મણિપુરમાં ફરી ભડકી હિંસા, 10 કુકી આતંકવાદીઓના ખાત્મા બાદ જીરીબામમાં લાદ્યો કર્ફ્યુ
Manipur: મણિપુરમાં હિંસા અટકવાનું નામ નથી લઈ રહી. આતંકવાદીઓ આતંક મચાવી રહ્યા છે. સોમવારે સુરક્ષા દળોએ જીરીબામ જિલ્લામાં કુકી આતંકવાદીઓ સામે મોટી સફળતા હાંસલ કરી હતી. બોરોબેકરા સબડિવિઝન જીરીબામના જાકુરાધોર કરોંગમાં સુરક્ષા દળોએ 10 આતંકવાદીઓને ઠાર કર્યા છે. આ ઓપરેશનમાં CRPFનો એક જવાન ઘાયલ થયો હતો. આતંકવાદીઓની હત્યા બાદ કુકી-જો કાઉન્સિલે 12 નવેમ્બરે બંધનું એલાન કર્યું છે. અફવાઓને કાબૂમાં લેવા અને કાયદો અને વ્યવસ્થા જાળવવા વહીવટીતંત્રે તાત્કાલિક અસરથી જીરીબામ જિલ્લામાં અનિશ્ચિત સમય માટે કર્ફ્યુ લાદી દીધો છે.
મણિપુરની ઇમ્ફાલ ખીણ વંશીય સંઘર્ષથી પ્રભાવિત છે. આ સાથે આતંકવાદીઓએ આતંક મચાવ્યો છે. ખેતરોમાં કામ કરતા ખેડૂતોને નિશાન બનાવીને સતત હુમલા કરવામાં આવી રહ્યા છે. આતંકવાદીઓના આતંકથી ખેડૂતો ડરી ગયા છે. ખેડૂતો ખેતરોમાં કામ કરવા જવાનું પણ ટાળી રહ્યા છે. સોમવારે ઇમ્ફાલમાં પહાડીઓ પરથી આતંકવાદીઓએ ગોળીબાર કર્યો હતો. જેમાં ખેતરમાં કામ કરતા એક ખેડૂતને ઈજા થઈ હતી. સતત ત્રીજા દિવસે ખેડૂતો પર આ હુમલો છે.
સુરક્ષા દળોએ જવાબી કાર્યવાહી કરી હતી
અધિકારીઓનું કહેવું છે કે હુમલાને કારણે બહારના વિસ્તારમાં રહેતા ખેડૂતો પોતાના ખેતરમાં જતા ડરે છે. જેના કારણે પાકની લણણીને અસર થઈ રહી છે. એક પોલીસ અધિકારીનું કહેવું છે કે ખેડૂત પર ગોળીબારની ઘટના સવારે લગભગ 9.20 વાગ્યે બની હતી. કાંગપોકપી જિલ્લાના પહાડી વિસ્તારોના આતંકવાદીઓએ યાઈંગપોકપી શાંતિખોંગબાન વિસ્તારમાં ખેડૂતો પર ગોળીબાર કર્યો હતો. આમાં એક ખેડૂતના હાથમાં શ્રાપેલ આવી ગયું. આ અંગેની માહિતી મળતા જ સુરક્ષાદળો ઘટનાસ્થળે પહોંચી ગયા હતા અને જવાબી કાર્યવાહી શરૂ કરી હતી.
આ પણ વાંચો: દિલ્હીમાં શ્વાસ રૂંધાતી હવા… સતત 14 દિવસ બાદ પણ AQI 400ને પાર
અધિકારીએ કહ્યું કે આતંકવાદીઓ અને સુરક્ષા દળો વચ્ચે થોડો સમય ગોળીબાર ચાલુ રહ્યો. ઈજાગ્રસ્ત ખેડૂતને યાઈંગંગપોકપી પ્રાથમિક આરોગ્ય કેન્દ્રમાં સારવાર આપવામાં આવી છે. હાલ તેની હાલત ખતરાની બહાર છે. આ પહેલા શનિવારે ચુરાચંદપુર જિલ્લામાં પહાડી વિસ્તારોમાંથી આતંકવાદીઓએ ગોળીબાર કર્યો હતો.
જેમાં વિષ્ણુપુર જિલ્લાના સેટન ખાતે ખેતરોમાં કામ કરતી 34 વર્ષીય મહિલા ખેડૂતનું મોત થયું હતું. રવિવારે ઇમ્ફાલ પૂર્વ જિલ્લાના સાંસાબી, થમનાપોકપી અને સબુંગખોક ખુનાઉમાં પણ સમાન હુમલાઓ થયા હતા. ઇમ્ફાલ ખીણમાં મેઇતેઇ અને કુકી સમુદાયો વચ્ચે ગયા વર્ષે મે મહિનાથી શરૂ થયેલા વંશીય સંઘર્ષમાં અત્યાર સુધીમાં 200 થી વધુ લોકો માર્યા ગયા છે.
