હરિયાણાની ચૂંટણીના પરિણામો પહેલાં, ભૂપેન્દ્ર હુડ્ડાએ CM પદ માટે દાવો કર્યો, દિલ્હીમાં ઘામા
Haryana Election Results: હરિયાણા વિધાનસભા ચૂંટણીના પરિણામો 8 ઓક્ટોબરે આવશે. તે પહેલા કોંગ્રેસના વરિષ્ઠ નેતા અને રાજ્યના પૂર્વ મુખ્યમંત્રી ભૂપેન્દ્ર સિંહ હુડ્ડા દિલ્હી પહોંચી ગયા છે. અહીં તેઓ હાઈકમાન્ડને મળવાના છે. નોંધનીય છે કે, એક્ઝિટ પોલ હરિયાણામાં કોંગ્રેસની સત્તામાં વાપસીનો સંકેત આપી રહ્યા છે અને ભૂપેન્દ્ર સિંહ હુડ્ડા મુખ્યમંત્રીની રેસમાં સૌથી મજબૂત દાવેદાર માનવામાં આવે છે. આ સિવાય કોંગ્રેસ નેતા કુમારી સેલજાનું નામ પણ આ લિસ્ટમાં બીજા સ્થાને હોવાની ચર્ચા છે.
ચૂંટણીના પરિણામો આવતા પહેલા ભૂપેન્દ્ર સિંહ હુડ્ડાએ દિલ્હીમાં નિવેદન આપીને સંદેશ આપ્યો છે કે જો કોંગ્રેસની સરકાર બનશે તો તેઓ મુખ્યમંત્રી પદ સંભાળવા માટે સંપૂર્ણ રીતે મેદાનમાં છે. દિલ્હીમાં પત્રકારો સાથે વાત કરતા ભૂપેન્દ્ર સિંહ હુડ્ડાએ કહ્યું કે તેઓ ન તો થાકેલા છે કે ન તો નિવૃત્ત છે. તેમણે આ ટિપ્પણી મુખ્યમંત્રી પદ માટેના તેમના દાવા સાથે જોડાયેલા પ્રશ્ન પર કરી હતી. પત્રકારો સાથે વાત કરતી વખતે હુડ્ડાએ એમ પણ કહ્યું હતું કે મુખ્યમંત્રી પદને લઈને કોંગ્રેસ હાઈકમાન્ડના નિર્ણયને પાર્ટીના તમામ નેતાઓ સ્વીકારશે. તેમણે આશા વ્યક્ત કરી કે હરિયાણામાં કોંગ્રેસને જંગી બહુમતી મળવા જઈ રહી છે કારણ કે તમામ વર્ગોએ તેને સમર્થન આપ્યું છે.
‘ન તો હું થાક્યો છું, ન તો નિવૃત્ત થયો’
હુડ્ડાએ કહ્યું કે લોકસભા ચૂંટણીમાં તમામ 10 સીટો પર કોંગ્રેસનો વોટ શેર વધ્યો છે અને ભાજપનો વોટ શેર ઘટ્યો છે. આ સ્પષ્ટ સંકેત છે કે આ વખતે હરિયાણામાં કોંગ્રેસની સરકાર બનશે. મુખ્યમંત્રીને લગતા સવાલ પર 77 વર્ષના કોંગ્રેસના નેતાએ કહ્યું કે, “મુખ્યમંત્રી વિશે કોઈ પ્રશ્ન નથી. જેનું નામ લેવામાં આવશે, દરેક તેને સ્વીકારશે.” તેણે ફરીથી કહ્યું તે ન તો ‘થાકેલા’ છે કે ન તો ‘નિવૃત્ત’ છે. ધારાસભ્યોના મત જાણવામાં આવશે અને હાઈકમાન્ડ નિર્ણય લેશે.
ભૂપેન્દ્ર હુડ્ડા મુખ્યમંત્રી પદની રેસમાં?
તમને જણાવી દઈએ કે કોંગ્રેસની જીતના મામલામાં મુખ્યપ્રધાન પદના દાવેદાર માનવામાં આવતા ભૂપેન્દ્ર સિંહ હુડ્ડા છેલ્લા કેટલાક અઠવાડિયામાં ઘણી વખત આ નિવેદન આપી ચુક્યા છે. હુડ્ડાએ એમ પણ કહ્યું કે કોંગ્રેસ આ ચૂંટણીમાં હરિયાણાના તમામ વિસ્તારોમાં સારું પ્રદર્શન કરશે. હરિયાણા વિધાનસભા ચૂંટણીના પરિણામો આવતીકાલે જાહેર થશે. 5 ઓક્ટોબરે મતદાન થયું હતું. મતદાન બાદ આવેલા લગભગ તમામ એક્ઝિટ પોલમાં આ ચૂંટણીમાં કોંગ્રેસની જીતની સંભાવના વ્યક્ત કરવામાં આવી છે.
