IASમાંથી પૂજા ખેડકર બરતરફ, UPSC બાદ કેન્દ્ર સરકારની મોટી કાર્યવાહી
Puja Khedkar: કેન્દ્રએ પૂજા ખેડકરને ભારતીય વહીવટી સેવા (IAS)માંથી તાત્કાલિક અસરથી બરતરફ કરી દીધી છે. નોંધનીય છે કે, એક મહિના પહેલા યુનિયન પબ્લિક સર્વિસ કમિશન (UPSC)એ પૂજા ખેડકરની પસંદગી રદ કરી દીધી હતી. પૂજા ખેડકર પર અનામતનો લાભ મેળવવા માટે UPSC સિવિલ સર્વિસ પરીક્ષા, 2022 માટે તેની અરજીમાં ‘ખોટી માહિતી આપવાનો’ આરોપ છે. આ પછી યુપીએસસીએ 31 જુલાઈના રોજ ખેડકરની ઉમેદવારી રદ કરી દીધી હતી અને તેમને ભવિષ્યની પરીક્ષાઓમાં બેસવા પર પણ રોક લગાવી દીધી હતી.
કમિશને કહ્યું કે છેલ્લા 15 વર્ષમાં ખેડકરનો આ એકમાત્ર કેસ છે જેમાં તે શોધી શક્યું નથી કે ખેડકરે ઉમેદવાર માટે નિર્ધારિત કરતાં વધુ વખત CSE પરીક્ષાનો પ્રયાસ કર્યો છે, કારણ કે “તેણે માત્ર તેમનું નામ જ નહીં, પરંતુ માતા-પિતાના નામો પણ બદલ્યા છે. યુપીએસસીએ પોલીસમાં ખેડકર વિરુદ્ધ કેસ નોંધ્યો છે કે તેણે સિવિલ સર્વિસ પરીક્ષામાં તેની નકલી ઓળખ આપીને નિર્ધારિત સંખ્યા કરતાં વધુ પ્રયાસો કરીને છેતરપિંડી કરી છે.
આ પછી, ખેડકરે સેશન્સ કોર્ટમાં કહ્યું હતું કે તેને “તરત ધરપકડનું જોખમ” છે. જોકે, દિલ્હી હાઈકોર્ટે પૂજા ખેડકરને ધરપકડથી અપાયેલી વચગાળાની સુરક્ષાને 5 સપ્ટેમ્બર સુધી લંબાવી દીધી છે. જસ્ટિસ સુબ્રમણ્યમ પ્રસાદે ખેડકરની આગોતરા જામીન અરજી પર સુનાવણી 5 સપ્ટેમ્બર સુધી મુલતવી રાખી હતી અને તે દરમિયાન પોલીસને નવો સ્ટેટસ રિપોર્ટ દાખલ કરવાની સ્વતંત્રતા આપી હતી.
