યુપી બોર્ડ ટૉપર પ્રાચી નિગમ થઈ હતી ટ્રોલ, હવે આપ્યો જડબાતોડ જવાબ
નવી દિલ્હી: આ વર્ષે યુપી બોર્ડની 10મા ધોરણની પરીક્ષામાં 98.5 ટકા માર્ક્સ મેળવીને ટોપ કરનાર પ્રાચી નિગમે તેના ચહેરાના વાળને લઈને ટ્રોલ કરનારાઓને જવાબ આપ્યો છે. પ્રાચી નિગમે કહ્યું, “જ્યારે મેં જોયું કે લોકો મને ટ્રોલ કરી રહ્યા છે. ત્યારે હું વધુ પરેશાન ન થઇ. મારા માટે માર્ક્સ મહત્વના છે, મારા ચહેરાના વાળ નહીં. પરંતુ પ્રાચીએ તેમનો પણ આભાર માન્યો.” તેણે કહ્યું, “જ્યારે યુપી બોર્ડની પરીક્ષામાં ટોપર તરીકેની મારી તસવીર સોશિયલ મીડિયા પર શેર કરવામાં આવી હતી. ત્યારે કેટલાક લોકોએ મને ટ્રોલ કરી હતી. તે સમયે એવા લોકો પણ હતા જેમણે મને સપોર્ટ કર્યો હતો. હું તે બધાનો આભાર માનવા માંગુ છું.”
પ્રાચીએ કહ્યું, જેમને મારા ચહેરાના વાળ વિચિત્ર લાગે છે તેઓ ટ્રોલ કરવાનું ચાલુ રાખી શકે છે. તેનાથી મને કોઈ ફરક નથી પડતો. ચાણક્યને પણ તેના લુક માટે ટ્રોલ કરવામાં આવ્યો હતો. પરંતુ તેની તેના પર કોઈ અસર થઈ નથી.”
કોંગ્રેસ નેતા પ્રિયંકા ગાંધીએ યુપીની ટોપર બનેલી સીતાપુરની પુત્રી પ્રાચી નિગમ સાથે ફોન પર વાત કરી અને અભિનંદન પાઠવ્યા. ફોન પર વાત કરતી વખતે પ્રિયંકા ગાંધીએ પ્રાચી નિગમને કહ્યું કે તમે ગભરાશો નહીં, જે તમારી ટીકા કરી રહ્યા છે તેમને ભવિષ્યમાં વધુ સારી સ્થિતિ પ્રાપ્ત કરીને તેમને યોગ્ય જવાબ આપવો પડશે.
પ્રાચી નિગમ મહમુદાબાદની સીતા બાલ વિદ્યા મંદિર ઇન્ટર કોલેજની વિદ્યાર્થીની છે. હાઇસ્કૂલમાં ટોપર પ્રાચી એન્જિનિયરિંગમાં કારકિર્દી બનાવવા માંગે છે. તેણે સફળતાનો શ્રેય તેના માતા-પિતા અને શિક્ષકોને આપ્યો છે. તેણે કહ્યું કે તે દરરોજ નિયમિત અભ્યાસ કરે છે.
