ત્રિપુરામાં વિદ્યાર્થીઓમાં વધ્યા HIV કેસ, 47 ના મોત 828 પોઝિટીવ; કારણ છે ચોંકાવનારું
Tripura HIV: ત્રિપુરામાં એચઆઈવી રોગે વિદ્યાર્થીઓને પોતાની ઝપેટમાં લીધા છે. રાજ્યમાં વિદ્યાર્થીઓમાં HIVના કેસ વધી રહ્યા છે. AIDS કંટ્રોલ સોસાયટી (TSACS)ના એક વરિષ્ઠ અધિકારીએ જણાવ્યું કે ત્રિપુરામાં HIVના કારણે 47 વિદ્યાર્થીઓના મોત થયા છે. આ ઉપરાંત રાજ્યમાં HIVનું સંકટ વધી રહ્યું છે જેના કારણે 828 વિદ્યાર્થીઓ HIV પોઝીટીવ મળી આવ્યા છે.
અધિકારીએ કહ્યું કે અત્યાર સુધીમાં 828 વિદ્યાર્થીઓ એચઆઈવી પોઝીટીવ મળી આવ્યા છે. જેમાંથી અમે ખતરનાક ચેપને કારણે 47 લોકો ગુમાવ્યા છે. ત્રિપુરા એઇડ્સ કંટ્રોલ સોસાયટીએ 220 શાળાઓ અને 24 કોલેજો અને યુનિવર્સિટીઓના વિદ્યાર્થીઓની ઓળખ કરી છે જેઓ ડ્રગ્સનું ઇન્જેક્શન આપે છે. TSACSના એક વરિષ્ઠ અધિકારીએ જણાવ્યું કે, આટલું જ નહીં, તાજેતરમાં જાહેર કરાયેલ ડેટા દર્શાવે છે કે HIVના લગભગ પાંચથી સાત નવા કેસ દરરોજ સામે આવી રહ્યા છે.
ત્રિપુરામાં કેસ વધી રહ્યા છે
રાજ્યમાં વધી રહેલા HIV કેસ વિશે વાત કરતા TSACS સંયુક્ત નિયામકએ જણાવ્યું હતું કે, “અત્યાર સુધીમાં 220 શાળાઓ અને 24 કોલેજો અને યુનિવર્સિટીઓની ઓળખ કરવામાં આવી છે જ્યાં વિદ્યાર્થીઓ ડ્રગ્સના વ્યસની હોવાનું જણાયું છે. અમે સમગ્ર રાજ્યમાં કુલ 164 આરોગ્ય સુવિધાઓમાંથી ડેટા એકત્રિત કર્યો છે.
આ પણ વાંચો: ઈમરાનની ચેતવણી: જો ચીફ જસ્ટિસના નિર્ણયમાં સુધારો ન આવ્યો તો કરીશ ભૂખ હડતાળ
સારવાર કેવી રીતે ચાલી રહી છે?
રાજ્યમાં સક્રિય કેસોની કુલ સંખ્યા પર, TSACSના એક વરિષ્ઠ અધિકારીએ કહ્યું, “મે 2024 સુધીમાં અમે ART (એન્ટિરેટ્રોવાયરલ થેરાપી) કેન્દ્રોમાં 8,729 લોકોની નોંધણી કરી છે. HIV થી પીડિત લોકોની કુલ સંખ્યા 5,674 છે. જેમાંથી 4,570 પુરૂષો છે, જ્યારે 1,103 મહિલાઓ છે. માહિતી આપતા જોઈન્ટ ડાયરેક્ટરે કહ્યું કે આમાંથી માત્ર એક દર્દી ટ્રાન્સજેન્ડર છે.
કેસ કેમ વધી રહ્યા છે?
સંયુક્ત નિયામક ભટ્ટાચારીએ રાજ્યમાં એચઆઈવીના કેસોમાં વધારા માટે ડ્રગ્સના દુરૂપયોગને જવાબદાર ગણાવ્યો છે. તેમણે કહ્યું, “મોટા ભાગના કિસ્સાઓમાં બાળકો સારા પરિવારોમાંથી આવે છે. જ્યાં માતાપિતા બંને સરકારી નોકરીમાં હોય છે અને તેઓ બાળકોની દરેક ઇચ્છા અને દરેક માંગ પૂરી કરે છે. પરંતુ પાછળથી માતા-પિતાને ખ્યાલ આવે છે કે તેમનું બાળક ડ્રગ્સનો શિકાર થઈ ગયું છે. ત્યાં સુધીમાં ઘણું મોડું થઈ ગયું હતું અને બાળકોને ચેપ લાગી ચૂક્યો હતો.
