આજે અંતિમ તબક્કાનું મતદાન, 904 ઉમેદવારનું ભવિષ્ય થશે EVMમાં કેદ

નવી દિલ્હીઃ સાતમા અને અંતિમ રાઉન્ડમાં શનિવારે (1 જૂન) આઠ રાજ્યો અને કેન્દ્રશાસિત પ્રદેશોની 57 બેઠકો પર મતદાન છે. આ રાઉન્ડમાં આઠ રાજ્યોના 10 કરોડથી વધુ મતદારો ચૂંટણી લડી રહેલા 904 ઉમેદવારોના ભાવિનો નિર્ણય કરશે. આ સાથે છેલ્લા અઢી મહિનાથી ચાલી રહેલી ચૂંટણી પ્રક્રિયા તેના અંતિમ તબક્કામાં પહોંચશે અને તમામને 4 જૂનની રાહ જોવાઈ રહી છે કે ક્યારે પરિણામ આવશે.

મતદાનનો સમય
સામાન્ય ચૂંટણી 2024ના સાતમા તબક્કા માટે 1 જૂનના રોજ મતદાન છે. આઠ રાજ્યો અને કેન્દ્રશાસિત પ્રદેશોની 57 બેઠકો માટે મતદાન થવાનું છે. મતદાનનો સમય સવારે 7થી સાંજે 6 સુધીનો છે. જો કે, ચૂંટણી પંચે એમ પણ કહ્યું છે કે, સંસદીય મતવિસ્તારના આધારે મતદાન બંધ થવાનો સમય અલગ-અલગ હોઈ શકે છે.

57 સંસદીય મતવિસ્તારોમાં 85 વર્ષથી વધુ વયના મતદારો અને વિકલાંગ મતદારો માટે સુવિધાઓ ઘરની આરામથી મતદાન કરવાનો વિકલ્પ પ્રદાન કરવામાં આવ્યો છે. મતદાન અને સુરક્ષા કર્મચારીઓના પરિવહન માટે ખાસ વ્યવસ્થા કરવામાં આવી છે. મતદાન મથકોમાં પાણી, શેડ, શૌચાલય, રેમ્પ, સ્વયંસેવકો, વ્હીલચેર અને વીજળી જેવી સુવિધાઓ છે. વૃદ્ધો અને વિકલાંગ વ્યક્તિઓ સહિત દરેક મતદાર સરળતાથી પોતાનો મત આપી શકે તે માટે આ પગલાં લેવામાં આવ્યા છે. ગરમીનો સામનો કરવા માટે પણ ખાસ ધ્યાન આપવામાં આવ્યું છે.

સૌથી વધુ ઉમેદવારો પંજાબમાં
સાતમા તબક્કામાં 904 ઉમેદવારોનું ભાવિ ઈવીએમમાં ​​કેદ થશે. 904માંથી સૌથી વધુ 328 ઉમેદવારો પંજાબના છે. જ્યાં તમામ 13 બેઠકો પર ચૂંટણી યોજાવવાની છે. બીજા સ્થાને, ઉત્તર પ્રદેશમાં કુલ 13 બેઠકો પર 144 ઉમેદવારો ચૂંટણી લડી રહ્યા છે. ત્યારે ચંદીગઢમાં ઓછામાં ઓછી એક સીટ પર 19 ઉમેદવારોએ ચૂંટણી લડી છે.

સાતમા તબક્કામાં 299 કરોડપતિ
એસોસિએશન ફોર ડેમોક્રેટિક રિફોર્મ્સે (એડીઆર) સાતમા તબક્કામાં ચૂંટણી લડતા તમામ 904 ઉમેદવારોના એફિડેવિટ પર એક રિપોર્ટ જાહેર કર્યો છે. આ રિપોર્ટ અનુસાર 904 ઉમેદવારોમાંથી 199 ઉમેદવારો કલંકિત છે. આ કેસોમાં અલગ-અલગ કેસ ચાલી રહ્યા છે. ત્યારે 299 ઉમેદવારો એવા છે જેમણે પોતાને કરોડપતિ જાહેર કર્યા છે. SADના 13 ઉમેદવારો પાસે સૌથી વધુ સરેરાશ સંપત્તિ 25.68 કરોડ રૂપિયા છે.

પાંચ સૌથી ધનિક ઉમેદવારોમાં કંગના સામેલ
સાતમા તબક્કામાં સૌથી વધુ સંપત્તિ જાહેર કરનારા હરસિમરત કૌર બાદલ છે. પંજાબના ભટિંડાથી SAD ઉમેદવાર હરસિમરતે કુલ 198 કરોડ રૂપિયાની સંપત્તિ જાહેર કરી છે. આ મામલે બીજેપીના બૈજયંત પાંડા બીજા સ્થાને છે. ઓડિશાની કેન્દ્રપારા સીટ પરથી ચૂંટણી લડી રહેલા પાંડાએ પોતાની એફિડેવિટમાં 148 કરોડ રૂપિયાની સંપત્તિ જાહેર કરી છે. ત્રીજા સૌથી અમીર ઉમેદવાર ભાજપના સંજય ટંડન છે. ચંદીગઢ બેઠક પરથી ચૂંટણી લડી રહેલા ટંડન પાસે 111 કરોડ રૂપિયાની સંપત્તિ છે.

હિમાચલ પ્રદેશની મંડી બેઠક પરથી ચૂંટણી લડી રહેલા બે અગ્રણી ઉમેદવારો પણ વધુ સંપત્તિના કેસમાં સંડોવાયેલા છે. કોંગ્રેસના ઉમેદવાર વિક્રમાદિત્ય સિંહે 100 કરોડથી વધુની સંપત્તિ જાહેર કરી છે. ફિલ્મ અભિનેત્રી અને ભાજપના ઉમેદવાર કંગના રનૌતે 91 કરોડ રૂપિયાની સંપત્તિ જાહેર કરી છે.

આ લોકસભા ચૂંટણીમાં 10% કરતાં ઓછા મહિલા ઉમેદવારો
ADR દ્વારા શેર કરવામાં આવેલા ડેટા અનુસાર, સાતમા તબક્કાની ચૂંટણીમાં 95 એટલે કે માત્ર 11 ટકા મહિલા ઉમેદવારો છે. વર્તમાન લોકસભા ચૂંટણીમાં 10 ટકાથી પણ ઓછા ઉમેદવારો મહિલાઓ છે. તમામ સાત તબક્કામાં ચૂંટણી લડી રહેલા 8,337 ઉમેદવારોમાંથી માત્ર 797 મહિલાઓ છે. આ આંકડો તમામ સાત તબક્કામાં ચૂંટણી લડી રહેલા કુલ ઉમેદવારોના માત્ર 9.5 ટકા છે.