રશિયન સૈનિકો બિહારમાં બનેલા સેફ્ટી શૂઝ પહેરીને કરી રહ્યાં છે ઓપરેશન
Made in Bihar boots: રશિયન સેના છેલ્લા અઢી વર્ષથી યુક્રેનમાં પોતાની સૈન્ય કાર્યવાહી ચાલુ રાખી રહી છે. આ દરમિયાન તમને જાણીને નવાઈ લાગશે કે રશિયન સૈનિકો બિહારમાં બનેલા સેફ્ટી શૂઝ પહેરીને દુશ્મન દેશમાં અરાજકતા ફેલાવી રહ્યા છે. આ શૂઝ બિહારની રાજધાની પટનાને અડીને આવેલા હાજીપુરમાં બને છે. હાજીપુર શહેર, જે કેળાની ખેતી અને અન્ય કૃષિ પેદાશો માટે જાણીતું હતું, હવે રશિયન સેના માટે સેફ્ટી શૂઝ બનાવીને વિકાસની નવી ગાથા લખી રહ્યું છે. આ શૂઝની આંતરરાષ્ટ્રીય બજારમાં સારી માંગ છે.
#WATCH | Bihar: Competence Exports Private Limited, Hajipur is claiming its place in the international market by manufacturing safety shoes for the Russian army and also producing fashion shoes catering to European markets. pic.twitter.com/au833HaZAo
— ANI (@ANI) May 17, 2024
હાજીપુર સ્થિત કોમ્પિટન્સ એક્સપોર્ટ્સ, એક પ્રાઈવેટ લિમિટેડ કંપની, રશિયા સ્થિત કંપનીઓ માટે સેફ્ટી શૂઝ અને યુરોપિયન બજારો માટે ડિઝાઇનર શૂઝનું ઉત્પાદન કરે છે. કંપનીના જનરલ મેનેજર શિબ કુમાર રોયે એએનઆઈને જણાવ્યું, “અમે 2018માં હાજીપુરમાં કામ શરૂ કર્યું હતું. શરૂઆતમાં અમારુ ફોકસ સ્થાનિક સ્તરે રોજગારીનું સર્જન કરવાનું હતું, પણ અમે હવે સેફ્ટી શૂઝ બનાવીએ છીએ જે રશિયામાં નિકાસ કરવામાં આવે છે. હાલમાં, મોટાભાગની નિકાસ રશિયા પર કેન્દ્રિત છે પરંતુ હવે અમે ધીમે ધીમે યુરોપ પર પણ કામ કરી રહ્યા છીએ અને ટૂંક સમયમાં અમે સ્થાનિક બજારમાં પણ અમારી પ્રોડક્ટ્સ લોન્ચ કરવા જઈ રહ્યા છીએ.
Bihar’s footwear industry goes global- Exports Safety Shoes to Russia & fashion footwear to Europe.#Hajipur#Bihar#industries #development #Russian #Russia#Europe#export@BIADAbihar @biharfoundation @ANI pic.twitter.com/LuQ6UtsJHz
— Sakth Launda (@AbcJalDiKaroGi) May 25, 2024
રોયે કહ્યું કે તેમની કંપની રશિયન આર્મીની જરૂરિયાત મુજબ આવા સેફ્ટી શૂઝ બનાવે છે જે હળવા અને એન્ટી સ્લિપ હોય છે. તેમણે કહ્યું કે તેમના તળિયા ખાસ કરીને માઈનસ 40 ડિગ્રી સેલ્સિયસ જેવી આત્યંતિક હવામાન પરિસ્થિતિઓનો સામનો કરવા માટે બનાવવામાં આવ્યા છે. તેમણે કહ્યું કે તેમની કંપની રશિયાની સૌથી મોટી નિકાસકારોમાંની એક છે. એવી અપેક્ષા છે કે આ સંખ્યા દિવસે દિવસે વધતી જશે.
રાજ્યમાં રોજગાર આપવાના મુદ્દે રોયે જણાવ્યું હતું કે, “કંપનીના એમડી દાનેશ પ્રસાદની મહત્વાકાંક્ષા બિહારમાં વિશ્વ કક્ષાની ફેક્ટરી બનાવવાની અને રાજ્યના રોજગારમાં યોગદાન આપવાની છે. અમે કર્મચારીઓને વધુમાં વધુ રોજગારી આપવાનો પ્રયાસ કરી રહ્યા છીએ. હાલમાં 300 કર્મચારીઓ કામ કરી રહ્યા છે. તેમાંથી 70 ટકા મહિલાઓ છે.” રોયે જણાવ્યું હતું કે કંપનીએ ગયા વર્ષે 15 લાખ જોડી શૂઝની નિકાસ કરી હતી, જેની કિંમત રૂ. 100 કરોડ છે અને આવતા વર્ષે તેમાં 50 ટકાનો વધારો કરવાનો લક્ષ્યાંક છે.
રોયે વધુમાં જણાવ્યું હતું કે બિહાર સરકારે ઉદ્યોગોને પ્રોત્સાહન અને સમર્થન આપ્યું છે, પરંતુ હજુ પણ રસ્તાઓ અને બહેતર સંદેશાવ્યવહાર જેવા ઈન્ફ્રાસ્ટ્રક્ચરમાં સુધારો કરવાની જરૂર છે જેથી રશિયાના ખરીદદારો સરળતાથી સંપર્ક કરી શકે અને વાતચીત કરી શકે. તેમણે કહ્યું, “આપણને કુશળ કાર્યબળની પણ જરૂર છે અને આ માટે એક તાલીમ સંસ્થાની સ્થાપના કરવી જોઈએ જેથી કરીને અમને કુશળ કારીગરો મળી શકે, અન્યથા અમારે કામદારોને નોકરીએ રાખતા પહેલા તેમને તાલીમ આપવી પડશે.” તમને જણાવી દઈએ કે રશિયા સિવાય આ હાજીપુર કંપની ઈટાલી, ફ્રાન્સ, સ્પેન અને બ્રિટન જેવા યુરોપિયન બજારોમાં પણ લક્ઝરી ડિઝાઈનર અને ફેશન શૂઝની નિકાસ કરે છે.
