ઢાકા પૂજા મંડપ પર હુમલાને લઈને ભારતની બાંગ્લાદેશને ફટકાર! કહ્યું: ‘હિંદુઓની સુરક્ષા સુનિશ્ચિત કરો’

Bangladesh Durga Puja Mandap Attack: ભારતે બાંગ્લાદેશની રાજધાની ઢાકામાં પૂજા મંડપ પરના હુમલા અને બાંગ્લાદેશના સતખીરામાં જેશોરેશ્વરી કાલી મંદિરમાં થયેલી ચોરીની ઘટના અંગે ગંભીર ચિંતા વ્યક્ત કરી છે અને તેને “જઘન્ય કૃત્યો” ગણાવ્યા છે. ભારતે બાંગ્લાદેશ સરકારને હિંદુઓ અને તમામ લઘુમતીઓ તેમજ તેમના પૂજા સ્થાનોની સુરક્ષા સુનિશ્ચિત કરવા આગ્રહ કર્યો છે.

વિદેશ મંત્રાલયના પ્રવક્તા રણધીર જયસ્વાલે એક નિવેદનમાં જણાવ્યું હતું કે, “અમે ઢાકાના તાંતીબજારમાં પૂજા મંડપ પર હુમલા અને સતખીરાના પ્રતિષ્ઠિત જેશોરેશ્વરી કાલી મંદિરમાં થયેલી ચોરી અંગે ગંભીર ચિંતા વ્યક્ત કરી છે.” ભારતે આ ઘટનાઓને નિશ્ચિત પેટર્ન મુજબ વર્ણવી અને બાંગ્લાદેશ સરકારને હિંદુઓ, લઘુમતીઓ અને પૂજા સ્થાનોની સુરક્ષા સુનિશ્ચિત કરવાની માંગ કરી હતી.

‘કરાયો હતો સુનિયોજિત હુમલો’
તેમણે વધુમાં કહ્યું, “આ નિંદનીય ઘટનાઓ છે. તેઓ મંદિરો અને દેવતાઓને અપમાનિત કરવા અને નુકસાન પહોંચાડવાની પદ્ધતિસરની રીતને અનુસરે છે, જે અમે છેલ્લા ઘણા દિવસોથી જોઈ રહ્યા છીએ.” વિદેશ મંત્રાલયના પ્રવક્તાનું નિવેદન જૂના ઢાકાના તાંતીબજાર વિસ્તારમાં દુર્ગા પૂજા મંડપ પર ‘ક્રૂડ બોમ્બ’ ફેંકવાની ઘટના બાદ આવ્યું છે. બાંગ્લાદેશના સ્થાનિક મીડિયાના અહેવાલો અનુસાર, બોમ્બને કારણે નાની આગ લાગી હતી અને આ ઘટનામાં કોઈ જાનહાનિ થઈ નથી.

‘હિંદુઓની સુરક્ષાનું ધ્યાન રાખવામાં આવે’
હિંદુઓ અને તમામ લઘુમતીઓની સુરક્ષા માટેનું આહ્વાન કરતા જયસ્વાલે કહ્યું, “અમે બાંગ્લાદેશ સરકારને હિંદુઓ અને તમામ લઘુમતીઓ અને તેમના ધાર્મિક સ્થળોની સુરક્ષા સુનિશ્ચિત કરવા માટે આહ્વાન કરીએ છીએ, ખાસ કરીને આ શુભ તહેવારના સમયમાં.”