તમારા દરરોજના રૂટિનમાં કરો બદલાવ, મળશે ગ્લોઈંગ સ્કિન

No Makeup look: સુંદર દેખાવા માટે છોકરીઓ લાખો રૂપિયા ખર્ચ કરી નાખે છે. આ ઉપરાંત ચહેરા પર અનેક DIY હેક્સનો ઉપયોગ કરે છે, પરંતુ જો તમે કોઈ પણ મેકઅપ વગર સુંદર દેખાવા માંગો છો તો ચહેરાને અંદરથી હેલ્ધી બનાવવા પર કામ કરો. આ માટે તમારે તમારા રોજિંદા રૂટીનની આદતોમાં કેટલાક બદલાવ કરવા ખુબ જ જરૂરી છે. જે બાદ ધીરે ધીરે સ્કિન પ્રોબ્લેમ્સ દુર થઈ જશે. આ સાથે તમારા મોંઘા પ્રોડક્ટ ખરીદવાના પૈસા પણ બચી જશે.

સૂવાનો અને જાગવાનો યોગ્ય સમય રાખો
જો તમે સ્વસ્થ અને ફિટ રહેવાની સાથે ગ્લોઈંગ સ્કિન ઈચ્છતા હોવ તો રાત્રે 9 થી 10ની વચ્ચે સૂઈ જાઓ અને સવારે વહેલા ઉઠવાની ટેવ પાડો. આથી તમે દિવસભર ફ્રેશ રહેશો અને તણાવ પણ નહીં રહે. તમે સવારના નાસ્તાથી લઈને રાત્રિના ભોજન સુધી યોગ્ય દિનચર્યા ફોલો કરી શકશો અને તમારી ત્વચા પણ સ્વસ્થ બનશે.

ગ્રીન ટી પીવો
સવારે ઉઠ્યા પછી દિનચર્યામાં ચા કે કોફી પીવાની ટેવ તમારા સ્વાસ્થ્ય માટે હાનિકારક છે. તેના બદલે ગ્રીન ટીની આદત કેળવો. ગ્રીન ટીમાં હાજર એન્ટીઓક્સીડેન્ટ્સ ડિટોક્સનું કામ કરે છે. એ તમને વજન ઘટાડવામાં અને ત્વચાને સ્વસ્થ રાખવામાં પણ મદદ કરશે.

ખુબ જ પાણી પીવો
જ્યારે તમે અંદરથી હાઇડ્રેટેડ રહેશો ત્યારે જ તમને ચમકદાર ત્વચા મળશે. આથી પુષ્કળ પાણી પીઓ. તેનાથી તમારા ચહેરા પર ચમક તો આવશે જ. આ સાથે સાથે તમે ફિટ અને હેલ્ધી પણ રહેશો. હાઇડ્રેટેડ રહેવા માટે પાણી સિવાય તમારા રૂટિનમાં નારિયેળ પાણીનો સમાવેશ કરો.

સંતુલિત ખોરાક ખાવાની ટેવ પાડો
વધુ પડતું તળેલું અને પ્રોસેસ્ડ જંક ફૂડ તમારી ત્વચાને નુકસાન પહોંચાડે છે. ઘણી વખત અસ્વસ્થ ખોરાક પણ ચહેરા પર ખીલ અને પિગમેન્ટેશન પાછળનું કારણ હોય છે. તમારી દિનચર્યામાં લીલા અને મોસમ આધારીત શાકભાજી, ફળો, બદામ, સૂકા ફળો જેવી વસ્તુઓનો સમાવેશ કરો અને સંતુલિત આહાર લો.

દરરોજ 30 મિનિટ ધ્યાન અને યોગ કરો
તણાવ માત્ર તમારા સ્વાસ્થ્ય પર જ ખરાબ અસર નથી કરતું. તેનાથી ચહેરા પર અકાળે ફાઈન લાઈન્સ અને કરચલીઓ પણ પડી જાય છે. દરરોજ ધ્યાન કરો. જેનાથી તણાવમાંથી રાહત મળશે અને દરરોજ કેટલાક યોગાસનો કરવાથી તમે બાહ્ય અને આંતરિક રીતે સ્વસ્થ રહેશો.

રોજ ચહેરા પર ગુલાબજળ લગાવો
ગુલાબ જળ એ શ્રેષ્ઠ કુદરતી ઘટક છે. જેનો ઉપયોગ ત્વચાને ટોન કરવા માટે કરી શકાય છે. દરરોજ તેનો ઉપયોગ કરવાથી તમે ન માત્ર ત્વચાની ઘણી સમસ્યાઓથી સુરક્ષિત રહેશો. આ ઉપરાંત તમારી ત્વચાનો સ્વર પણ ધીમે ધીમે સુધરવા લાગશે.