રાહુલ ગાંધીએ લખ્યો વિદેશ મંત્રીને પત્ર, શ્રીલંકામાં ફસાયેલા માછીમારોને મુક્ત કરવા કરી અપીલ

Rahul Gandhi Wrote to S Jaishankar: શ્રીલંકાની નૌસેના દ્વારા અવારનવાર પકડવામાં આવતા તમિલ માછીમારોની મુક્તિની માંગ કરતાં લોકસભામાં વિપક્ષના નેતા રાહુલ ગાંધીએ વિદેશ મંત્રી એસ જયશંકરને પત્ર લખ્યો છે. પત્રમાં તેમણે માછીમારોની મુક્તિ અને જપ્ત કરાયેલી બોટોની મુક્તિ માટે શ્રીલંકાના સત્તાવાળાઓ સાથે વાત કરવાનું કહ્યું છે. પત્રમાં રાહુલ ગાંધીએ લખ્યું છે કે 21 સપ્ટેમ્બર 2024ના રોજ શ્રીલંકાના અધિકારીઓએ 37 તમિલ માછીમારોની ધરપકડ કરી હતી. તેમજ તેમની બોટ પણ જપ્ત કરવામાં આવી હતી. માયલાદુથુરાઈના કોંગ્રેસ સાંસદ આર સુધાએ મને આ બાબતની જાણકારી આપી.

પત્રમાં લખવામાં આવ્યું હતું કે ધરપકડ કરાયેલા માછીમારો દરિયાકિનારાની નજીક નાના પાયા પર કામ કરે છે. ઘટનાના દિવસે તેમણે સંકટમાં ફસાયેલ શ્રીલંકાની એક બોટને બચાવવાનો પ્રયાસ કર્યો હતો. માછીમારોએ બચાવમાં સહાય કરવા માટે શ્રીલંકાના અધિકારીઓનો સંપર્ક કર્યો હતો. તેમ છતાં શ્રીલંકાના સત્તાવાળાઓએ માછીમારોની આંતરરાષ્ટ્રીય દરિયાઈ સીમા પાર કરવાના આરોપમાં ધરપકડ કરી હતી. જપ્ત કરાયેલી ફિશિંગ બોટ સામૂહિક સંસાધનો દ્વારા ખરીદવામાં આવી હતી.

પત્રમાં રાહુલ ગાંધીએ લખ્યું છે કે શ્રીલંકાના અધિકારીઓ દ્વારા નાના અને સીમાંત ભારતીય માછીમારોની ધરપકડ, સંપત્તિ જપ્ત કરવા અને ભારે દંડ લગાવવાની વારંવારની ઘટનાઓની સખત નિંદા કરવી જોઈએ. હું તમને વિનંતી કરું છું કે આ મામલો શ્રીલંકાના અધિકારીઓ સાથે ઉઠાવો અને માછીમારો અને તેમની બોટોને તાત્કાલિક મુક્ત કરવામાં આવે.