કવિ તુષાર શુક્લાને સાહિત્ય અને શિક્ષણ ક્ષેત્રે યોગદાન માટે પદ્મશ્રી પુરસ્કાર

Padma Award: ગણતંત્ર દિવસની પૂર્વ સંધ્યાએ ભારત સરકારે પદ્મ પુરસ્કારોની જાહેરાત કરી છે. જેમાં ગુજરાતના મહાનુભાવનો પણ પદ્મ શ્રી એવોર્ડમાં સમાવેશ કરાયો છે. ગુજરાતના કુલ 8 મહાનુભાવોને પદ્મ એવોર્ડ મળ્યા છે જેમાં 1 પદ્મ વિભુષણ, 1 પદ્મ ભુષણ અને 6 પદ્મશ્રી એવોર્ડથી સન્માન આપવામાં આવ્યું છે. તુષાર દુર્ગેશભાઈ શુક્લને સાહિત્ય અને શિક્ષણની કામગીરીને લઈને પદ્મશ્રી એવોર્ડ આપવાની જાહેરાત કરવામાં આવી છે.

પ્રખ્યાત ગુજરાતી કવિ તુષાર શુક્લા સાહિત્ય અને ભાષાશાસ્ત્રમાં પૃષ્ઠભૂમિ ધરાવે છે. તેમણે ઓલ ઈન્ડિયા રેડિયોમાં એનાઉન્સર તરીકે પોતાની કારકિર્દીની શરૂઆત કરી હતી અને બાદમાં AIR રાજકોટના ડિરેક્ટર તરીકે નિવૃત્ત થયા હતા. નિવૃત્તિ લીધા પછી, તેમણે સાહિત્ય અને તેમની માતૃભાષા ગુજરાતીની સેવામાં પોતાને સમર્પિત કરી દીધા. તેમણે લગભગ 30 પુસ્તકો લખ્યા છે, જેમાંથી મોટાભાગના પુસ્તકોમાં તેમની કવિતાઓ અને કૌટુંબિક સમસ્યાઓના ઉકેલો ધરાવે છે. તે લગ્નજીવન અને બાળકોના ઉછેર પર પણ પ્રવચનો આપે છે.

શુક્લાની કવિતાઓ જાણીતા ગાયકો દ્વારા ગવાયેલી છે અને પ્રખ્યાત સંગીત જોડી શ્યામલ-સૌમિલે કવિતા કૃષ્ણમૂર્તિ અને રૂપકુમાર રાઠોડ જેવા ગાયકો સાથે એક ખાસ સીડી પણ બનાવી છે જેમાં તેમની કવિતાઓને પોતાનો અવાજ આપીને રજૂ કરવામાં આવી છે. તેમણે ટીવી કાર્યક્રમો અને ગુજરાતી ફિલ્મો માટે ગીતો અને ડાયલોગ્સ પણ લખ્યા છે. ગુજરાત સરકારે તેમને ત્રણ વખત ‘શ્રેષ્ઠ ગીતકાર’ પુરસ્કારથી સન્માનિત કર્યા છે, અને તેમની કવિતાઓનો ગુજરાત અને મહારાષ્ટ્રના પાઠ્યપુસ્તકોમાં સમાવેશ કરવામાં આવ્યો છે.

શુક્લા ગુજરાત યુનિવર્સિટી અને એલજે કોલેજના આરજે તાલીમ કેન્દ્રમાં પત્રકારત્વ ભણાવે છે. તેઓ ઓલ ઈન્ડિયા રેડિયોના પ્રાદેશિક તાલીમ કેન્દ્રમાં પણ તાલીમ આપે છે. વધુમાં, તેઓ બે યાર, શુભારંભ, વિટામિન સી અને લવ ની ભવાઈ જેવી ફિલ્મોમાં મહેમાન કલાકાર તરીકે દેખાયા છે. તેમણે HOF કંપનીની એક જાહેરાતમાં મોડેલ તરીકે પણ કામ કર્યું છે. તુષાર શુક્લાએ વિવિધ પ્રકારના મીડિયામાં નોંધપાત્ર યોગદાન આપ્યું છે અને તેમને અનેક સામાજિક જૂથો તરફથી માન્યતા અને સન્માન મળ્યા છે.

મૂળ વઢવાણના તુષાર શુક્લનો જન્મ 19 જૂન, 1955ના રોજ થયો છે. તેઓ વર્ષોથી અમદાવાદમાં સ્થાયી થયા હતા. તુષારભાઈના પિતા દુર્ગેશ શુક્લ પણ જાણીતા સાહિત્યકાર હતા. તુષારભાઈની કવિતાઓના મોટી સંખ્યામાં ચાહકો છે. તુષારભાઈએ અમદાવાદની સેન્ટ ઝેવિયર્સ કોલેજમાંથી એમ.એનો અભ્યાસ કર્યો છે. તુષારભાઈએ 1979માં આકાશવાણી પર લોકપ્રિય કાર્યક્રમ ‘શાણાભાઇ – શકરાભાઇ’ ના સંચાલનથી કારકિર્દીની શરૂઆત કરી હતી.

તુષાર શુક્લ કવિતાઓની સાથે સાથે અદભૂત સંચાલક પણ છે. ગુજરાતી ફિલ્મોમાં સુપરહિટ ગીતો પણ લખી ચૂક્યા છે. ફિલ્મ છેલ્લો દિવસનું ‘કહેવું ઘણું ઘણું છે’ ફેમસ ગીત તુષારભાઈની કલમમાંથી નીકળ્યું છે. મુશાયરા અને કવિ સંમેલનમાં તુષારભાઈ એવા ખીલી ઉઠે છે કે દાદ આપનારા પણ તેમની અદામાં ખોવાઈ જાય.