UPSC પરીક્ષાના નિયમો બદલાયા, હવે ડોક્યુમેન્ટ અગાઉથી સબમિટ કરવાના રહેશે
UPSC CSE 2025: કેન્દ્ર સરકારે સિવિલ સર્વિસીસ પ્રિલિમિનરી પરીક્ષા 2025 માટે અરજી પ્રક્રિયામાં ફેરફારો કર્યા છે. હવે ઉમેદવારોએ અરજી કરતી વખતે તેમની ઉંમર અને અનામત સંબંધિત દાવાઓના ડોક્યુમેન્ટ સબમિટ કરવા ફરજિયાત રહેશે. અગાઉ આ ડોક્યુમેન્ટ પ્રિલિમિનરી પરીક્ષા પાસ કર્યા પછી જ સબમિટ કરવાના હતા.
નિયમોમાં ફેરફારનું કારણ
પૂર્વ IAS પ્રોબેશનર પૂજા ખેડકરના કેસ બાદ આ નિર્ણય લેવામાં આવ્યો છે. તેમના પર OBC અને ડિસેબિલિટી ક્વોટાનો ખોટી રીતે લાભ લઈને સિવિલ સર્વિસિસમાં પસંદગી મેળવવાનો આરોપ છે. જોકે, તેણે આ આરોપોને નકારી કાઢ્યા છે.
પરીક્ષા પ્રક્રિયા
UPSC દર વર્ષે ત્રણ તબક્કામાં સિવિલ સર્વિસ પરીક્ષાનું આયોજન કરે છે.
- પ્રિલિમિનરી પરીક્ષા
- મેઈન્સ પરીક્ષા
- ઈન્ટરવ્યુ
આ પરીક્ષા ભારતીય વહીવટી સેવા (IAS), ભારતીય વિદેશ સેવા (IFS) અને ભારતીય પોલીસ સેવા (IPS) માટે અધિકારીઓની પસંદગી માટે લેવામાં આવે છે.
આ ડોક્યુમેન્ટ સબમિટ કરવા ફરજિયાત રહેશે
22 જાન્યુઆરીના રોજ બહાર પાડવામાં આવેલ સિવિલ સર્વિસીસ પરીક્ષા નિયમો-2025 હેઠળ, ઉમેદવારોએ અરજી કરતી વખતે નીચેની માહિતી અને દસ્તાવેજો સબમિટ કરવાના રહેશે:
- જન્મ તારીખનો પુરાવો
- જાતીનો દાખલો (SC, ST, OBC, EWS, PWBD, અથવા ભૂતપૂર્વ સૈનિક)
- શૈક્ષણિક લાયકાત
જે ઉમેદવારો સમયસર આ દસ્તાવેજો સબમિટ કરવામાં નિષ્ફળ જશે તેઓની ઉમેદવારી રદ કરવામાં આવશે.
પરીક્ષા તારીખ અને ખાલી જગ્યાઓ
UPSCએ જાહેર કર્યું છે કે સિવિલ સર્વિસીસ પ્રિલિમિનરી પરીક્ષા 2025, 25 મેના રોજ લેવામાં આવશે. આ વખતે કુલ 979 ખાલી જગ્યાઓ ભરવામાં આવશે. જેમાં 38 ખાલી જગ્યાઓ બેન્ચમાર્ક ડિસેબિલિટી કેટેગરી માટે અનામત છે. આ 38 ખાલી જગ્યાઓનું વિતરણ નીચે મુજબ હશે.
- અંધત્વ અને ઓછી દ્રષ્ટિ ધરાવતા લોકો માટે 12 જગ્યાઓ
- બહેરા અને સાંભળવામાં અક્ષમતા માટે 7 જગ્યાઓ
- લોકમોટર ડિસેબિલિટી માટે 10 જગ્યાઓ
- બહુવિધ વિકલાંગતા માટે 9 ખાલી જગ્યાઓ (સંયુક્ત વિકલાંગતા)
આરક્ષણ અને અરજી પ્રક્રિયા
સરકારે અનુસૂચિત જાતિ, અનુસૂચિત જનજાતિ, અન્ય પછાત વર્ગ, આર્થિક રીતે નબળા વિભાગ અને વિકલાંગ વર્ગના ઉમેદવારો માટે અનામતની જોગવાઈ કરી છે. અરજી પ્રક્રિયા સંપૂર્ણપણે ઓનલાઈન હશે. રસ ધરાવતા ઉમેદવારો http://upsconline.gov.inની મુલાકાત લઈ શકે છે અને 11 ફેબ્રુઆરી, 2025ના રોજ સાંજે 6 વાગ્યા સુધી અરજી કરી શકે છે.
