અલી કાશિફ ખાને કહ્યું, ‘તેનો યોગ્ય જવાબ આપવામાં આવશે. જો તે પોતાનો કેસ સાબિત કરશે તો હું તેને 11.01 લાખ રૂપિયા આપીશ. અત્યાર સુધી રાખીએ આ અંગે કોઈ પ્રતિક્રિયા આપી નથી.
રાખીએ શું કહ્યું?
એ વાત જાણીતી છે કે જ્યારે શાહરૂખ ખાનના પુત્ર આર્યન ખાનની ડ્રગ્સ કેસમાં એનસીબી દ્વારા ધરપકડ કરવામાં આવી હતી ત્યારે રાખી સાવંત તેના સમર્થનમાં હતી. તેણે ઘણા વીડિયો શેર કરીને આર્યનને નિર્દોષ જાહેર કર્યો હતો. તેણે કહ્યું હતું કે, ‘તમે લોકો સિંહ છો તો સિંહ સામે લડો. શિયાળ બનીને બાળકનો શિકાર ન કરો.
