ભાગેડુ મેહુલ ચોકસીની રૂ.2,565 કરોડની સંપત્તિની હરાજી થશે, મુંબઈ કોર્ટે આપી મંજૂરી

Mehul Choksi properties: ભાગેડુ હીરાના વેપારી મેહુલ ચોકસીની મિલકતોની હરાજી કરવાની પ્રક્રિયા વધુ તેજ થઈ ગઇ છે. મુંબઈની એક ખાસ કોર્ટે ચોક્સીની 2,565 કરોડ રૂપિયાથી વધુની સંપત્તિ વેચવાની મંજૂરી આપી છે. આ પ્રોપર્ટીના વેચાણમાંથી મળેલી રકમ અસરગ્રસ્ત બેંકોના નામે ફિક્સ્ડ ડિપોઝિટ (FD) તરીકે રાખવામાં આવશે, જેથી પીડિતોને તેમના પૈસા પરત મળી શકે.

ગીતાંજલિ જેમ્સ લિમિટેડની મિલકતોના વેચાણમાંથી અત્યાર સુધીમાં 125 કરોડ રૂપિયાની રકમ પીડિતોને પરત કરવામાં આવી છે. આ મિલકતોમાં મુંબઈના સાંતાક્રુઝમાં આવેલા છ ફ્લેટ, બે ફેક્ટરીઓ અને વેરહાઉસનો સમાવેશ થાય છે.

ભારતમાં જપ્ત કરાયેલી સંપત્તિઓ
EDએ 2018માં ચોક્સી અને તેના જૂથની ₹1,217.2 કરોડની 41 મિલકતો જપ્ત કરી હતી.

• મુંબઈમાં 15 ફ્લેટ અને 17 ઓફિસ કોમ્પ્લેક્સ.
• કોલકાતાનો એક મોલ.
• અલીબાગમાં 4 એકરનું ફાર્મ હાઉસ.
• નાસિક, નાગપુર, પનવેલ (મહારાષ્ટ્ર) અને તમિલનાડુના વિલુપુરમમાં 231 એકર જમીન.
• હૈદરાબાદના રંગા રેડ્ડી જિલ્લામાં 170 એકરનો પાર્ક, જેની કિંમત ₹500 કરોડથી વધુ હોવાનો અંદાજ છે.
• મુંબઈના બોરીવલી (પૂર્વ) અને સાંતાક્રુઝ (પૂર્વ) વિસ્તારમાં ફ્લેટ્સ.
• મુંબઈના સાંતાક્રુઝ ઈલેક્ટ્રોનિક્સ એક્સપોર્ટ પ્રોસેસિંગ ઝોન (SEEPZ)માં આવેલી બે ફેક્ટરીઓ અને વેરહાઉસ પણ જપ્ત કરવામાં આવ્યા છે.

મેહુલ ચોક્સી પર કડક કાર્યવાહી
મેહુલ ચોક્સીની જપ્ત કરાયેલી મિલકતોમાં, મલબાર હિલ વિસ્તારમાં એક મિલકત પણ છે જે એક પ્રાઇમ લોકેશનમાં છે. જે ED દ્વારા જપ્ત કરવામાં આવી છે. તેની હરાજી પ્રક્રિયા શરૂ કરી દેવામાં આવી છે. ગોકુલ એપાર્ટમેન્ટ મલબાર હિલના 9/10મા માળે મેહુલ ચોક્સીનો ડુપ્લેક્સ ફ્લેટ છે. તેણે 11મા માળે ગેરકાયદે બાંધકામ કર્યું છે.

ફ્લેટના દરવાજા અને દિવાલો પર ED, CBI, અલગ અલગ બેંકો, BMC સોસાયટી અને વીજળી બિલની નોટિસ છે. આ ફ્લેટ અંદાજે સાત હજાર ચોરસ ફૂટનો છે અને તેની કિંમત અંદાજે 70 કરોડ રૂપિયા છે, જે હવે ખંડેર હાલતમાં છે. ફ્લેટની બહાર વૃક્ષો અને છોડ ઉગ્યા છે. જેના કારણે સોસાયટીની નીચેની ફ્લાઈટ્સ અને દિવાલોને નુકસાન થઈ રહ્યું છે. નોંધનીય છે કે, મેહુલ ચોક્સી અને તેના ભત્રીજા નીરવ મોદી પર 2018માં PNBની બ્રેડી હાઉસ બ્રાન્ચમાંથી 13,000 કરોડ રૂપિયાથી વધુની છેતરપિંડીનો આરોપ છે.