એલન મસ્કનો ફાઇટર પ્લેન અંગે મોટો દાવો – પાઇલોટ્સના જીવ માટે ખતરો; ડ્રોનના ઉપયોગ પર ભાર

નવી દિલ્હીઃ અબજોપતિ ઉદ્યોગપતિ એલન મસ્કને તાજેતરમાં અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પે તેમની કેબિનેટના ભાગ તરીકે પસંદ કર્યા છે. તેમને સરકારી કાર્યક્ષમતા વિભાગની જવાબદારી સોંપવાનો નિર્ણય લેવાયો છે. આ બધા વચ્ચે મસ્કે સોમવારે આધુનિક ફાઈટર પ્લેનની ટીકા કરી હતી. તેમને ડ્રોનથી બદલવા પર પણ ભાર મૂક્યો હતો. તેમણે કહ્યું કે, ડ્રોન એરિયલ વોરફેરનું ભવિષ્ય છે.

સ્પેસએક્સ, ટેસ્લા અને એક્સના વડાએ તેમના સોશિયલ મીડિયા પ્લેટફોર્મ પર જણાવ્યું હતું કે, ડ્રોનના યુગમાં માનવસંચાલિત લડાયક વિમાન પહેલાથી જ અપ્રચલિત છે. જેના કારણે પાયલટોના જીવ પર ખતરો છે.

ઉદ્યોગપતિ મસ્કે શું કહ્યું?
મસ્કે યુએસ સ્થિત લોકહીડ માર્ટિન દ્વારા ઉત્પાદિત એફ-35 નેક્સ્ટ જનરેશન ફાઇટર જેટનો ઉલ્લેખ કર્યો છે, જેણે 2015માં સેવામાં પ્રવેશ કર્યો હતો, તેની ટીકા થઈ હતી. તેણે સેંકડો ડ્રોન આકાશમાં ફરતા હોવાનો વીડિયો જાહેર કરતા એમ પણ કહ્યું કે, ‘તે દરમિયાન કેટલાક મૂર્ખ લોકો હજુ પણ F-35 જેવા માનવયુક્ત ફાઇટર પ્લેન બનાવી રહ્યા છે.’

F-35 અનેક સુવિધાઓથી સજ્જ છે
F-35 વિશ્વનું સૌથી અદ્યતન ફાઇટર એરક્રાફ્ટ છે. આ ઉપરાંત તે દુશ્મનની નજરથી છૂપાવવામાં પણ સક્ષમ છે અને તેનો ઉપયોગ ગુપ્ત માહિતી એકત્રિત કરવા માટે પણ થઈ શકે છે. જર્મની, પોલેન્ડ, ફિનલેન્ડ અને રોમાનિયાએ તાજેતરમાં એરક્રાફ્ટ માટે સોદા પર હસ્તાક્ષર કર્યા છે. જો કે, તેના વિકાસમાં સમસ્યાઓનો સામનો કરવો પડ્યો છે. ખાસ કરીને કોમ્પ્યુટર પ્રોગ્રામની ડિઝાઇન અને તેના ખૂબ ઊંચા ઓપરેશનલ ખર્ચની તેના વિરોધીઓ દ્વારા નિયમિતપણે ટીકા કરવામાં આવે છે.

મસ્કે સોમવારે કહ્યું હતું કે, એફ-35 ડિઝાઇન નિરાશાજનક હતી. કારણ કે તેને ઘણા બધા લોકો માટે ઘણી બધી વસ્તુઓની જરૂર હતી.

F-35 અમેરિકન હરીફોને એરક્રાફ્ટ વિકસાવવા દબાણ કરે છે
ઝ્યુરિચમાં સ્વિસ ફેડરલ ઇન્સ્ટિટ્યૂટ ઓફ ટેક્નોલોજીના સંશોધક મૌરો ગિલીએ જણાવ્યું હતું કે, ‘એફ-35ને જે વસ્તુ મોંઘી બનાવે છે તે સોફ્ટવેર અને ઇલેક્ટ્રોનિક્સ છે, પાઇલોટ નથી. એફ-35ના અસ્તિત્વે યુએસ હરીફોને તેમના એરક્રાફ્ટ અને અદ્યતન રડાર વિકસાવવા દબાણ કર્યું છે.’