PM Modiએ રાષ્ટ્રપતિ Droupadi Murmuને રાજીનામું સોંપ્યુ, લોકસભા ભંગ કરવાની રજૂઆત
નવી દિલ્હીઃ વડાપ્રધાન નરેન્દ્ર મોદીની અધ્યક્ષતામાં મંગળવારે કેન્દ્રીય કેબિનેટની બેઠક યોજાઈ હતી. આ બેઠકમાં 17મી લોકસભાને ભંગ કરવાની ભલામણ કરવામાં આવી હતી. વર્તમાન 17મી લોકસભાનો કાર્યકાળ 16 જૂને પૂરો થઈ રહ્યો છે. ત્યારે બેઠક બાદ વડાપ્રધાન મોદી રાષ્ટ્રપતિ ભવન પહોંચ્યા હતા અને લોકસભાના વિસર્જનની ભલામણ કરીને રાષ્ટ્રપતિ દ્રૌપદી મુર્મુને તેમના અને અન્ય મંત્રીઓના રાજીનામા સુપરત કર્યા હતા. જેનો રાષ્ટ્રપતિ દ્રૌપદી મુર્મુએ સ્વીકાર કર્યો હતો. રાષ્ટ્રપતિએ નરેન્દ્ર મોદીને આગામી સરકારની રચના સુધી કાર્યકારી વડાપ્રધાન તરીકે જવાબદારી નિભાવવાની પણ અપીલ કરી હતી.
કેન્દ્રીય કેબિનેટની બેઠકમાં લોકસભા ચૂંટણીના પરિણામો અને ભાજપની આગેવાની હેઠળના એનડીએ દ્વારા ગૃહમાં બહુમતી મેળવ્યા બાદ સરકારની સંભવિત રચનાના મુદ્દા પર ચર્ચા કરવામાં આવી હતી. સવારે 11.30 વાગ્યે વડાપ્રધાનના નિવાસસ્થાને બેઠક શરૂ થઈ હતી. આ બેઠક બાદ મંત્રી પરિષદની બેઠક પણ યોજાઈ હતી. મીડિયા રિપોર્ટ્સ અનુસાર, 7 જૂને સંસદીય દળની બેઠક થશે અને નવી સરકારનો શપથગ્રહણ સમારોહ બીજા દિવસે એટલે કે 8 જૂને યોજાય તેવી શક્યતા છે.
લોકસભાની 543 બેઠકોમાંથી ભાજપે 240 અને કોંગ્રેસે 99 બેઠકો પર જીત મેળવી છે. ભાજપની આગેવાની હેઠળના એનડીએ ગઠબંધનને 292 અને કોંગ્રેસના નેતૃત્વમાં વિપક્ષી ગઠબંધનને 234 બેઠકો મળી છે. પરિણામોથી સ્પષ્ટ છે કે, દેશમાં આગામી સરકાર ગઠબંધનની જ હશે. સરકારની રચનાને લઈને બુધવારે NDAની બેઠક યોજાશે. વિપક્ષી ભારત ગઠબંધન પણ આજે બેઠક કરશે. વડાપ્રધાન મોદી ત્રીજી વખત દેશના વડાપ્રધાન બનવા જઈ રહ્યા છે, પરંતુ આ વખતે ભાજપને સરકાર ચલાવવા માટે સાથી પક્ષોના સમર્થનની જરૂર છે. ખાસ કરીને જેડીયુ અને ટીડીપીનું સમર્થન જરૂરી રહેશે. વિપક્ષી ગઠબંધન જેડીયુ અને ટીડીપીને પણ પોતાના દળમાં ખેંચવાનો પ્રયાસ કરી શકે છે. જો કે, બંને પક્ષોએ સ્પષ્ટ કર્યું છે કે તેઓ એનડીએને સમર્થન આપશે, તેમ છતાં વિપક્ષી ગઠબંધન તેના પ્રયાસોમાં વ્યસ્ત છે.
