કેનેડાના PMનો ‘ખાલિસ્તાની’ પ્રેમ, જસ્ટિન ટ્રૂડોના ભાષણમાં ઝિંદાબાદના નારા ગૂંજ્યાં
Canada: કેનેડાના પીએમ જસ્ટિન ટ્રુડોનો ખાલિસ્તાન પ્રત્યેનો પ્રેમ ફરી સામે આવ્યો છે. ટોરોન્ટો શહેરમાં ઉજવાયેલા ખાલસા દિવસ પર ભાષણ આપવા માટે જ્યારે તેઓ સ્ટેજ પર પહોંચ્યા ત્યારે તેમના સ્વાગત માટે ખાલિસ્તાન ઝિંદાબાદના નારા લગાવવામાં આવ્યા હતા. તેમના ભાષણમાં તેમણે શીખ સમુદાયની કોઈપણ કિંમતે રક્ષણ કરવાની પ્રતિજ્ઞા લીધી હતી. તેમણે કહ્યું કે તેઓ હંમેશા શીખ સમુદાયના “અધિકારો અને સ્વતંત્રતાઓ”નું રક્ષણ કરશે.
ખાલિસ્તાની નેતા હરદીપ સિંહ નિજ્જરની હત્યા બાદ ભારત અને કેનેડા વચ્ચેના સંબંધો છેલ્લા ઘણા મહિનાઓથી વણસેલા છે. કેનેડા નિજ્જર હત્યાકાંડમાં ભારતીય અધિકારીઓની સંડોવણીના ગંભીર આરોપો લગાવી રહ્યું છે. બીજી બાજુ ભારતે આ આરોપોના જવાબમાં તેની પાસે ઘણી વખત પુરાવા માંગ્યા જે કેનેડાની સરકાર આજ સુધી રજૂ કરી શકી નથી. ખાલિસ્તાનને ઘણા મોરચે સમર્થન આપનાર કેનેડાના પીએમ જસ્ટિન ટ્રુડોએ રવિવારે બપોરે ખાલસા ડે પરેડને સંબોધિત કરી હતી. તેમની સભામાં ખાલિસ્તાન ઝિંદાબાદના નારા લાગ્યા હતા.
જસ્ટિન ટ્રુડોની ટિપ્પણી ડાઉનટાઉન ટોરોન્ટોમાં ખાલસા ડે પરેડ દરમિયાન આવી હતી. તેઓ તેમની સરકારના ચાર કેબિનેટ મંત્રીઓ અને લિબરલ પાર્ટીના ચાર સાંસદો સાથે કાર્યક્રમમાં પહોંચ્યા હતા. ટ્રુડો જેવા સ્ટેજ પર પહોંચ્યા કે સભામાં કેટલાક લોકોએ ખાલિસ્તાન ઝિંદાબાદના નારા લગાવવાનું શરૂ કરી દીધું. તેમણે સભામાં બહુ લાંબુ ભાષણ આપ્યું ન હતું. સભાને સંબોધતા, તેમણે કહ્યું, “કેનેડામાં લગભગ 8 લાખ શીખ સમુદાયના લોકો રહે છે. અમે શપથ લઈએ છીએ કે અમે હંમેશા તમારા અધિકારો અને સ્વતંત્રતાઓનું રક્ષણ કરીશું અને તમારા સમુદાયને નફરત અને ભેદભાવથી બચાવીશું.”
Pro khalistan slogans made in the presence of Canada PM Justin Trudeau at Khalsa Day Celebrations in Sunday. pic.twitter.com/I1aaqhA6uY
— Sidhant Sibal (@sidhant) April 29, 2024
ટ્રુડોના ભાષણ દરમિયાન ખાલિસ્તાન ઝિંદાબાદના નારા લાગ્યા હતા
જસ્ટિન ટ્રુડો જ્યારે સભાને સંબોધિત કરી રહ્યા હતા ત્યારે પ્રેક્ષકોમાં હાજર લોકો દ્વારા સતત ખાલિસ્તાન ઝિંદાબાદના નારા લગાવવામાં આવ્યા હતા. તેમણે તેમના ભાષણમાં કહ્યું, “તમને મુક્તપણે અને કોઈના ડર વિના તમારા ધર્મનું રક્ષણ કરવાનો અને તેનું પાલન કરવાનો અધિકાર છે. આ માટે અમે હંમેશા તમારી સાથે ઉભા રહીશું અને તમારું રક્ષણ કરીશું. અમે તમારી સાથે છીએ.
#BREAKING: Canadian Prime Minister Justin Trudeau smiles as Khalistan Zindabad slogans are raised by radicals in Ontario of Canada. NDP’s Jagmeet Singh says Sikh Genocide needs to be recognised. Canada continues to shelter and sponsor Khalistani separatism and terror. Shame. pic.twitter.com/0f5BN6fTVy
— Aditya Raj Kaul (@AdityaRajKaul) April 29, 2024
ટ્રુડોએ તેમના ભાષણમાં ગયા વર્ષે 18 જૂનના રોજ બ્રિટિશ કોલંબિયાના સરેમાં ખાલિસ્તાન સમર્થક હરદીપ સિંહ નિજ્જરની હત્યાનો ઉલ્લેખ કર્યો ન હતો. તમને જણાવી દઈએ કે નિજ્જર હત્યાકાંડને લઈને કેનેડાની સંસદમાં ટ્રુડોના નિવેદનને કારણે ભારત અને કેનેડાના રાજદ્વારી સંબંધોમાં ખટાશ આવી ગઈ હતી. ટ્રુડોએ સીધું જ ભારતનું નામ લીધું હતું અને દાવો કર્યો હતો કે ભારતીય અધિકારીઓ નિજ્જર હત્યાકાંડમાં સામેલ હતા. જોકે, ટ્રુડો સરકાર હજુ સુધી ભારત વિરુદ્ધ પુરાવા રજૂ કરી શકી નથી.
