દબાણ હટાવવા માટે AMCએ એન્ફોર્સમેન્ટ સ્ક્વોડ બનાવી, 48 વોર્ડમાં કાર્યવાહી
મિહિર સોલંકી, અમદાવાદઃ શહેરમાં દબાણ હટાવવા માટે અમદાવાદ મ્યુનિસિપલ કોર્પોરેશન દ્વારા એનફોર્સમેન્ટ સ્ક્વોડનું નિર્માણ કરવામાં આવ્યું છે. ત્યારે આ સ્કવોડ પોતાના નામની ડિઝાઇન કરેલી ગાડીમાં જશે અને તેમને આપેલા વિસ્તારમાં દબાણના કાર્યની દેખરેખ કરશે.
આ સમગ્ર અમદાવાદના 48 વોર્ડમાં 48 સ્ક્વોડનું નિર્માણ કરવામાં આવ્યું છે. ત્યારે મુખ્ય મુદ્દો એ છે કે, આ સ્ક્વોડ છેલ્લા 20-25 દિવસથી કાર્યરત થઈ ચૂકી છે, પરંતુ ટાઉન પ્લાનિંગ અને એસ્ટેટ મેનેજમેન્ટ કમિટીના ચેરમેનને આ બાબતનો ખ્યાલ જ ન હતો. આજે થયેલી કમિટી બેઠકમાં તેમના દ્વારા અધિકારીઓ પાસે માહિતી માંગવામાં આવી હતી.
આ જોતા એવું કહી શકીએ કે, ક્યાંકને ક્યાંક ચેરમેન અને અધિકારીઓમાં સંલગ્નતા ઓછી છે. આ પહેલાં પણ આવી જ રીતે દબાણ માટેની એક ટીમ બનાવવામાં આવી હતી. તે રિક્ષામાં ફરતી હતી ત્યારે પણ અધિકારીઓ દ્વારા ટીમ બનાવવામાં આવી હતી. પરંતુ ચેરમેનને આ વાતનો ખ્યાલ ન હતો. એટલે અહીં દવા એ જ પરંતુ બોટલ બદલાઈ તેવું જોવા મળે છે.
