બે સગીરાને લલચાવીને બળજબરી દુષ્કર્મ આચર્યું, 3ની ધરપકડ; સ્કૂલે ન જતા ભાંડો ફૂટ્યો
મિહિર સોની, અમદાવાદઃ સોશિયલ મીડિયામાં મિત્રતા કરીને બે સગીરા સાથે દુષ્કર્મની ઘટના સામે આવી છે. નિકોલ પોલીસે દુષ્કર્મ કરનારા 3 મિત્રોની ધરપકડ કરી છે. સગીરાને લલચાવી ફોસલાવીને સ્કૂલમાંથી લઈ ગયા અને દુષ્કર્મ આચર્યું હતું.
આ મામલે પોલીસે આરોપી વિવેક કશ્યપ, અભય સોજીત્રા અને પારસ બોરડને બે સગીરા સાથે અપહરણ અને દુષ્કર્મ કેસમાં ધરપકડ કરી છે. આ સમગ્ર ઘટનાની વાત કરીએ તો નિકોલમાં ધોરણ 9માં અભ્યાસ કરતી બે સગીરા 12 ફેબ્રુઆરીના રોજ સવારે 6 વાગે સ્કૂલે જવા નીકળી હતી. ત્યારબાદ સ્કૂલે ન પહોંચતા સ્કૂલના શિક્ષકે સગીરાના પરિવારને જાણ કરી હતી. આ સ્કૂલમાંથી ગુમ થયેલી બંને સગીરા મિત્રો છે. બંને સગીરાના પરિવારે પોલીસને ફરિયાદ કરતા પોલીસે તપાસ શરૂ કરી હતી.
નિકોલમાં ધોરણ 9માં અભ્યાસ કરતી બે સગીરા સાથે દુષ્કર્મ આચરનાર 3 આરોપીઓની ધરપકડ.#Student | #Crime | @AhmedabadPolice
Report : @mihirsoni298 pic.twitter.com/yFwhmY3LUR
— NewsCapital Gujarat (@NewsCapitalGJ) February 15, 2025
આ દરમિયાન બંને સગીરા બીજા દિવસે વહેલી સવારે નિકોલ નજીક મળી આવી હતી. પોલીસે સગીરાનું નિવેદન લેતા ત્રણેય આરોપીમાંથા વિવેક કશ્યપે સ્કૂલથી સગીરાનું અપહરણ કરીને જુદા જુદા વિસ્તારમાં ફરવા લઈ ગયો હતો. થલતેજમાં સનમ તેરી કસમ નામની ફિલ્મ બતાવી હતી અને ત્યારબાદ મિત્ર અભય સોજીત્રાના કેફે લઈ ગયો હતો. જ્યાં એક સગીરા સાથે શારીરિક અડપલાં કર્યા હતા. ત્યારબાદ બંને સગીરાને નિકોલ ડી માર્ટ ઉતારીને જતો રહ્યો હતો. આ દરમિયાન અભય સોજીત્રાએ સગીરાને મેસેજ કરીને મળવાનું કહ્યું હતું. ત્યારબાદ મિત્ર પારસ બોરડને બોલાવ્યો હતો. આ બંને આરોપીઓ સગીરાને લલચાવી ફોસલાવીને હોટલ લઈ ગયા અને દુષ્કર્મ આચર્યું હતું. નિકોલ પોલીસે આ આરોપીઓ વિરુદ્ધ ગુનો નોંધી ધરપકડ કરી છે.
પોલીસ તપાસમાં સામે આવ્યું કે, પકડાયેલો આરોપી વિવેક કશ્યપ કેમેરામેન તરીકે કામ કરે છે. 3 મહિના પહેલા એક લગ્ન પ્રસંગમાં એક સગીરાના સંપર્કમાં આવ્યો હતો. બંને ત્યારબાદ ઇન્સ્ટાગ્રામમાં સંપર્કમાં આવ્યા હતા અને મિત્રતા કરી હતી. સગીરાએ ફરવા માટે બીજી મિત્રને કહીને વિવેકને મળવાનું નક્કી કર્યું હતું. વિવેક સગીરાને સ્કૂલમાં લેવા આવ્યો હતો. સગીરા સ્કૂલે જવાના બદલે બહારથી વિવેકની બાઈક પર જતી રહી હતી. રસ્તામાં કપડાં બદલ્યા હતા અને ફરવા નીકળી ગયા હતાં. અભય સોજીત્રાનો નિકોલમાં કાફે છે. જ્યારે પારસ બોરડ ખાનગી કંપનીમાં નોકરી કરે છે. વિવેક બંને સગીરાને અભયના કાફે લઈ ગયો હતો ત્યારે અભયની નજર બગડી હતી અને સગીરાનો નંબર મેળવીને તેમને મેસેજ કરીને લલચાવી હતી. ત્યારબાદ હોટલમાં અલગ અલગ રૂમ બુક કરાવીને બળજબરીથી દુષ્કર્મ આચર્યું હતું. આ ઘટનાને લઈને નિકોલ પોલીસે અપહરણ, દુષ્કર્મ અને પોક્સો હેઠળ ગુનો નોંધી તપાસ શરૂ કરી છે.
નિકોલ પોલીસે ત્રણેય આરોપીની ધરપકડ કરીને મેડિકલ તપાસ કરાવી છે. આ આરોપીઓ અન્ય કોઈ સાથે આવું કૃત્ય કર્યું છે કે નહીં અને કોઈ ગુનાહિત ઇતિહાસ છે કે નહીં આ મુદ્દે વધુ પૂછપરછ શરૂ કરી છે.
