હમાસમાં તબાહી મચાવવા માટે ઈઝરાયલે યુદ્ધમાં AIની મદદ લીધી હતી, માઈક્રોસોફ્ટનો દાવો
Israel AI Services: ટેકનોલોજી જાયન્ટ માઇક્રોસોફ્ટે સ્વીકાર્યું છે કે તેણે ગાઝા યુદ્ધ દરમિયાન ઇઝરાયલી સૈન્યને આર્ટિફિશિયલ ઇન્ટેલિજન્સ (AI) અને ક્લાઉડ કમ્પ્યુટિંગ સેવાઓ પૂરી પાડી હતી. આ સેવાઓનો ઉપયોગ ઇઝરાયેલી બંધકોને શોધવા અને બચાવવાના પ્રયાસોમાં કરવામાં આવ્યો હતો. જોકે, કંપની કહે છે કે તેને કોઈ પુરાવા મળ્યા નથી કે તેના Azure પ્લેટફોર્મ અને AI ટેક્નોલોજીનો ઉપયોગ ગાઝામાં લોકોને નિશાન બનાવવા અથવા નુકસાન પહોંચાડવા માટે કરવામાં આવ્યો છે.
આ કબૂલાત માઇક્રોસોફ્ટની કોર્પોરેટ વેબસાઇટ પર એક સહી વગરની બ્લોગ પોસ્ટ દ્વારા કરવામાં આવી હતી, જે યુદ્ધમાં કંપનીની સંડોવણીની પહેલી જાહેર પુષ્ટિ માનવામાં આવે છે. આ યુદ્ધ 7 ઓક્ટોબર 2023ના રોજ હમાસ દ્વારા ઇઝરાયેલ પર હુમલો કર્યા પછી શરૂ થયું અને લગભગ 1,200 લોકો માર્યા ગયા. જવાબી કાર્યવાહીમાં ગાઝામાં હજારો લોકો માર્યા ગયા હતા. એસોસિએટેડ પ્રેસ (એપી) ના અગાઉના અહેવાલમાં દાવો કરવામાં આવ્યો હતો કે માઇક્રોસોફ્ટની ઇઝરાયેલના સંરક્ષણ મંત્રાલય સાથે ગાઢ ભાગીદારી છે અને યુદ્ધ શરૂ થયું ત્યારથી વ્યાપારી AI ઉત્પાદનોનો લશ્કરી ઉપયોગ 200 ગણો વધી ગયો છે.
એપીએ આપ્યો રિપોર્ટ
એપી રિપોર્ટમાં એમ પણ કહેવામાં આવ્યું છે કે ઇઝરાયેલી સૈન્યએ સર્વેલન્સ દ્વારા એકત્રિત કરવામાં આવેલી ગુપ્ત માહિતીનું વિશ્લેષણ અને ભાષાંતર કરવા માટે માઇક્રોસોફ્ટના એઝ્યુર ક્લાઉડ અને એઆઈ ટેકનોલોજીનો ઉપયોગ કર્યો હતો. બ્લોગ પોસ્ટમાં માઇક્રોસોફ્ટે એમ પણ જણાવ્યું હતું કે કર્મચારીઓની ચિંતાઓ અને મીડિયા અહેવાલોને પગલે, કંપનીએ આંતરિક સમીક્ષા શરૂ કરી છે અને મામલાની હકીકત તપાસવા માટે એક બાહ્ય કંપનીને પણ હાયર કરી છે, જોકે તેનું નામ જાહેર કરવામાં આવ્યું નથી.
માઇક્રોસોફ્ટે આ દાવો કર્યો હતો
કંપનીએ કહ્યું કે તે ઇઝરાયલને Azure ક્લાઉડ સ્ટોરેજ, વ્યાવસાયિક સેવાઓ, ભાષા અનુવાદ અને સાયબર સુરક્ષા સેવાઓ પૂરી પાડે છે. વધુમાં તેણે બંધક બચાવના પ્રયત્નોમાં વ્યાપારી કરારો ઉપરાંત વિશેષ કટોકટી તકનીકી સહાય અને સેવાઓ પ્રદાન કરી. માઇક્રોસોફ્ટ કહે છે કે તેણે પ્રક્રિયામાં તેના સિદ્ધાંતોનું પાલન કર્યું અને ગાઝાન નાગરિકોની ગોપનીયતા અને અધિકારોનું સન્માન કર્યું. કંપનીએ એ પણ સ્પષ્ટતા કરી કે ઇઝરાયલી સૈન્ય, અન્ય ગ્રાહકોની જેમ, તેની AI આચારસંહિતા અને ઉપયોગ નીતિઓને આધીન છે, જે AI ના ઉપયોગને પ્રતિબંધિત કરે છે જે કોઈપણને નુકસાન પહોંચાડી શકે છે.
