કેજરીવાલને વધુ એક ઝટકો, ધરપકડ મામલે કોર્ટે રક્ષણની માગણી ફગાવી
Arvind Kejriwal: દિલ્હી હાઈકોર્ટે દિલ્હીના મુખ્યમંત્રી અરવિંદ કેજરીવાલની અરજી પર સુનાવણી કરી છે. જેમાં તેણે ED સમન્સ વિરુદ્ધ અરજી કરી હતી. જેના પર કોર્ટે પૂછ્યું કે તે એજન્સી સમક્ષ કેમ હાજર નથી થઈ રહ્યા?. તેની સામે કેજરીવાલના વકીલે કોર્ટ પાસે ધરપકડ સામે રક્ષણની માંગ કરી છે,પરંતુ કોર્ટે હાલમાં તેમને રાહત આપવાનો ઇનકાર કર્યો હતો.
અરવિંદ કેજરીવાલના વકીલ અભિષેક મનુ સિંઘવીએ કોર્ટ સમક્ષ સ્પષ્ટતા કરી કે, તેઓ એજન્સી સમક્ષ હાજર નથી થઈ રહ્યા. કેજરીવાલને હાજર થવામાં કોઈ સમસ્યા નથી, પરંતુ તેમની ધરપકડ થઈ શકે છે. કેજરીવાલને 10 સમન્સ જારી કરવામાં આવ્યા છે. જે અંગે કેજરીવાલે પોતાનો જવાબ પણ આપી દીધો છે અને પૂછપરછ માટે વર્ચ્યુઅલ રીતે હાજર થવા તૈયાર છે. વધુમાં સિંઘવીએ કોર્ટને કહ્યું કે,’ઇડી સમક્ષ હાજર થવામાં કોઈ સમસ્યા નથી, અમને માત્ર ધરપકડથી રક્ષણ જોઈએ છે.’ અભિષેક મનુ સિંઘવીએ કહ્યું કે એન્ફોર્સમેન્ટ ડિરેક્ટોરેટના તમામ સમન્સ કાયદાકીય પ્રક્રિયા અને જોગવાઈઓ અનુસાર નથી.
‘સમન્સ કયા આધારે મોકલવામાં આવ્યું હતું?’
એડવોકેટ સિંઘવીએ પહેલા કેજરીવાલને ધરપકડથી રક્ષણની વિનંતી કરી હતી. સિંઘવીએ કહ્યું કે, પીએમએલએ એક્ટમાં રાજકીય પક્ષની વ્યાખ્યા કરવામાં આવી નથી અને આવી સ્થિતિમાં કયા આધારે સમન્સ મોકલવામાં આવ્યા છે? ED વતી એએસજી એસવી રાજુએ કેજરીવાલની અરજી પર સવાલો ઉઠાવ્યા અને કહ્યું કે અરજી મેન્ટેનેબલ નથી અને તેઓ આ મામલે પોતાનો જવાબ દાખલ કરશે.
એન્ફોર્સમેન્ટ ડિરેક્ટોરેટ સમન્સ કેસ
મુખ્યપ્રધાન અરવિંદ કેજરીવાલે એન્ફોર્સમેન્ટ ડિરેક્ટોરેટના સમન્સને દિલ્હી હાઈકોર્ટમાં પડકાર્યો હતો. તેમણે કેન્દ્રીય એજન્સી દ્વારા અત્યાર સુધી મોકલવામાં આવેલા તમામ સમન્સ સામે અરજી કરી હતી. દિલ્હી લિકર પોલિસી કૌભાંડ કેસમાં એજન્સીએ તેમને પૂછપરછ માટે 9 વખત સમન્સ મોકલ્યા હતા, પરંતુ તેઓ હાજર થયા ન હતા. તેમણે એજન્સીની કાર્યવાહીને ‘રાજકીય પ્રેરિત’ ગણાવી હતી.
હાઈકોર્ટમાં જસ્ટિસ સુરેશ કૈત અને જસ્ટિસ મનોજ જૈનની ખંડપીઠે મુખ્યમંત્રી કેજરીવાલની અરજી પર સુનાવણી કરી હતી. તાજેતરમાં તેણે રાઉઝ એવન્યુ કોર્ટમાંથી પૂછપરછ માટે હાજર થતાં પહેલા આ કેસમાં જામીન મેળવ્યા હતા. આ પછી, કેન્દ્રીય એજન્સીએ તેમને દારૂ નીતિ કેસ સંબંધિત મની લોન્ડરિંગ કેસમાં 9મું સમન્સ જારી કર્યું હતું. તેમને 21 માર્ચે હાજર થવા માટે બોલાવવામાં આવ્યા હતા.
રાઉઝ એવન્યુ કોર્ટે દિલ્હીના સીએમને રૂબરૂ હાજર રહેવા જણાવ્યું હતું. આ માટે તે શનિવારે કોર્ટમાં પહોંચ્યો હતો, જ્યાં તેને જામીન મળી ગયા હતા. તપાસ એજન્સીએ કોર્ટમાં બે અરજી દાખલ કરી હતી, જેમાં તેની સામે કેસ ચલાવવાની અપીલ કરવામાં આવી હતી. આ કેસમાં જામીન મળ્યાના બીજા જ દિવસે એજન્સીએ તેમને 9મીએ સમન્સ પાઠવ્યું હતું.
