CM યોગી અને RSSના વડા મોહન ભાગવત કરશે મુલાકાત, ચૂંટણી પરિણામો બાદ ગોરખપુરમાં RSSનું મહત્વપૂર્ણ ટ્રેનિંગ સેશન
Lok Sabha Election: લોકસભા ચૂંટણીના પરિણામો બાદ યુપીના સીએમ યોગી આદિત્યનાથ પ્રથમ વખત સંઘ પ્રમુખ મોહન ભાગવતને મળશે. બંને વચ્ચે આ મુલાકાત ગોરખપુરમાં થશે. યુપીમાં ભાજપના ખરાબ પ્રદર્શન બાદ આ બેઠકને મહત્વની માનવામાં આવી રહી છે, કારણ કે લોકસભા ચૂંટણી અને રાજ્યમાં સંઘના વિસ્તરણથી લઈને અન્ય મુદ્દાઓ પર બંને વચ્ચે ચર્ચા થવાની સંભાવના છે.
અગાઉ, ભાગવતે ચિઉટાહા વિસ્તારમાં એસવીએમ પબ્લિક સ્કૂલમાં ચાલી રહેલા સંઘ કાર્યકર્તા વિકાસ વર્ગ શિબિરમાં સ્વયંસેવકોને સંબોધિત કર્યા હતા, જ્યાં 3 જૂનથી તાલીમ શિબિરનું આયોજન કરવામાં આવી રહ્યું છે. આ તાલીમ શિબિરમાં 280 જેટલા સ્વયંસેવકો ભાગ લઈ રહ્યા છે. ગુરુવારે RSSના વડા મોહન ભાગવતે કાશી, ગોરખપુર, કાનપુર અને અવધ પ્રદેશોમાં સંઘની જવાબદારી સંભાળી રહેલા સંઘના લગભગ 280 સ્વયંસેવક કાર્યકરો સાથે સંઘના વિસ્તરણ, રાજકીય પરિસ્થિતિ અને સામાજિક ચિંતાઓ વિશે ચર્ચા કરી.
માહિતી અનુસાર, સંઘના વડાએ શાખાઓની સંખ્યા વધારવા અને સંગઠનના વિસ્તરણ પર ભાર મૂક્યો છે અને સંઘ દ્વારા ચલાવવામાં આવી રહેલા વિવિધ પ્રોજેક્ટના વિસ્તરણ અંગે પણ સૂચનો આપ્યા છે. તમને જણાવી દઈએ કે લોકસભા ચૂંટણીમાં બીજેપીના પરિણામો અપેક્ષા મુજબ ના આવ્યા બાદ RSS નેતાઓ તરફથી સતત નિવેદનો આવી રહ્યા છે.
નોંધનીય છે કે, રાષ્ટ્રીય સ્વયંસેવક સંઘના નેતા ઈન્દ્રેશ કુમારે લોકસભા ચૂંટણીના પરિણામો પર મોટું નિવેદન આપતાં સત્તાધારી ભાજપને ‘અહંકારી’ અને વિપક્ષ ઈન્ડિયા બ્લોકને ‘રામ વિરોધી’ ગણાવ્યા છે. ઈન્દ્રેશ કુમારે કહ્યું, રામ દરેક સાથે ન્યાય કરે છે. જરા 2024ની લોકસભા ચૂંટણી પર નજર નાખો. જેઓ રામની પૂજા કરતા હતા, પરંતુ ધીમે ધીમે તેમનામાં અહંકારનો વિકાસ થતો ગયો. એ પાર્ટીને સૌથી મોટી પાર્ટી બનાવી, પરંતુ તેને જે સંપૂર્ણ અધિકાર મળવો જોઈએ, જે શક્તિ મળવી જોઈતી હતી તે ભગવાને તેના અહંકારને કારણે બંધ કરી દીધી.
