આતંકવાદી એટેકથી હચમચ્યું કાશ્મીર! શોપિયામાં પૂર્વ સરપંચની હત્યા

Kashmir Terror Attack: શનિવારે આતંકીઓના બેવડા હુમલાથી જમ્મુ-કાશ્મીર હચમચી ઉઠ્યું હતું. શોપિયાંમાં આતંકવાદીઓએ ભાજપ સાથે સંકળાયેલા પૂર્વ સરપંચની ગોળી મારીને હત્યા કરી હતી. બીજી ઘટના પહેલગામમાં સામે આવી છે. જ્યાં આતંકવાદીઓએ જયપુરથી મુલાકાત કરવા આવેલા કપલ પર ગોળીબાર કર્યો હતો. બંનેને ગંભીર હાલતમાં હોસ્પિટલમાં દાખલ કરવામાં આવ્યા છે. ઘટના બાદ બંને સ્થળોએ સમગ્ર વિસ્તારને કોર્ડન કરીને સર્ચ ઓપરેશન ચાલુ છે.

પૂર્વ સરપંચની ગોળી મારી હત્યા
ધિકારીઓએ જણાવ્યું કે શોપિયાંમાં આતંકવાદીઓએ પૂર્વ સરપંચની ગોળી મારીને હત્યા કરી નાખી. દક્ષિણ કાશ્મીરમાં એક કલાકની અંદર આ બીજો આતંકવાદી હુમલો હતો. શનિવારે શોપિયન જિલ્લાના હરપોરા વિસ્તારમાં આતંકવાદીઓએ પૂર્વ સરપંચ એજાઝ શેખની ગોળી મારીને હત્યા કરી દીધી હતી.

બેવડા આતંકી હુમલાથી કાશ્મીર હચમચી ગયું 
એક અધિકારીએ જણાવ્યું કે ભૂતપૂર્વ સરપંચ પર આજે સાંજે હરપોરા વિસ્તારમાં આતંકવાદીઓએ ગોળીબાર કર્યો હતો. તેમણે કહ્યું કે હુમલા પછી તરત જ તેને નજીકની આરોગ્ય સુવિધામાં લઈ જવામાં આવ્યા હતા જ્યાં તે ગંભીર ઈજાઓને કારણે મૃત્યુ પામ્યા હતા. હોસ્પિટલના અધિકારીઓએ પણ પુષ્ટિ કરી કે તેને મૃતક હોસ્પિટલમાં લાવવામાં આવ્યા હતા. હુમલાખોરોને પકડવા માટે પોલીસ અને સુરક્ષા દળોએ વિસ્તારને કોર્ડન કરી લીધો છે. અગાઉ, અનંતનાગ જિલ્લામાં રાજસ્થાનના જયપુરથી મુલાકાત માટે આવેલા દંપતી પર આતંકવાદીઓએ ગોળીબાર કર્યો હતો. બંનેને ગંભીર ઈજાઓ પહોંચી છે અને તેઓ હોસ્પિટલમાં સારવાર હેઠળ છે.

સર્ચ ઓપરેશન ચાલુ 
પોલીસના જણાવ્યા અનુસાર આતંકવાદીઓએ અનંતનાગમાં પ્રવાસી કેમ્પને નિશાન બનાવીને ગોળીબાર કર્યો હતો. આ ફાયરિંગમાં જયપુરના બે લોકો ઘાયલ થયા છે. ઈજાગ્રસ્ત ફરહા અને તેના પતિ તબરેઝને ગંભીર હાલતમાં હોસ્પિટલમાં લઈ જવામાં આવ્યા હતા. કાશ્મીર ઝોન પોલીસે ટ્વીટ કર્યું કે આતંકવાદીઓએ જયપુરની મહિલા ફરહા અને તેના પતિ તબરેઝ પર અનંતનાગના યન્નરમાં ગોળીબાર કર્યો અને તેમને ઘાયલ કર્યા. ઇજાગ્રસ્તોને સારવાર માટે હોસ્પિટલમાં ખસેડવામાં આવ્યા હતા. વિસ્તારને કોર્ડન કરી દેવામાં આવ્યો છે.

મહેબૂબા મુફ્તીએ હુમલાની નિંદા કરી હતી
આતંકીઓને પકડવા માટે સર્ચ ઓપરેશન ચાલી રહ્યું છે. જમ્મુ અને કાશ્મીરના ભૂતપૂર્વ મુખ્ય પ્રધાન અને પીપલ્સ ડેમોક્રેટિક પાર્ટી (PDP)ના વડા મહેબૂબા મુફ્તીએ બિન-સ્થાનિકો પરના હુમલાની નિંદા કરી હતી. તાજેતરના મહિનાઓમાં જમ્મુ-કાશ્મીરમાં બિન-સ્થાનિક લોકો પર થયેલો હુમલો ચોંકાવનારો છે. એપ્રિલમાં, શોપિયાં જિલ્લામાં આતંકવાદીઓ દ્વારા એક બિન-સ્થાનિક ગાઈડની ગોળી મારીને હત્યા કરવામાં આવી હતી. આ પહેલા ફેબ્રુઆરીમાં શ્રીનગરમાં આતંકવાદીઓના ગોળીબારમાં બે બિન-સ્થાનિક લોકો માર્યા ગયા હતા.