જમ્મુ-કાશ્મીર: કઠુઆમાં 9 દિવસમાં ત્રીજી વખત અથડામણ, સેનાએ એક આતંકવાદીને ઠાર માર્યો

Jammu Kashmir: જમ્મુ-કાશ્મીરમાં 9 દિવસમાં ત્રીજી વખત સેના અને આતંકવાદીઓ વચ્ચે અથડામણ થઈ છે. આ અથડામણ ગઈકાલે મોડી રાત્રે કઠુઆના પંચતીર્થી વિસ્તારમાં શરૂ થઈ હતી. એવું કહેવામાં આવી રહ્યું છે કે સુરક્ષા દળોએ એક આતંકવાદીને ઠાર માર્યો છે. પરંતુ તેની પુષ્ટિ હજુ સુધી થઈ નથી. સોમવારે મોડી રાત્રે સુરક્ષા દળોને આ વિસ્તારમાં શંકાસ્પદ ગતિવિધિઓ અંગે માહિતી મળી હતી. ત્યારબાદ સેનાએ શોધખોળ શરૂ કરી હતી.

રાત્રે લગભગ 10:15 વાગ્યે પેટ્રોલિંગ કરી રહેલા સુરક્ષા દળો અને આતંકવાદીઓ આમને-સામને આવી ગયા. આ સાથે બિલ્લાવરથી મોટી સંખ્યામાં સુરક્ષા દળો એન્કાઉન્ટર સ્થળે પહોંચી ગયા. આ વિસ્તાર બિલ્લાવર તાલુકામાં રામકોટ પોલીસ ચોકી હેઠળ આવે છે. એવું માનવામાં આવે છે કે ઘેરામાં એ જ ત્રણ આતંકવાદીઓ ફસાયેલા છે, જેઓ સુફાનમાં તેમના બે સાથી આતંકવાદીઓને માર્યા બાદ ઘટનાસ્થળ પરથી ભાગી ગયા હતા.

આ પછી ગઈકાલે આ આતંકવાદીઓ રુઈ વિસ્તારમાં જોવા મળ્યા હતા. પંચતીર્થી વિસ્તાર રુઈ વિસ્તારથી આગળ આવેલો છે, જે ઘુસણખોરો માટે બિલ્લાવર પહોંચવાનો માર્ગ રહ્યો છે. ત્રણેય આતંકવાદીઓ JEMના છે અને પાકિસ્તાની છે. સુરક્ષા દળોએ સમગ્ર વિસ્તારને ઘેરી લીધો છે જેથી આ આતંકવાદીઓને શક્ય તેટલી વહેલી તકે ખતમ કરી શકાય.

9 દિવસમાં ત્રીજી વખત અથડામણ
જમ્મુ અને કાશ્મીરના કઠુઆમાં છેલ્લા 9 દિવસમાં સુરક્ષા દળો અને આતંકવાદીઓ વચ્ચે આ ત્રીજું એન્કાઉન્ટર છે. પહેલું એન્કાઉન્ટર 23 માર્ચે હીરાનગર સેક્ટરમાં થયું હતું. બીજુ 28 માર્ચે જ્યારે ત્રીજો એન્કાઉન્ટર એક દિવસ પહેલા 30 માર્ચે કઠુઆના પંચતીર્થી વિસ્તારમાં થયો હતો. આ એન્કાઉન્ટરમાં એક આતંકવાદી માર્યો ગયો હોવાના સમાચાર છે. જોકે, સેના દ્વારા હજુ સુધી આતંકવાદીના મોતની પુષ્ટિ કરવામાં આવી નથી.

આ પણ વાંચો: નકલી પોલીસની ઓળખ આપી અંતરિયાળ વિસ્તારમાં રોફ જમાવતો આરોપી જેલ હવાલે

સેનાનું સર્ચ ઓપરેશન ચાલુ
ભારતીય સુરક્ષા દળોએ હવાઈ દેખરેખ અને સ્નિફર ડોગ્સની મદદથી ત્રણેયની શોધખોળ તેજ કરી દીધી છે. શોધ વિસ્તારમાં રાજબાગ વિસ્તારમાં રુઈ, જુથાન, ઘાટી અને સાન્યાલના જંગલ વિસ્તારો અને બિલ્લાવરના કેટલાક ભાગોનો સમાવેશ થાય છે. સુરક્ષા દળોએ સોમવારે આંતરરાષ્ટ્રીય સરહદ નજીક સાંબા સેક્ટર તેમજ રિયાસી અને ઉધમપુર જિલ્લામાં સર્ચ ઓપરેશન શરૂ કર્યું.