ટ્રમ્પે કેનેડા-ચીનની મુશ્કેલી વધારી, આ વાતથી નારાજ થઈને લાદશે ભારે ટેરિફ!
અમદાવાદઃ અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પે જાહેરાત કરી છે કે, તેઓ કેનેડા અને મેક્સિકોથી આવતા તમામ ઉત્પાદનો પર 25 ટકા ટેરિફ લાદશે. ટ્રમ્પે અમેરિકામાં ગેરકાયદેસર ઈમિગ્રન્ટ્સના સતત વધતા ધસારાને લઈને ગુસ્સામાં આ જાહેરાત કરી છે. ટ્રમ્પે દેશમાં ગેરકાયદેસર રીતે આવતા ડ્રગ્સ માટે પણ ચીનને જવાબદાર ઠેરવ્યું છે અને ચીન પર વધારાના 10 ટકા ટેરિફ લાદવાની વાત કરી છે.
જો કેનેડા-મેક્સિકો ઇચ્છે તો એક દિવસમાં ગેરકાયદેસર ઇમિગ્રેશન રોકી શકે છે
સોમવારે સોશિયલ મીડિયા પ્લેટફોર્મ ટ્રુથ પર શેર કરવામાં આવેલી ઘણી પોસ્ટમાં ટ્રમ્પે કહ્યું કે, 20 જાન્યુઆરીએ પદના શપથ લીધા બાદ તેઓ સૌથી પહેલું કામ કેનેડા, ચીન અને મેક્સિકોથી આવતા સામાન પર ટેરિફ લાદશે. ટ્રમ્પે લખ્યું કે, હજારો લોકો મેક્સિકો અને કેનેડાથી અમેરિકામાં પ્રવેશ કરી રહ્યા છે અને તેઓ ડ્રગ્સ લાવી રહ્યા છે. જો કેનેડા અને મેક્સિકો ઇચ્છે તો તેઓ આ ગેરકાયદેસર ઇમિગ્રન્ટ્સને રોકી શકે છે અને તેમની પાસે તેમ કરવાની સત્તા પણ છે. તેથી કેનેડા અને મેક્સિકોથી આવતા ઉત્પાદનો પર 25 ટકા ટેરિફ લાદવામાં આવશે અને જ્યાં સુધી કેનેડા અને મેક્સિકો તેમની સરહદ દ્વારા યુએસમાં આવતા ગેરકાયદેસર ઇમિગ્રન્ટ્સને અટકાવશે નહીં, ત્યાં સુધી તેમણે ભારે ટેરિફ ચૂકવવા પડશે.
ફેન્ટાનીલ દવા ચીનમાંથી સપ્લાય કરવામાં આવે છે
ટ્રમ્પે ચીન પર નિશાન સાધતા કહ્યું કે, ચીનથી મોટા પ્રમાણમાં દવાઓ ખાસ કરીને ફેન્ટાનીલ અમેરિકામાં આવી રહી છે. તેમણે ભૂતકાળમાં ચીન સાથે ડ્રગ્સનો મુદ્દો પણ ઉઠાવ્યો હતો અને ચીને ડ્રગ્સ પેડલર્સ સામે કડક પગલાં લેવાની વાત પણ કરી હતી, પરંતુ તેમ છતાં અમેરિકામાં ફેન્ટાનીલ ડ્રગ્સનો ધસારો બેરોકટોક ચાલુ છે. આવી સ્થિતિમાં મારી સરકાર દવાઓને રોકવામાં સક્ષમ ન હોવાથી ચીન પર વધારાના 10 ટકા ટેરિફ લાદશે.
