ગુરમીત રામ રહીમ ફરી પેરોલ પર જેલમાંથી બહાર આવ્યો, પહેલી વાર જશે ડેરા
Ram Rahim: દુષ્કર્મ અને હત્યાના કેસમાં દોષિત ઠેરવવામાં આવેલા ડેરા સચ્ચા સૌદાના વડા ગુરમીત રામ રહીમ ફરી એકવાર પેરોલ પર જેલમાંથી બહાર આવ્યા છે. અધિકારીઓના જણાવ્યા અનુસાર, તે મંગળવારે સવારે જેલમાંથી બહાર આવ્યો. 2017 માં દોષિત ઠેરવ્યા પછી આ પહેલી વાર હશે જ્યારે તે સિરસાના ડેરાની મુલાકાત લેશે. તેમના અગાઉના પેરોલ અથવા ફર્લો દરમિયાન તેમને ફક્ત ઉત્તર પ્રદેશના બાગપત સ્થિત તેમના આશ્રમમાં જવાની મંજૂરી આપવામાં આવી હતી.
મંગળવારે સવારે 5:26 વાગ્યે વહીવટીતંત્રે રામ રહીમને ગુપ્ત રીતે જેલમાંથી મુક્ત કર્યો. આ સમય દરમિયાન કડક સુરક્ષા વ્યવસ્થા જોવા મળી હતી. એવું માનવામાં આવે છે કે આ વખતે ગુરમીત રામ રહીમ સિરસા સ્થિત ડેરામાં રહેશે. રામ રહીમના વકીલ જિતેન્દ્ર ખુરાનાએ કહ્યું, ‘કાયદા મુજબ, તેમને આજે 30 દિવસના પેરોલ આપવામાં આવ્યા છે.’ પેરોલ બાદ, તે સવારે સિરસા સ્થિત ડેરા આશ્રમ પહોંચ્યો. કાયદા મુજબ એક વર્ષમાં 70 દિવસની પેરોલ અને 21 દિવસની ફર્લો આપી શકાય છે. આને કોઈપણ ચૂંટણી કે રાજકીય ઘટના સાથે જોડવું જોઈએ નહીં.
આ પણ વાંચો: વડોદરા: MSUની ગર્લ્સ હોસ્ટેલ ફરી આવી વિવાદમાં… મેસના ભોજનમાંથી ઈયળ નીકળતા હોબાળો
પેરોલ પર જેલમાંથી બહાર આવ્યા બાદ ગુરમીત રામ રહીમે પોતાની યુટ્યુબ ચેનલ દ્વારા પોતાના અનુયાયીઓને સંદેશ આપ્યો છે અને તેમને જણાવ્યું છે કે આ વખતે જેલમાંથી બહાર આવ્યા પછી તે સિરસા આશ્રમમાં રહેશે. ગુરમીત રામ રહીમે તેમના અનુયાયીઓને સિરસા ન આવવા અને ડેરાના સેવાદારો દ્વારા તેમને જે કહેવામાં આવે છે તેનું પાલન કરવાની અપીલ કરી છે.
