બાબા રામદેવ ફરી મુશ્કેલીમાં, હવે હાઇકોર્ટે ફટકાર્યો 50 લાખ રૂપિયાનો દંડ

Baba Ramdev: પતંજલિ આયુર્વેદની કાયદાકીય મુશ્કેલીઓનો હજી અંત આવ્યો નથી. હવે બોમ્બે હાઈકોર્ટે કપૂર ઉત્પાદનો સાથે સંબંધિત એક કેસમાં 50 લાખ રૂપિયાનો દંડ ફટકાર્યો છે. આદેશના ઉલ્લંઘનને કારણે કોર્ટે આ કાર્યવાહી કરી છે. પતંજલિ આયુર્વેદ વિરુદ્ધ હાઈકોર્ટમાં ટ્રેડમાર્ક ઉલ્લંઘનનો કેસ દાખલ કરવામાં આવ્યો હતો. આ કેસ કપૂર પ્રોડક્ટ્સ સાથે પણ સંબંધિત હતો.

30 ઓગસ્ટ 2023 ના રોજ, કોર્ટે પતંજલિને કપૂર ઉત્પાદનો વેચવા પર પ્રતિબંધ મૂક્યો હતો. હવે વચગાળાની અરજી દ્વારા કોર્ટને માહિતી મળી છે કે પતંજલિએ આદેશનું ઉલ્લંઘન કર્યું છે. જસ્ટિસ આર.આઈ.છાગલા તાજેતરના કેસની સુનાવણી કરી રહ્યા હતા. તેમને જાણવા મળ્યું કે ઓગસ્ટમાં ઓર્ડર જારી કરવામાં આવ્યા બાદ પતંજલિએ જ કપૂર પ્રોડક્ટ્સ સપ્લાય કરી હતી. કોર્ટે આદેશમાં જણાવ્યું હતું કે, ‘પ્રતિવાદી નંબર 1 દ્વારા 30 ઓગસ્ટ, 2023 ના રોજના પ્રતિબંધક આદેશના વારંવાર ઉલ્લંઘનને કોર્ટ સહન કરશે નહીં…’ કોર્ટે પતંજલિ આયુર્વેદને આદેશ જારી થયાના એક સપ્તાહની અંદર 50 લાખ રૂપિયા જમા કરાવવા કહ્યું છે.

પતંજલિએ સોગંદનામું આપ્યું હતું
અહેવાલ છે કે કોર્ટના આદેશ બાદ પતંજલિએ એફિડેવિટ આપી હતી જેમાં બિનશરતી માફી માંગવામાં આવી હતી અને કહેવામાં આવ્યું હતું કે કોર્ટના આદેશનું પાલન કરવામાં આવશે. એફિડેવિટમાં સ્વીકારવામાં આવ્યું હતું કે ઓર્ડર જારી થયા પછી જૂન 2024 સુધી વિતરકોને 49 લાખ 57 હજાર 861 રૂપિયાના કપૂર ઉત્પાદનની સપ્લાય કરવામાં આવી હતી. એવું પણ કહેવામાં આવ્યું હતું કે 25 લાખ 94 હજાર 505 રૂપિયાના ઉત્પાદનો હજુ પણ વિતરકો પાસે છે અને તેનું વેચાણ બંધ કરી દેવામાં આવ્યું છે.

આ પણ વાંચો: પાલડીમાં પુત્રએ માતાની હત્યા કર્યા બાદ ગળેફાંસો ખાઈને આપઘાત કર્યો

મંગલમ ઓર્ગેનિક્સે દાવો કર્યો હતો કે પતંજલિએ જૂન 2024 પછી પણ ઉત્પાદનો વેચ્યા છે. કોર્ટને જણાવવામાં આવ્યું હતું કે 8 જુલાઈ સુધી વેબસાઈટ પર કપૂર ઉત્પાદનો ઉપલબ્ધ છે. મંગલમ ઓર્ગેનિક્સ દ્વારા આપવામાં આવેલી આ માહિતી પતંજલિની એફિડેવિટમાં નહોતી. પતંજલિને 50 લાખ રૂપિયા જમા કરાવવા માટે કહેવા ઉપરાંત કોર્ટે મંગલમ ઓર્ગેનિક્સને એફિડેવિટ દાખલ કરવા પણ કહ્યું છે. આ મામલે વધુ સુનાવણી 19 જુલાઈએ હાથ ધરવામાં આવશે.