ઉત્તરાખંડમાં 36 લોકોના મોત મામલે તપાસના આદેશ, અધિકારી સસ્પેન્ડ: સહાયની જાહેરાત
Almora Bus Accident: ઉત્તરાખંડના અલ્મોડામાં બસ દુર્ઘટના અંગે કડક વલણ અપનાવતા મુખ્યમંત્રી પુષ્કર સિંહ ધામીએ આ મામલે પૌરી અને અલ્મોડાના સંબંધિત વિસ્તારોમાં ARTOને સસ્પેન્ડ કરવાનો આદેશ આપ્યો છે. કમિશનર કુમાઉ ડિવિઝનને આ ઘટનાની મેજિસ્ટ્રેટ તપાસ કરવાની સૂચના આપવામાં આવી છે. આ દુર્ઘટનામાં અત્યાર સુધીમાં 36 લોકોના મોતની પુષ્ટિ થઈ છે.
સોમવારે અલ્મોડામાં એક મોટો માર્ગ અકસ્માત સર્જાયો હતો. માર્ચુલા પાસે એક પેસેન્જર બસ ખીણમાં ખાબકી ગઈ હતી. જાણવા મળી રહ્યું છે કે દુર્ઘટના સમયે બસમાં 45 લોકો સવાર હતા. અકસ્માત બાદ સમગ્ર વિસ્તારમાં હડકંપ મચી ગયો છે. માહિતી મળતા જ રેસ્ક્યુ ટીમ ઘટનાસ્થળે પહોંચી ગઈ હતી અને રાહત અને બચાવ કાર્ય શરૂ કરી દેવામાં આવ્યું હતું. એસએસપી અલ્મોરા પણ ઘટનાસ્થળે હાજર છે જ્યારે નૈનીતાલ પોલીસની ટીમ પણ પહોંચી ગઈ છે.
વહીવટી તંત્રએ અલ્મોડા રોડ એક્સિડન્ટની ઘટનામાં 36 લોકોના મોતની પુષ્ટિ કરી છે. જ્યારે ત્રણ લોકોને AIIMSમાં સારવાર માટે દાખલ કરવામાં આવ્યા છે. અન્ય ઇજાગ્રસ્તોને સારવાર માટે રામનગર સરકારી હોસ્પિટલમાં દાખલ કરવામાં આવ્યા છે.
કુમાઉના ડિવિઝનલ કમિશનર દીપક કુમારે જણાવ્યું કે અત્યાર સુધીમાં 36 લોકોના મોત થયા છે. મૃતકોના પરિવારજનોને 4 લાખ રૂપિયા અને ઘાયલોને 1 લાખ રૂપિયાનું વળતર આપવાની સૂચના આપવામાં આવી છે. AIIMSના ડોક્ટરોની એક ટીમ રામનગર આવશે. SDRF, SDM, વહીવટીતંત્ર સ્થળ પર છે.
વધી શકે છે મોતનો આંકડો
આ દુર્ઘટનામાં 36 મુસાફરોના મોત થયા છે જ્યારે ઘણા મુસાફરો ઘાયલ થયા છે, જેમાંથી 15 લોકોની હાલત અત્યંત ગંભીર હોવાનું કહેવાય છે અને તેમને સારવાર માટે ઉચ્ચ કેન્દ્રમાં રીફર કરવામાં આવ્યા છે. માનવામાં આવી રહ્યું છે કે મૃત્યુઆંક હજુ વધી શકે છે. હજુ પણ બસમાં કેટલાક લોકો ફસાયા હોવાના સમાચાર છે, જે બાદ બસને કાપીને તેઓને બહાર કાઢવાના પ્રયાસો કરવામાં આવી રહ્યા છે.
સીએમ ધામીએ અકસ્માત પર વ્યક્ત કર્યું દુઃખ
સીએમ પુષ્કર સિંહ ધામીએ આ દુર્ઘટના પર દુઃખ વ્યક્ત કર્યું છે. તેમણે X પર લખ્યું- ‘અલ્મોડા જિલ્લાના માર્ચુલામાં દુર્ભાગ્યપૂર્ણ બસ અકસ્માતમાં જાનહાનિના ખૂબ જ દુઃખદ સમાચાર મળ્યા. જિલ્લા વહીવટીતંત્રને રાહત અને બચાવ કામગીરી ઝડપથી હાથ ધરવા સૂચના આપવામાં આવી છે. ઘટના સ્થળે સ્થાનિક વહીવટીતંત્ર અને SDRFની ટીમો ઘાયલોને બહાર કાઢવા અને સારવાર માટે નજીકના આરોગ્ય કેન્દ્રમાં લઈ જવા માટે ઝડપથી કામ કરી રહી છે. જો જરૂરી હોય તો ગંભીર રીતે ઘાયલ મુસાફરોને એરલિફ્ટ કરવાની સૂચના પણ આપવામાં આવી છે.
