ઝારખંડમાં ચૂંટણી પહેલા BJP વિરુદ્ધ FIR નોંધાઈ, ભ્રામક વીડિયો પોસ્ટ કરવાનો આરોપ

Jharkhand Assembly Election 2024: ઝારખંડના રાંચીમાં રાજ્ય BJP વિરુદ્ધ FIR દાખલ કરવામાં આવી છે. કોંગ્રેસની ફરિયાદ મળ્યા બાદ રાંચી પોલીસે BJP વિરુદ્ધ આ કેસ નોંધ્યો છે. ચૂંટણી પંચના સૂત્રોના જણાવ્યા અનુસાર, કોંગ્રેસે ઝારખંડ BJPના સોશિયલ મીડિયા હેન્ડલ પર ખોટા અને ભ્રામક વીડિયો પોસ્ટ કરવાનો આરોપ લગાવ્યો છે. આ જોતા રાંચી પોલીસે પાર્ટી વિરુદ્ધ કેસ નોંધ્યો છે.

સમાચાર એજન્સી ANIના સૂત્રોના જણાવ્યા અનુસાર, ચૂંટણી પંચ (EC)ને 10 નવેમ્બર 2024ના રોજ કોંગ્રેસ નેતા જયરામ રમેશની ફરિયાદ મળી હતી. આરોપ છે કે BJP4Jharkhand હેન્ડલ પરથી ફેસબુક પર કેટલાક વીડિયો પોસ્ટ કરવામાં આવ્યા છે, જે ખોટા અને ભ્રામક છે. ફરિયાદમાં કહેવામાં આવ્યું છે કે વીડિયોમાં કથિત રીતે પાયાવિહોણા આક્ષેપો કરવામાં આવ્યા છે, જેથી મતદારોને પ્રભાવિત કરી શકાય અને વિધાનસભાની ચૂંટણીમાં વિરોધ પક્ષોને મતદાન કરતા અટકાવી શકાય.

કોંગ્રેસ નેતાએ પત્રમાં એમ પણ કહ્યું કે આ વીડિયોમાં JMM, કોંગ્રેસ અને RJDના નેતાઓ પર ઘણા ખોટા આરોપો અને નિવેદનો કરવામાં આવ્યા છે. આ વીડિયો 9 નવેમ્બરના રોજ ઝારખંડ બીજેપીના પેજ પર પોસ્ટ કરવામાં આવ્યો હતો.

જણાવવામાં આવ્યું છે કે આ FIR રાંચીના સાયબર ક્રાઈમ પોલીસ સ્ટેશનમાં દાખલ કરવામાં આવી છે. જેમાં ઝારખંડ ભાજપ પર આચાર સંહિતા અને અન્ય કાયદાઓનું ઉલ્લંઘન કરવાનો આરોપ લગાવવામાં આવ્યો છે. એટલું જ નહીં, સાયબર ક્રાઈમ પોલીસ સ્ટેશને આ પોસ્ટને વાંધાજનક ગણાવી છે અને IT એક્ટની કલમ 69(A) હેઠળ તેને હટાવવા માટે સોશિયલ મીડિયા પ્લેટફોર્મ પર મેસેજ પણ મોકલ્યો છે.