અફઘાનિસ્તાન પર કુદરતી આફત, પૂરથી મચી તબાહીમાં 300થી વધુના મોત
અફઘાનિસ્તાન: યુદ્ધમાંથી બહાર આવ્યા બાદ આર્થિક સંકટનો સામનો કરી રહેલા અફઘાનિસ્તાનને વધુ એક મુશ્કેલીનો સામનો કરવો પડ્યો છે. શુક્રવારથી દેશમાં આવેલા પૂરના કારણે સ્થિતિ વણસી રહી છે. પૂરના પાણીએ એટલો બધો વિનાશ કર્યો છે કે ગામડાઓ અને શહેરોમાં ખેતરો, રસ્તાઓ, મકાનો ધોવાઈ ગયા છે અને પાક નાશ પામ્યો છે. અફઘાનિસ્તાનના પ્રાંતો – બદખ્શાન, ઘોર, બગલાન અને હેરાત પૂરથી સૌથી વધુ પ્રભાવિત થયા છે.
એક અહેવાલ મુજબ પૂરમાં અત્યાર સુધીમાં 300 થી વધુ લોકોના જીવ ગયા છે. ઘણી આંતરરાષ્ટ્રીય રાહત એજન્સીઓ અને જૂથો અસરગ્રસ્ત વિસ્તારોમાં દવાઓ, ખોરાક, સલામતી અને ઈમરજન્સી કીટ વગેરે જેવી રાહત સામગ્રી પહોંચાડવામાં રોકાયેલા છે. અન્ય અહેવાલ મુજબ, સહાય જૂથ ‘સેવ ધ ચિલ્ડ્રન’ એ બાળકો અને તેમના પરિવારોને મદદ કરવા માટે મોબાઇલ આરોગ્ય અને બાળ સુરક્ષા ટીમો સાથે “ક્લિનિક ઓન વ્હીલ્સ” મોકલ્યું છે.
“પૂરના કારણે બાળકોએ બધું ગુમાવ્યું છે”
પૂરથી બાગલાન ક્ષેત્રના પાંચ જિલ્લાઓ ખરાબ રીતે પ્રભાવિત થયા છે. સેવ ધ ચિલ્ડ્રનનાં કન્ટ્રી ડિરેક્ટર અરશદ મલિકે ન્યૂઝ એજન્સી એપીને જણાવ્યું હતું કે “જીવન અને સંપત્તિ બંને ધોવાઈ ગયા છે. અચાનક પૂરના કારણે ગામડાઓ તબાહ થઈ ગયા. ઘરો ધોવાઈ ગયા અને પશુઓ મૃત્યુ પામ્યા. બાળકોએ બધું ગુમાવ્યું છે. તેમણે કહ્યું કે આ વિસ્તારના પરિવારો હજુ પણ ત્રણ વર્ષના દુષ્કાળની આર્થિક અસરો સાથે સંઘર્ષ કરી રહ્યા છે અને તેમને તાત્કાલિક સહાયની જરૂર છે. સેવ ધ ચિલ્ડ્રન સહાય જૂથે બાળકો અને તેમના પરિવારોને મદદ કરવા માટે મોબાઇલ હોસ્પિટલ અને ચાઇલ્ડ હેલ્પ ટીમો સાથે “ક્લીનિક ઓન વ્હીલ્સ” મોકલ્યું છે.
મદદ સુધી પહોંચવું મુશ્કેલ બન્યું
અહેવાલો અનુસાર, પૂરમાં એક હજારથી વધુ ઘરો હજારો હેક્ટર ખેતીની જમીન અને પ્રાણીઓ નાશ પામ્યા છે. ઘણા પૂરગ્રસ્ત વિસ્તારોમાં મદદ માટે ટ્રકો પહોંચવી મુશ્કેલ બની ગઈ છે. શનિવારે ઓર્ગેનાઈઝેશન ઓફ ઈસ્લામિક કોઓપરેશન (ઓઆઈસી) એ સભ્ય દેશો અને વિશ્વના અન્ય દેશોને અફઘાનિસ્તાનમાં પૂરથી અસરગ્રસ્તોને તાત્કાલિક મદદ કરવા વિનંતી કરી. આ સિવાય અફઘાનિસ્તાનના પૂર્વ રાષ્ટ્રપતિ હામિદ કરઝાઈએ પણ અચાનક પૂરથી પ્રભાવિત પીડિતો માટે માનવીય સહાયની માંગ કરી છે.
