વિક્રાંત મેસીએ એક્ટિંગમાંથી નિવૃત્તિ લેવાની કરી જાહેરાત, અચાનક કેમ લીધો આ નિર્ણય?
Mumbai: બોલીવુડ અભિનેતા વિક્રાંત મેસીએ તેની તાજેતરની ઇન્સ્ટાગ્રામ પોસ્ટમાં અભિનયમાંથી નિવૃત્તિની જાહેરાત કરી છે. તાજેતરમાં જ અભિનેતા ફિલ્મ ‘ધ સાબરમતી રિપોર્ટ’માં જોવા મળ્યો હતો. અગાઉ ’12મી ફેલ’ અને ‘સેક્ટર 36’ જેવી ફિલ્મોમાં તેના શ્રેષ્ઠ અભિનય માટે તેની પ્રશંસા કરવામાં આવી હતી. એવી અપેક્ષા હતી કે વિક્રાંત આ સફળતાનો લાભ લેશે અને આગળ વધશે. પરંતુ અભિનેતાએ અચાનક નિવૃત્તિ લેવાનો નિર્ણય લીધો છે. 37 વર્ષની ઉંમરે તે એક્ટિંગને અલવિદા કહેવા જઈ રહ્યો છે.
વિક્રાંતે સોમવારે સવારે (2 ડિસેમ્બર) 2025 પછી અભિનયમાંથી નિવૃત્ત થવાની જાહેરાત કરીને તેના ચાહકોને આશ્ચર્યચકિત કર્યા. ઇન્સ્ટાગ્રામ પર શેર કરેલી એક નોટમાં તેણે લખ્યું, “છેલ્લા કેટલાક વર્ષો અને તે પહેલાનો સમય અદ્ભુત રહ્યો. હું તમારા બધાનો આભાર માનું છું જેમણે મને હંમેશા સાથ આપ્યો છે, પરંતુ જેમ જેમ હું આગળ વધી રહ્યો છું તેમ મને અહેસાસ થાય છે કે એક પતિ, પિતા, પુત્ર અને એક અભિનેતા તરીકે પણ હવે મારી જાતને સાકાર કરવાનો અને ઘરે પાછા જવાનો સમય આવી ગયો છે.”
View this post on Instagram
વિક્રાંતની આ જાહેરાતથી તેના ચાહકો ચોંકી ગયા છે. મોટી સંખ્યામાં લોકોએ કોમેન્ટમાં આશ્ચર્ય વ્યક્ત કર્યું. ઉલ્લેખનીય છે કે ‘ધ સાબરમતી રિપોર્ટ’ના પ્રમોશન દરમિયાન અભિનેતાએ એક ઈન્ટરવ્યુમાં ખુલાસો કર્યો હતો કે ફિલ્મમાં ચાલી રહેલા વિવાદને કારણે તેને સોશિયલ મીડિયાના અલગ-અલગ પ્લેટફોર્મ દ્વારા ધમકીઓ આપવામાં આવી રહી છે. વિક્રાંતે જણાવ્યું કે આ બધી ધમકીઓમાં તેના બાળકને નિશાન બનાવવામાં આવી રહ્યું છે. ફિલ્મી કરિયરની વાત કરીએ તો વિક્રાંતે વર્ષ 2013માં ‘લૂટેરા’થી ડેબ્યૂ કર્યું હતું. 20 વર્ષની ફિલ્મી કરિયરની આ સફરમાં અભિનેતાએ ઘણી મહાન વાર્તાઓ સુંદર રીતે દર્શકો સમક્ષ રજૂ કરી છે.
