હવામાન વિભાગની મોટી આગાહી, ફેબ્રુઆરીની શરૂઆતમાં કમોસમી વરસાદની શક્યતા

અમદાવાદઃ ગુજરાતમાં ફરી એકવાર ઠંડીનો નવો રાઉન્ડ શરૂ થયો છે. ત્યારે હવામાન વિભાગની નવી આગાહી સામે આવી છે. હવામાન વિભાગે આ વખતે કમોસમી વરસાદની જાહેરાત કરી છે.

હવામાન વિભાગના ડાયરેક્ટર એ.કે. દાસે માહિતી આપતા જણાવ્યુ છે કે, ‘આગામી સાત દિવસ વાતાવરણ શુષ્ક રહેશે. ત્યારબાદ વેસ્ટર્ન ડિસ્ટર્બન્સની અસરના કારણે માવઠું થવાની શક્યતા છે. આ ઉપરાંત આગામી 2 અને 3 ફેબ્રુઆરીએ રાજ્યમાં કમોસમી વરસાદની આગાહી છે.’

તેઓ વધુમાં જણાવે છે કે, ‘2જી ફેબ્રુઆરીએ સૌરાષ્ટ્રમાં અમરેલી, ભાવનગર અને દક્ષિણ ગુજરાતમાં નવસારી, વલસાડ, દમણ અને દાદરા નગર હવેલીમાં માવઠાંની આગાહી છે. જ્યારે 3જી ફેબ્રુઆરીએ અમરેલી, ભાવનગર, અરવલ્લી, મહીસાગર, દાહોદમાં હળવા વરસાદની આગાહી છે. આ ઉપરાંત રાજ્યના કેટલાક વિસ્તારોમાં વરસાદી માહોલ રહેશે.’

તાપમાનની વાત કરવામાં આવે તો, ગુજરાતમાં લઘુત્તમ તાપમાન 10 ડિગ્રી રહેશે. અમદાવાદ, ગાંધીનગરમાં વાદળછાયું વાતાવરણ રહેશે. અમદાવાદ, ગાંધીનગરમાં 14થી 15 ડિગ્રી સુધી લઘુત્તમ તાપમાન રહેશે.