મિલ્કીપુરમાં ભાજપનો ભવ્ય વિજય, અયોધ્યા હારનો બદલો પૂર્ણ

Milkipur By Election Result: અયોધ્યાની મિલ્કીપુર વિધાનસભા બેઠક પર યોજાયેલી પેટાચૂંટણીમાં ભાજપે જીત મેળવી છે. ભાજપના ચંદ્રભાનુ પાસવાને સમાજવાદી પાર્ટીના ઉમેદવાર અજિત પ્રસાદને 60 હજારથી વધુ મતોથી હરાવીને જીત મેળવી છે. એવું માનવામાં આવે છે કે મિલ્કીપુરમાં જીત સાથે ભાજપે લોકસભા ચૂંટણીમાં અયોધ્યામાં પોતાની હારનો બદલો લઈ લીધો છે.

યુપીમાં 2022ની વિધાનસભા ચૂંટણીમાં સમાજવાદી પાર્ટીએ મિલ્કીપુર બેઠક પરથી અવધેશ પ્રસાદને ટિકિટ આપી હતી અને તેઓ જીત્યા પણ હતા. આ પછી 2024ની લોકસભા ચૂંટણીમાં સમાજવાદી પાર્ટીએ અવધેશ પ્રસાદને અયોધ્યાથી વિધાનસભા ચૂંટણી લડાવ્યા, ત્યાર બાદ આ બેઠક ખાલી થઈ હતી.

ભાજપને 1,46,397 મત મળ્યા
મિલ્કીપુર પેટાચૂંટણીના પરિણામોની વાત કરીએ તો ભાજપના ચંદ્રભાનુ પાસવાનને 1,46,397 મત મળ્યા છે. જ્યારે સમાજવાદી પાર્ટીના ઉમેદવાર અજિત પ્રસાદને 84,687 મતોથી સંતોષ માનવો પડ્યો હતો. હાર અને જીત વચ્ચે 61,710 મતોનો તફાવત છે. મિલ્કીપુરની આ જીત ભાજપ માટે મોટી જીત માનવામાં આવી રહી છે. મુખ્યમંત્રી યોગી આદિત્યનાથે પોતે અહીં પોતાની તાકાત લગાવી દીધી હતી.

મિલ્કીપુરમાં અવધેશ પ્રસાદનો જાદુ ચાલ્યો નહીં
સમાજવાદી પાર્ટી દ્વારા મેદાનમાં ઉતારવામાં આવેલા અજિત પ્રસાદ અવધેશ પ્રસાદના પુત્ર છે. લોકસભા ચૂંટણીમાં અયોધ્યા બેઠક જીત્યા બાદ અવધેશ પ્રસાદ સપાના પોસ્ટર બોય તરીકે ઉભરી આવ્યા. આ પછી સમાજવાદી પાર્ટીએ તેમના પુત્રને મેદાનમાં ઉતાર્યા, પરંતુ સફળ થયા નહીં.

આ બેઠક પર થયેલી પેટાચૂંટણીમાં શરૂઆતથી જ ભાજપનો દબદબો જોવા મળ્યો હતો. મતદાન દરમિયાન અને પછી સમાજવાદી પાર્ટીએ ભાજપ પર ઘણા ગંભીર આરોપો લગાવ્યા હતા. અખિલેશ યાદવે પોતે કહ્યું હતું કે, દેશમાં ચૂંટણી પંચ ખતમ થઈ ગયું છે. જોકે, ભાજપે સમાજવાદી પાર્ટી પર નિશાન સાધ્યું હતું અને તેના આરોપો અને નિવેદનોને નાટક ગણાવ્યા હતા. ભાજપે કહ્યું કે, અખિલેશ યાદવને ખ્યાલ આવી ગયો છે કે તેઓ મિલ્કીપુરમાં હારી જશે અને તેથી જ તેઓ આવા નિવેદનો આપી રહ્યા છે.