ઇઝરાયેલના સંરક્ષણ મંત્રીએ યુદ્ધના નવા તબક્કાની કરી જાહેરાત, ટાર્ગેટ લેબનોન

Israel Starts New Phase Of War: એક તરફ, ઇઝરાયેલ-ગાઝામાં હમાસ સાથે યુદ્ધ લડી રહ્યું છે, ત્યારે હવે ઇઝરાયેલના સંરક્ષણ મંત્રી યોવ ગેલન્ટે યુદ્ધના ‘નવા તબક્કા’ની શરૂઆતની જાહેરાત કરી છે. યુદ્ધના નવા તબક્કા હેઠળ, ઇઝરાયેલી સેના હવે લેબનોનની સાથે ઉત્તરી મોરચા પર પોતાનું ધ્યાન કેન્દ્રિત કરી રહી છે. ઇઝરાયેલે એવા સમયે યુદ્ધના નવા તબક્કાની જાહેરાત કરી છે જ્યારે બે દિવસમાં લેબનોનમાં પેજર્સ અને વોકી-ટોકી બ્લાસ્ટ કરવામાં આવ્યા. આ વિસ્ફોટોમાં 18 લોકોના મોત થયા છે અને 3000થી વધુ લોકો ઘાયલ થયા છે.

તાજેતરના વિસ્ફોટોમાં 9 લોકોના મોત થયા
નોંધનીય છે કે, લેબનોનમાં પેજર વિસ્ફોટના એક દિવસ બાદ બુધવારે દેશના ઘણા ભાગોમાં ઈલેક્ટ્રોનિક ઉપકરણોમાં વિસ્ફોટની ઘટનાઓ સામે આવી છે. હિઝબુલ્લાહના અધિકારીઓએ સરકારી મીડિયાને આ માહિતી આપી હતી. હિઝબુલ્લાહના અધિકારીઓએ જણાવ્યું હતું કે વોકી-ટોકી અને સોલાર ઉપકરણોને પણ નિશાન બનાવવામાં આવ્યા હતા. સ્વાસ્થ્ય મંત્રાલયે જણાવ્યું કે તાજેતરના વિસ્ફોટોમાં ઓછામાં ઓછા નવ લોકો માર્યા ગયા અને 300 અન્ય ઘાયલ થયા.

રસ્ટમાં વધારો થવાની સંભાવના
લેબનોનની સત્તાવાર સમાચાર એજન્સીએ બેરૂત અને દક્ષિણ લેબનોનના કેટલાક વિસ્તારોમાં ઘરોમાં સોલાર પાવર સિસ્ટમમાં વિસ્ફોટની જાણ કરી. મંગળવારે દેશભરમાં પેજર વિસ્ફોટોની શ્રેણી બાદ લેબનોનમાં મૂંઝવણ અને ગુસ્સો છે ત્યારે આ વિસ્ફોટ થયા છે. ઇઝરાયેલ અને હિઝબુલ્લાહ વચ્ચેના સંઘર્ષ વચ્ચે આ વિસ્ફોટો પછી તણાવ વધુ વધ્યો છે, જેનાથી યુદ્ધમાં પરિવર્તિત થવાનું જોખમ વધી ગયું છે.

ઈઝરાયેલે સૈનિકોની તૈનાતી વધારી
યુએસ સેક્રેટરી ઓફ સ્ટેટ એન્ટની બ્લિંકને બુધવારે જણાવ્યું હતું કે યુએસ હજુ પણ આકલન કરી રહ્યું છે કે આ હુમલો ગાઝામાં ઇઝરાયેલ-હમાસ યુદ્ધમાં યુદ્ધવિરામની વાટાઘાટોના પ્રયાસોને કેવી રીતે અસર કરી શકે છે. સમગ્ર ઘટનાથી વાકેફ એક અધિકારીએ જણાવ્યું કે સાવચેતીના પગલા તરીકે ઇઝરાયલે બુધવારે લેબનોન સાથેની તેની સરહદ પર સૈનિકોની તૈનાતી વધારવાની પ્રક્રિયા શરૂ કરી છે.