પુલવામામાં આતંકવાદી હુમલો, રજા પર ઘરે આવેલા આર્મી જવાનને ગોળી મારી

Terrorist Attack in Pulwama: જમ્મુ-કાશ્મીરના પુલવામા જિલ્લાના ત્રાલ ગામના સોફીગુંડ અરિપાલ વિસ્તારમાં આતંકવાદીઓએ સેનાના એક જવાનને ગોળી મારી હતી. ઘાયલ જવાનની ઓળખ મુશ્તાક અહેમદ સોફીના પુત્ર દલ્હીર મુશ્તાક તરીકે થઈ છે. તેને પગમાં ગોળી વાગી હતી. દલ્હીર મુશ્તાક રજા પર હતો અને તેના ઘરની નજીક હતો ત્યારે આતંકવાદીઓએ તેના પર હુમલો કર્યો. ગંભીર રીતે ઘાયલ સૈનિકને તાત્કાલિક નજીકની હોસ્પિટલમાં સારવાર માટે દાખલ કરવામાં આવ્યો હતો. તેમની હાલત સ્થિર હોવાનું કહેવાય છે.

આતંકવાદીઓએ સૈન્ય ચોકી પર ગ્રેનેડ ફેંક્યો હતો
આ પહેલા બુધવારે વહેલી સવારે જમ્મુ-કાશ્મીરના પુંછ જિલ્લાના સુરનકોટ વિસ્તારમાં એક સૈન્ય ચોકી પર આતંકવાદીઓએ બે ગ્રેનેડ ફેંક્યા હતા, જેમાંથી એક વિસ્ફોટ થયો હતો, જ્યારે બીજો સુરક્ષિત રહ્યો હતો. અધિકારીઓના જણાવ્યા અનુસાર આ હુમલામાં કોઈ જાનહાનિ થઈ નથી. તેમણે કહ્યું કે હુમલા બાદ સુરક્ષા દળોએ આતંકીઓને પકડવા માટે વિસ્તારમાં સઘન સર્ચ ઓપરેશન શરૂ કર્યું હતું. સુરક્ષા દળોએ જણાવ્યું કે ગ્રેનેડની સેફ્ટી પિન સૈન્ય છાવણીની બાઉન્ડ્રી વોલ પાસે મળી હતી, જ્યારે અન્ય ગ્રેનેડને નિષ્ણાતોએ ડિફ્યુઝ કરી દીધો હતો. આ હુમલા બાદ સેના અને પોલીસે વિસ્તારમાં આતંકીઓની શોધખોળ તેજ કરી દીધી છે અને તેમને પકડવાનું ઓપરેશન ચાલી રહ્યું છે.