વરસાદે હૈદરાબાદને અપાવી પ્લેઓફ ટિકિટ, ગુજરાત વિરુદ્ધ મેચ રદ્દ

વરસાદે સનરાઈઝર્સ હૈદરાબાદને આઈપીએલ પ્લેઓફની ટિકિટ અપાવી હતી. હૈદરાબાદ અને લખનૌ વચ્ચેની મેચ વરસાદને કારણે રદ કરવામાં આવી હતી અને તેના કારણે બંને ટીમોને એક-એક પોઈન્ટ મળ્યા હતા. હૈદરાબાદના હવે 15 પોઈન્ટ છે અને તે પોઈન્ટ ટેબલમાં ત્રીજા સ્થાને પહોંચી ગઈ છે. હૈદરાબાદ પ્લેઓફમાં પહોંચનારી ત્રીજી ટીમ બની ગઈ છે. આ પહેલા કોલકાતા નાઈટ રાઈડર્સ અને રાજસ્થાન રોયલ્સે જગ્યાની પુષ્ટિ કરી છે.

ટૉસ પણ ન કરી શક્યા
હૈદરાબાદ અને ગુજરાત વચ્ચેની મેચમાં વરસાદના કારણે ટોસ થઈ શક્યો ન હતો. વરસાદ બંધ થયા બાદ અમ્પાયરોએ રાત્રે 8 વાગ્યે ટોસ શરૂ કરીને મેચ 8:15 વાગ્યે શરૂ કરવાનો નિર્ણય લીધો હતો. પરંતુ ટોસના સમય પહેલા ફરી વરસાદ થયો હતો. આ પછી સતત વરસાદના કારણે અમ્પાયરોએ મેચ રદ્દ કરવાનો નિર્ણય લીધો હતો. આ સાથે જ ગુજરાતની આ સતત બીજી મેચ છે જે વરસાદને કારણે રદ્દ થઈ છે. આ પહેલા તેની કોલકાતા સામેની મેચ પણ રદ કરવામાં આવી હતી. તે પહેલા કોલકાતા અને મુંબઈ વચ્ચેની મેચ પણ વરસાદથી પ્રભાવિત થઈ હતી. તે મેચ બે કલાક અને 15 મિનિટ મોડી શરૂ થઈ અને 16-16 ઓવરની હતી.

હૈદરાબાદ 2020 પછી પ્રથમ વખત પ્લેઓફમાં પહોંચ્યું છે
વર્ષ 2020 પછી, હૈદરાબાદે પ્લેઓફમાં જગ્યા બનાવી છે, જ્યારે ટીમે કુલ સાતમી વખત પ્લેઓફની ટિકિટ બનાવી છે. હૈદરાબાદ પ્લેઓફમાં પહોંચી જતાં દિલ્હી કેપિટલ્સ રેસમાંથી બહાર થઈ ગઈ છે. દિલ્હીના 14 મેચમાં 14 પોઈન્ટ છે અને તેની તમામ મેચ સમાપ્ત થઈ ગઈ છે. તે -0.377 રન રેટ સાથે પાંચમા સ્થાને રહી ગઈ છે.

એક સ્થાન માટે ત્રણ ટીમો રેસમાં
હવે ત્રણ ટીમો ચેન્નાઈ સુપર કિંગ્સ, રોયલ ચેલેન્જર્સ બેંગ્લોર અને લખનૌ સુપરજાયન્ટ્સ પ્લેઓફ માટે બાકીનું એક સ્થાન ભરવાની રેસમાં છે. હૈદરાબાદ પાસે હવે 13 મેચમાં 15 પોઈન્ટ છે અને ચેન્નાઈ સુપર કિંગ્સ સિવાય અન્ય કોઈ ટીમ 15 કે તેથી વધુ પોઈન્ટ બનાવી શકી નથી. આ સ્થિતિમાં સનરાઇઝર્સે પ્લેઓફ માટે ક્વોલિફાય કર્યું હતું. ચેન્નાઈના 13 મેચ બાદ 14 પોઈન્ટ છે. ટીમને 18 મેના રોજ બેંગલુરુનો સામનો કરવો પડશે. બેંગલુરુ અને લખનૌ બંનેના 12-12 પોઈન્ટ છે. જોકે લખનૌનો નેટ રન રેટ તદ્દન નેગેટિવ છે અને તેની ભરપાઈ કરવી તેમના માટે મુશ્કેલ હશે. આવી સ્થિતિમાં ચેન્નાઈ અને બેંગલુરુ વચ્ચેની મેચને વર્ચ્યુઅલ નોકઆઉટ માનવામાં આવી રહી છે.

ચેન્નાઈ-બેંગલુરુ વચ્ચે વર્ચ્યુઅલ નોકઆઉટ
ચિન્નાસ્વામી ખાતે ચેન્નાઈ અને બેંગલુરુ વચ્ચેની મેચમાં જે પણ ટીમ જીતશે તે પ્લેઓફમાં પહોંચનારી ચોથી ટીમ હશે. પ્લેઓફમાં પહોંચવા માટે બેંગલુરુને 18 કે તેથી વધુ રનથી મેચ જીતવી પડશે. અથવા પીછો કરતી વખતે મેચ 10 અથવા વધુ રન બાકી રહીને સમાપ્ત કરવી પડશે. એટલે કે બેંગલુરુએ 18.1 ઓવરમાં અથવા તે પહેલાં લક્ષ્ય હાંસલ કરવું પડશે. આ આંકડા એ પરિસ્થિતિ માટે છે જ્યારે પ્રથમ બેટિંગ કરતી ટીમ 200 રન બનાવી લે છે.

બીજા સ્થાન માટે રાજસ્થાન-હૈદરાબાદ વચ્ચે જંગ
એટલું જ નહીં રવિવારે વધુ બે શાનદાર મેચો રમાશે. રાજસ્થાન ગુવાહાટીમાં કોલકાતા સામે ટકરાશે અને હૈદરાબાદમાં સનરાઇઝર્સ પંજાબ કિંગ્સ સામે ટકરાશે. જો રાજસ્થાનની ટીમ કોલકાતાને હરાવવામાં સફળ રહેશે તો ટીમ લીગ રાઉન્ડમાં બીજા સ્થાને રહી જશે. આ સ્થિતિમાં હૈદરાબાદ-પંજાબ મેચનું કોઈ મહત્વ રહેશે નહીં. આવી સ્થિતિમાં પ્રથમ ક્વોલિફાયર કોલકાતા અને રાજસ્થાન વચ્ચે થશે.

ચેન્નાઈ પાસે બીજા સ્થાને પહોંચવાની પણ તક છે
તે જ સમયે, જો સનરાઇઝર્સની ટીમ પંજાબને અને કોલકાતાની ટીમ રાજસ્થાનને હરાવે છે, તો હૈદરાબાદની ટીમ લીગ રાઉન્ડમાં બીજા સ્થાને રહી જશે. ત્યારબાદ પ્રથમ ક્વોલિફાયર કોલકાતા અને હૈદરાબાદ વચ્ચે રમાશે. ચેન્નાઈની ટીમ પણ બીજું સ્થાન હાંસલ કરી શકે છે. પરંતુ આ માટે પહેલા CSKએ RCBને હરાવવું જોઈએ અને ત્યારબાદ રાજસ્થાન અને હૈદરાબાદ બંનેને પોતપોતાની મેચ હારવી પડશે.