ખુશખબર! ભારતીય વૈજ્ઞાનિકોએ કરી કમાલ, શોધી કાઢી અલ્ઝાઇમરની દવા

Alzheimer Disease: અલ્ઝાઈમરને વૃદ્ધોનો રોગ માનવામાં આવે છે. પરંતુ વિશ્વમાં 30-64 વર્ષની વય જૂથના લગભગ 39 લાખ લોકો આ રોગથી પ્રભાવિત છે. એટલે કે આ રોગ 30 વર્ષની વયના યુવાનોને પણ થઈ શકે છે. એક નવા અભ્યાસ મુજબ યુવાનોમાં અલ્ઝાઈમરના લક્ષણો અલગ-અલગ હોય છે. આમાં, તેઓ કોઈપણ વસ્તુ પર ધ્યાન કેન્દ્રિત કરી શકતા નથી અથવા તેમની બોડી લેંગ્વેજ અસ્થિર થઈ શકે છે. જેના કારણે તેમની માનસિક અને શારીરિક ક્ષમતાઓ નબળી પડી જાય છે. જેના કારણે વૃદ્ધોને અનેક સમસ્યાઓનો સામનો કરવો પડે છે. જોકે હવે ભારતીય વૈજ્ઞાનિકોએ આ રોગનો ઈલાજ શોધી કાઢ્યો છે. એવામાં, ચાલો જાણીએ કે શું છે અલ્ઝાઈમર, તેના કેટલા દર્દીઓ છે અને તેની નવી સારવાર શું છે…

વિશ્વમાં અલ્ઝાઈમરના કેટલા દર્દીઓ?
અલ્ઝાઈમર એક ગંભીર ન્યુરોડીજનરેટિવ રોગ છે. સમગ્ર વિશ્વમાં 5.5 કરોડથી વધુ લોકો અલ્ઝાઈમર અને તેના કારણે થતા ડિમેન્શિયાથી પીડિત છે. આંકડા મુજબ, દર વર્ષે 1 કરોડથી વધુ લોકો અલ્ઝાઈમર અને ડિમેન્શિયાનો શિકાર બની રહ્યા છે.

અલ્ઝાઈમર કેમ ખતરનાક છે
અલ્ઝાઈમર મગજ સાથે સંબંધિત એક ડિસઓર્ડર છે, જેમાં મગજનું કદ સંકોચવા લાગે છે અને કોષો નષ્ટ થવા લાગે છે. આ સ્થિતિને લીધે, કંઈપણ યાદ રાખવું, કોઈ પણ વસ્તુ પર વિચારી નથી શકાતું. અલ્ઝાઈમરના ગંભીર કેસોમાં ડિમેન્શિયાનું જોખમ રહેલું છે. તેના લક્ષણો ઘટાડવા અને તેનાથી થતી સમસ્યાઓથી બચવા માટે કેટલીક દવાઓ લેવામાં આવે છે. ભારતીય વૈજ્ઞાનિકોએ હવે આ રોગની સારવારમાં મોટી સફળતા હાંસલ કરી છે.

શું છે અલ્ઝાઈમરની નવી સારવાર?
પૂણેના આધારકર રિસર્ચ સેન્ટરના વૈજ્ઞાનિકોએ અલ્ઝાઈમરના રોગની સારવાર માટે નવા મોલિકયુલ્સ વિકસાવ્યા છે. પ્રસાદ કુલકર્ણી અને વિનોદ ઉગલે નામના બે વૈજ્ઞાનિકોએ સિન્થેટિક, કોમ્પ્યુટેશનલ અને ઇન-વિટ્રો સ્ટડીઝની મદદથી નવા અણુઓની રચના અને સંશ્લેષણ કર્યું છે. તેમનું કહેવું છે કે આ મોલિકયુલ્સ બિન-ઝેરી છે અને અલ્ઝાઈમરની સારવારમાં અસરકારક સાબિત થઈ શકે છે. વૈજ્ઞાનિકોએ શોધી કાઢ્યું છે કે આ મોલિકયુલ્સ કોલિનેસ્ટેરેઝ એન્ઝાઇમ સામે અસરકારક છે. તેનો ઉપયોગ કરીને દવાઓ બનાવી શકાય છે, જે આ રોગને દૂર કરવામાં અસરકારક સાબિત થઈ શકે છે.