ન્યૂયોર્ક જતી એર ઈન્ડિયાની ફ્લાઈટને મળી બોમ્બની ધમકી, ફ્લાઈટ મુંબઈ પરત ફરી

Air India New York Flight: 10 માર્ચ 2025ના રોજ, એર ઈન્ડિયાની ફ્લાઈટ AI-119, એક બોઈંગ 350, મુંબઈના છત્રપતિ શિવાજી મહારાજ ઈન્ટરનેશનલ એરપોર્ટથી ન્યુયોર્કના જોન એફ. કેનેડી ઈન્ટરનેશનલ એરપોર્ટ માટે સવારે 2:00 વાગ્યે ઉડાન ભરી હતી. આ વિમાનમાં 303 મુસાફરો અને 19 ક્રૂ સભ્યો સવાર હતા. ફ્લાઇટ 15 કલાકમાં તેના સ્થાને પહોંચવાની હતી. અઝરબૈજાન ઉપરથી પસાર થતી વખતે, પ્લેનના ક્રૂને બોમ્બની ધમકી મળી. આ માહિતી બાદ પાયલટે તરત જ વિમાનને મુંબઈ પરત કરવાનો નિર્ણય લીધો હતો. પરિણામે વિમાને પોતાનો માર્ગ બદલી નાખ્યો અને સવારે 10:25 વાગ્યે મુંબઈમાં સલામત રીતે ઉતરાણ કર્યું.

303 મુસાફરો માટે હોટેલમાં રહેવા અને ભોજનની વ્યવસ્થા
મુંબઈ પરત ફર્યા બાદ સુરક્ષા ટીમોએ પ્લેનનું ચેકિંગ શરૂ કર્યું હતું. બોમ્બ શોધવાની પ્રક્રિયામાં, દરેક ભાગની શોધ કરવામાં આવી હતી, પરંતુ કોઈ શંકાસ્પદ વસ્તુ મળી ન હતી. સૂત્રોના જણાવ્યા અનુસાર, આ ધમકી કદાચ ખોટી હતી. આ ઘટના બાદ, એર ઇન્ડિયાએ તમામ 303 મુસાફરો અને ક્રૂ સભ્યોની સુવિધા માટે વ્યવસ્થા કરી. મુસાફરોને હોટલમાં રહેવા, ભોજન અને અન્ય જરૂરી સહાય પૂરી પાડવામાં આવી હતી. આ વિમાન બીજા દિવસે, 11 માર્ચ 2025, સવારે 5:00 વાગ્યે ફરીથી ઉડાન ભરવાનું છે.

11 માર્ચે ફરી રવાના થશે
એર ઈન્ડિયાએ તેના સત્તાવાર નિવેદનમાં જણાવ્યું હતું કે, “10 માર્ચ, 2025ના રોજ, મુંબઈથી ન્યૂયોર્ક જતી ફ્લાઈટ AI-119ને ફ્લાઈટ દરમિયાન સંભવિત સુરક્ષા સંકટનો સામનો કરવો પડ્યો હતો. પ્રોટોકોલ મુજબ, પ્લેનને મુંબઈ પરત બોલાવવામાં આવ્યું હતું અને તે સવારે 10:25 વાગ્યે સુરક્ષિત રીતે ઉતર્યું હતું. તપાસ એજન્સીઓ આ મામલાની તપાસ કરી રહી છે. એર ઈન્ડિયા સંપૂર્ણ સહયોગ આપી રહી છે. ફ્લાઇટ હવે 11 માર્ચ 2025ના રોજ સવારે 5:00 વાગ્યે ઉપડશે. મુસાફરોને હોટલ, ભોજન અને સહાય પૂરી પાડવામાં આવી છે. આ ઘટના સલામતી પ્રક્રિયાઓનું પાલન ન થયું તે દર્શાવે છે.