ખાલિસ્તાની આતંકી પન્નુની હત્યાનું ષડયંત્ર: અમેરિકા લાવવામાં આવ્યો હતો આરોપી નિખિલ ગુપ્તા

નવી દિલ્હી: અમેરિકાની ધરતી પર ખાલિસ્તાની આતંકવાદી અને અમેરિકન નાગરિક ગુરપતવંત સિંહ પન્નુની હત્યાના કાવતરામાં આરોપી ભારતીય નાગરિક નિખિલ ગુપ્તાને ચેક રિપબ્લિકથી અમેરિકા પ્રત્યાર્પણ કરવામાં આવ્યો છે. મીડિયા રિપોર્ટ્સ અનુસાર આ માહિતી ફેડરલ બ્યુરો ઓફ જેલની વેબસાઇટ અને આ મામલાની જાણકારી ધરાવતા એક સ્ત્રોત દ્વારા આપવામાં આવી છે.

બ્યુરો ઓફ જેલની વેબસાઈટ પર કેદીના નામની શોધમાં જાણવા મળ્યું કે 52 વર્ષીય નિખિલ ગુપ્તાને બ્રુકલિનના મેટ્રોપોલિટન ડિટેન્શન સેન્ટરમાં રાખવામાં આવ્યો છે. જે એક ફેડરલ એડમિનિસ્ટ્રેટિવ ડિટેન્શન સેન્ટર છે. એક સૂત્રએ પણ ગુપ્તાના પ્રત્યાર્પણ અને બ્રુકલિનમાં તેની અટકાયતની પુષ્ટિ કરી છે. કહેવામાં આવી રહ્યું છે કે નિખિલ ગુપ્તાને આજે ન્યૂયોર્કની ફેડરલ કોર્ટમાં રજૂ કરવામાં આવી શકે છે.

અમેરિકાએ ટિપ્પણી કરવાનો ઇનકાર કર્યો હતો
ગયા મહિને ચેક કોર્ટે નિખિલ ગુપ્તાને યુએસ મોકલવાથી બચવાની અરજીને ફગાવી દીધી હતી. જેનાથી ચેક જસ્ટિસ મિનિસ્ટરને તેના પ્રત્યાર્પણનો માર્ગ મોકળો થયો હતો. ત્યારબાદ એવું કહેવામાં આવી રહ્યું હતું કે ગુપ્તાને કોઈપણ દિવસે યુએસ પ્રત્યાર્પણ કરવામાં આવી શકે છે. ગુપ્તા ગયા વર્ષે જૂનમાં ભારતમાંથી પ્રાગ (ચેક રિપબ્લિક) ગયા હતા અને ચેક સત્તાવાળાઓએ તેની ધરપકડ કરી હતી. જોકે, યુએસ જસ્ટિસ ડિપાર્ટમેન્ટના પ્રવક્તાએ પ્રત્યાર્પણ અંગે ટિપ્પણી કરવાનો ઇનકાર કર્યો હતો. આ સિવાય ગુપ્તાના યુએસ સ્થિત વકીલ એટર્ની જેફરી ચેબ્રોવેએ તાત્કાલિક કોઈ ટિપ્પણી કરી ન હતી. ચેક સત્તાવાળાઓએ પણ કોઈ નિવેદન જારી કર્યું નથી.

આ પણ વાંચો: રાજ્યના 25 તાલુકામાં વરસાદ, સૌથી વધુ ખંભાળિયામાં 9 ઇંચથી વધુ

ખાલિસ્તાની આતંકવાદીઓની હત્યાના કારણે સંબંધોમાં ખટાશ આવી ગઈ હતી
હકીકતમાં અમેરિકા અને કેનેડામાં ખાલિસ્તાની આતંકવાદીઓને મારવાના કાવતરાને કારણે ભારત સાથેના સંબંધો પ્રભાવિત થયા છે. ભારત સરકાર સતત આ ષડયંત્રમાં સામેલ હોવાનો ઇનકાર કરતી રહી છે. કેનેડાએ ગયા વર્ષે સપ્ટેમ્બરમાં કહ્યું હતું કે તેની ગુપ્તચર એજન્સીઓ જૂન 2023માં કેનેડામાં ખાલિસ્તાની આતંકવાદી હરદીપ સિંહ નિજ્જરની હત્યામાં ભારત સરકારના નામ હોવાના આરોપોની તપાસ કરી રહી છે.

નિખિલ ગુપ્તાના પ્રત્યાર્પણ પર પન્નુએ શું કહ્યું?
ખાલિસ્તાની આતંકવાદી પન્નુ અમેરિકા અને કેનેડા બંનેની નાગરિકતા ધરાવે છે. તેમનું કહેવું છે કે નિખિલ ગુપ્તાનું પ્રત્યાર્પણ સકારાત્મક ઘટનાક્રમ છે. તેમણે આરોપ લગાવ્યો છે કે ગુપ્તાને નોકરી પર રાખવા માટે જવાબદાર લોકો ભારત સરકારના ઉચ્ચ પદના સભ્યો છે જેઓ વડાપ્રધાન નરેન્દ્ર મોદીની સૂચનાઓ પર કામ કરે છે. ભારત સરકારે પન્નુ સામેના ષડયંત્રથી પોતાને દૂર રાખ્યા છે અને કહ્યું છે કે તે સરકારી નીતિની વિરુદ્ધ છે અને યુએસ દ્વારા ઉઠાવવામાં આવેલી સુરક્ષા ચિંતાઓની ઔપચારિક તપાસ કરવાનું વચન આપ્યું છે.