લોરેન્સ બિશ્નોઈના નામ પર કોઈપણ સલમાનને મારી શકે છે! અભિનેતાની સુરક્ષામાં કરાયો વધારો
Salman Khan: જેલમાં બંધ ગેંગસ્ટર લોરેન્સ બિશ્નોઈ (31) ઉર્ફે બલકરણ બ્રાર માત્ર પાંચ વર્ષનો હતો જ્યારે ફિલ્મ હમ સાથ સાથ હૈના શૂટિંગ દરમિયાન 1998માં અભિનેતા સલમાન ખાનને સંડોવતા કાળા હરણના શિકારનો કેસ રાજસ્થાનમાં બન્યો હતો. આ મામલાને લઈને બિશ્નોઈ સમુદાય નારાજ હતો. 26 વર્ષ પછી પણ જેલમાં હોવા છતાં પણ સલમાન વિરુદ્ધ કુખ્યાત ગેંગસ્ટરની નારાજગી ચર્ચામાં છે. જો કે હીરો બનવા માટે લોરેન્સ બિશ્નોઈના નામ પર સલમાનને કોઈ પણ મારી શકે છે. હાલમાં સલમાન ખાનની સુરક્ષા વધારી દેવામાં આવી છે.
હકીકતમાં મુંબઈમાં સલમાન ખાનના નજીકના ગણાતા મહારાષ્ટ્રના પૂર્વ મંત્રી અને રાષ્ટ્રવાદી કોંગ્રેસ પાર્ટી (NCP) નેતા બાબા સિદ્દીકીના ગોળીબારમાં મૃત્યુ બાદ બિશ્નોઈ ગેંગનું નામ સામે આવ્યું છે.
શું છે બિશ્નોઈ ગેંગનો ઈરાદો?
દિલ્હી પોલીસના એક અધિકારીએ કહ્યું કે બિશ્નોઈ ગેંગના ઈરાદા હવે સલમાન ખાનથી બદલો લેવાથી આગળ વધી ગયા છે. અધિકારીએ જણાવ્યું હતું કે ગેંગ હવે બોલીવુડમાં પ્રવેશ કરવાનો પ્રયાસ કરી રહી છે, જે એક સમયે દાઉદ ઇબ્રાહિમનો પ્રદેશ હતો. અને તે પોતાની ડી-કંપની સ્થાપવા માંગે છે.
અનેક હત્યાઓની જવાબદારી લીધી
અધિકારીએ જણાવ્યું હતું કે જેલમાં હોવા છતાં, લોરેન્સ બિશ્નોઈ કથિત રીતે 2022માં પંજાબી ગાયક સિદ્ધુ મૂસેવાલા અને 2023માં કરણી સેનાના વડા સુખદેવ સિંહ ગોગામેડી સહિત અનેક અગ્રણી લોકોની હત્યા કરવામાં સફળ રહ્યા હતા. આ સિવાય તેણે કેનેડામાં સિંગર્સ એપી ધિલ્લોન અને ગિપ્પી ગ્રેવાલના ઘરની બહાર ફાયરિંગ કરવાનું કાવતરું ઘડ્યું હતું. બિશ્નોઈ ગેંગે સપ્ટેમ્બર 2023માં ખાલિસ્તાની સમર્થક સુખા દુનાકેની હત્યાની જવાબદારી પણ લીધી છે.
આ પણ વાંચો: ચેન્નાઈમાં ભારે વરસાદ, મોડી રાતે ડે.સીએમ ઉદયનિધિએ કર્યું નિરીક્ષણ; શાળા-કોલેજ બંધ
બિશ્નોઈ અને સલમાન વચ્ચે દુશ્મની
પોલીસના જણાવ્યા અનુસાર બિશ્નોઈ અને સલમાન વચ્ચેની દુશ્મની પહેલીવાર 2018માં જાહેર થઈ હતી, જ્યારે બિશ્નોઈએ જોધપુરમાં કોર્ટમાં હાજરી દરમિયાન કહ્યું હતું કે અમે સલમાન ખાનને મારી નાખીશું. એકવાર અમે પગલાં લઈશું તો બધાને ખબર પડશે. મેં હજુ સુધી કંઈ કર્યું નથી. તેઓ કોઈ કારણ વગર મારા પર ગુનાનો આરોપ લગાવી રહ્યા છે.
મૃત્યુની ધમકીઓ
ત્યારથી સલમાન ખાનને ઘણી જાનથી મારી નાખવાની ધમકીઓ મળી છે અને આ મુદ્દાએ આ વર્ષે એપ્રિલમાં હેડલાઇન્સ બનાવી હતી જ્યારે બિશ્નોઈ ગેંગના બે સાગરિતોએ સલમાનના બાંદ્રા નિવાસની બહાર ગોળીબાર કર્યો હતો. જેમની પાછળથી ધરપકડ કરવામાં આવી હતી. દિલ્હી પોલીસના રેકોર્ડ મુજબ, બિશ્નોઈએ પોતે ક્યારેય કોઈની હત્યા કરી નથી, તેમ છતાં તે ગુજરાતની જેલમાંથી ગેંગ ચલાવતો સૌથી ભયંકર ગેંગસ્ટર બની ગયો છે. તેની કામ કરવાની રીત ભાગેડુ અંડરવર્લ્ડ ડોન દાઉદ ઈબ્રાહિમ જેવી છે.
