ઇસ્કોન-આંબલી રોડ પર નશામાં ધૂત કારચાલકે અકસ્માત સર્જ્યો, અનેક વાહનો અડફેટે લીધા

અમદાવાદઃ શહેરમાં ધોળા દિવસે નબીરાઓ બેફામ બન્યા હોવાની ઘટના સામે આવી છે. ઇસ્કોન-આંબલી રોડ પર નબીરાએ 4 જેટલી કારને અડફેટે લીધી છે. ઓડીના કારચાલકે નશાની હાલતમાં ગમખ્વાર અકસ્માત સર્જ્યો છે. અકસ્માત કર્યા બાદ લોકોના ટોળાએ કારચાલકનો ઉધડો લીધો હતો અને તેને મેથીપાક ચખાડ્યો હતો.

અકસ્માત બાદ પણ કારચાલકને ભાન ન હોવાનો વીડિયો સામે આવ્યો છે. આ ઉપરાંત કારચાલક અકસ્માત બાદ કારમાં સિગારેટ ફૂંકી રહ્યો હોવાનું પણ દેખાઈ રહ્યું છે. આ ઘટનાની જાણ થતાં જ પોલીસ કાફલો ઘટનાસ્થળે પહોંચ્યો હતો અને સમગ્ર મામલે કાર્યવાહી હાથ ધરી હતી.

આ ઉપરાંત ભોગ બનનારા કારચાલકે આક્ષેપ કર્યો છે કે, અકસ્માતની જાણ કર્યા બાદ પણ સ્થાનિક પોલીસ ઘટનાસ્થળે મોડી પહોંચી હતી. 40 મિનિટ બાદ પોલીસ ઘટનાસ્થળે પહોંચી હતી. પહેલાં 100 નંબર પર કોલ કરતા સિટીના બદલે ગ્રામ્ય પોલીસની હદ આવતી હોવાથી ત્યાં સંપર્ક કરવા કહેવામાં આવ્યું હતું. પોલીસ કાર્યવાહી ન કરવા એકબીજાને ખો આપી રહી હોવાનો આક્ષેપ કરવામાં આવી રહ્યો છે.