સમૃદ્ધ રાજ્ય ગુજરાતમાં 6 લાખ 10 હજાર 292 બાળકો કુપોષિત

એકતરફ સમૃદ્ધ ગુજરાતનું નામ દેશ વિદેશમાં ચર્ચાઇ રહ્યું છે તો બીજી તરફ વિધાનસભામાં આજે સરકારે રાજ્યના કુપોષિત બાળકોના આંકડા રજૂ કર્યા હતા. ગૃહમાં રજૂ થયેલા આંકડા મુજબ, ગુજરાતમાં 6 લાખ 10 હજાર 292 બાળકો કુપોષિત છે. જેમાં 1 લાખ 31 હજાર 419 બાળકો અતિકૂપોષિત હોવાનું સરકારે કહ્યું હતું. ગુજરાત વિધાનસભામાં આજે પ્રશ્નોત્તરી દરમિયાન રાજ્ય સરકારે આ આંકડા ગૃહમાં રજૂ કર્યા હતા.

સૌથી વધુ કુપોષિત બાળકો દાહોદમાં

વિધાનસભામાં આજે પ્રશ્નોત્તરી દરમિયાન રાજ્ય સરકારે કુપોષિત બાળકોના આંકડા જાહેર કર્યા હતા. મહિલા અને બાળ કલ્યાણ વિકાસ મંત્રી ભાનુબેન બાબરિયાએ ગૃહમાં લેખિત જવાબ આપ્યો હતો. રાજ્યમના 33 જિલ્લામાંથી 29 જિલ્લાના 5,28,653 બાળકો કુપોષિત હોવાનું સરકારે ગૃહમાં કબૂલ્યું હતું, જેમાંથી 1,18,104 બાળકો અતિ ઓછા વજનવાળા હોવાનું સામે આવ્યું છે. સરકારે વધુમાં જણાવ્યું હતું કે, 29 જિલ્લામાંથી 24 જિલ્લામાં કુપોષણના દરમાં સુધારો જોવા મળ્યો છે. જેમાં 9 લાખ 7 હજાર 840 બાળકો કુપોષણમાંથી બહાર આવ્યા છે, તો 4 જિલ્લા એવા પણ છે જેમાં બાળકોના કુપોષણની સંખ્યામાં વધારો જોવા મળ્યો છે. ચાર જિલ્લામાં કુપોષણના 16 હજાર 69 બાળકો વધ્યા છે. સૌથી વધુ કુપોષિત બાળકો 51 હજાર 321 દાહોદમાં નોંધાયા છે, તો નવસારીમાં સૌથી ઓછા 1 હજાર 548 કુપોષિત બાળકો નોંધાયા છે. સમૃદ્ધ જિલ્લાઓમાંનો એક અમદાવાદ જિલ્લામાં 3 હજાર 516 કુપોષિત બાળકોનો વધારો નોંધાયો છે. વિધાનસભા ગૃહમાં રજૂ થયેલા આંકડાઓમાં નવસારીના આંકડાઓમાં વિસંગતતા જોવા મળી હતી. કુલ 1548 સામે 5489 બાળકો કુપોષણમાંથી બહાર આવ્યાનું લેખિતમાં અપાતા ચર્ચાનો વિષય બન્યો હતો.

આ પણ વાંચો : Gujarat : શ્રમ, કૌશલ્ય વિકાસ અને રોજગાર વિભાગમાં આટલા કરોડ વપરાયા જ નહી !

જિલ્લા દીઠ કુપોષિત બાળકોની સંખ્યા