અમદાવાદમાંથી વધુ એક ડ્રગ્સ પેડલરની ધરપકડ, લાખોનું ડ્રગ્સ જપ્ત

મિહિર સોની, અમદાવાદઃ શહેરમાં વધુ એક ડ્રગ્સ પેડલર ઝડપાયો છે. નારોલ પોલીસે ડ્રગ્સનાં જથ્થા સાથે એક ડ્રગ્સ પેડલરની ધરપકડ કરી છે. ડ્રગ્સ પેડલરને ડ્રગ્સનો જથ્થો આપવા મધ્ય પ્રદેશના ડ્રગ્સ માફિયા અમદાવાદ આવતા હતા. પોલીસે આ મામલે મોહસીન ઉર્ફે કાલિયા શેખની ધરપકડ કરી છે.

મળતી માહિતી પ્રમાણે, અમદાવાદના નારોલમાં 57 ગ્રામ 650 મિલીગ્રામ MD ડ્રગ્સનો જથ્થો કિંમત 5.70 લાખ, રોકડ 50 હજાર, બે મોબાઈલ ફોન મળી 6.70 લાખ મુદ્દામાલ સાથે ઝડપી લીધો છે. આરોપી મોહસીન ઉર્ફે કાલિયા શેખ ડ્રગ્સનો જથ્થો લઇને છૂટક પડીકીઓ બનાવીને વેચે છે. નારોલ પોલીસે બાતમીના આધારે રેડ કરીને આરોપીને ડ્રગ્સના જથ્થા સાથે રંગે હાથે ઝડપી લીધો હતો. મધ્ય પ્રદેશનો ડ્રગ્સ માફિયા ઈમરાન જાવરા ડ્રગ્સનો જથ્થો લઈ અમદાવાદ આપવા આવતો હતો. આરોપી મોહસીન શેખે અત્યાર સુધી 3 વખત ડ્રગ્સનો જથ્થો વોન્ટેડ આરોપી ઈમરાન સાથે લીધો હોવાની કબૂલાત કરી છે. જો કે, મધ્યપ્રદેશથી આરોપી ઇમરાન મોટી માત્રામાં ડ્રગ્સ લાવીને અમદાવાદના ડ્રગ્સ પેડલરોને આપતો હોવાની પોલીસને આશંકા છે.

આ મામલે કે ડિવિઝનના એસીપી યુવરાજસિંહ ગોહિલે જણાવ્યુ હતુ કે, ‘ડ્રગ્સ પેડલર મોહસીન શેખ ડ્રગ્સનો નશો કરે છે અને પોતાને નશો કરવા અને પોતાના ખર્ચા કાઢવા ડ્રગ્સ વેચવાના રવાડે ચડ્યો છે. છેલ્લા 3 મહિનામાં 3 વખત ડ્રગ્સનો જથ્થો મગાવી ચૂક્યો છે. ત્યારબાદ નારોલના આજુબાજુના વિસ્તારમાં છૂટક ડ્રગ્સનું વેચાણ કરે છે. ત્યારે પોલીસથી બચવા માટે આરોપી મોહસીન બાઈકને ખોટી નંબર પ્લેટ લગાવીને ફરતો હતો. હાલ નારોલ પોલીસે મોહસીન પૂછપરછ શરૂ કરી છે કે કોને કોને ડ્રગ્સ આપતો હતો.’

પકડાયેલા ડ્રગ્સ પેડલર મોહસીન વિરુદ્ધ વટવા, નારોલમાં પ્રોહિબિશન સહિત ચાર ગુના નોંધાયા છે. પોલીસે મધ્ય પ્રદેશનો ડ્રગ્સ માફિયા ઇમરાનની ધરપકડ કરવાની તજવીજ હાથ ધરી છે. ત્યારે આરોપી ઈમરાન પકડાયા બાદ સામે આવશે કે અત્યાર સુધી અમદાવાદમાં કેટલા ડ્રગ્સ પેડલરો ડ્રગ્સ જથ્થો સપ્લાય કરતો હતો.