નીતિન ગડકરીને લોકસભાની ચૂંટણીમાં PM બનવાની ઓફર મળી’તી, વફાદારી મોંઘી પડી!
નાગપુરઃ કેન્દ્રીય મંત્રી અને ભાજપના વરિષ્ઠ નેતા નીતિન ગડકરીએ આજે એક મોટો ખુલાસો કર્યો છે. નીતિન ગડકરીએ કહ્યું કે, લોકસભા ચૂંટણી દરમિયાન એક વિપક્ષી નેતાએ વડાપ્રધાન બનવા માટે તેમનો સંપર્ક કર્યો હતો. કેન્દ્રીય પરિવહન અને રાષ્ટ્રીય ધોરીમાર્ગ મંત્રી નીતિન ગડકરીએ શનિવારે ખુલાસો કર્યો હતો કે એક વરિષ્ઠ વિપક્ષી નેતાએ 2024ની લોકસભા ચૂંટણી પહેલા વડાપ્રધાન પદની ઓફર સાથે તેમનો સંપર્ક કર્યો હતો. પરંતુ તેમણે તેનો અસ્વીકાર કર્યો.
નાગપુરમાં પત્રકારત્વ પુરસ્કાર સમારોહ દરમિયાન મીડિયાને સંબોધતા ગડકરીએ કહ્યું, ‘મેં નેતાને કહ્યું કે હું એક વિચારધારા અને મજબૂત માન્યતાઓને અનુસરનાર વ્યક્તિ છું. હું એવી પાર્ટીમાં છું જેણે મને તે બધું આપ્યું છે જેનું મેં ક્યારેય સ્વપ્નમાં પણ વિચાર્યું ન હતું. કોઈ પ્રસ્તાવ મને લલચાવી શકે નહીં.’ જો કે, તેમણે આ ઘટનાની સંપૂર્ણ વિગતો ખુલ્લેઆમ આપી ન હતી. પરંતુ તેમણે એવો સંકેત આપ્યો હતો કે 2024ની સામાન્ય ચૂંટણીઓ પહેલા વિરોધ પક્ષના કોઈ ખાસ રાજકારણીએ તેમનો સંપર્ક કર્યો હતો. જ્યારે એવું માનવામાં આવતું હતું કે ભાજપ પૂર્ણ બહુમતી હાંસલ કરી શકશે નહીં અને તેને કેટલાક વિપક્ષોના સમર્થનની જરૂર પડી શકે છે.
નીતિન ગડકરીએ કહ્યું કે, મેં તેમને સ્પષ્ટપણે કહ્યું કે ‘હું ચોક્કસ સિદ્ધાંતો અને મજબૂત માન્યતાઓ સાથે ઉછર્યો છું અને હું તેમની સાથે સમાધાન નહીં કરું.’ તેમણે મીડિયાને તેમના વ્યવસાયમાં સમાન સ્તરની પ્રતીતિ અપનાવવા પ્રોત્સાહિત કર્યા. ગડકરીએ ભારપૂર્વક જણાવ્યું હતું કે, આ પ્રતિબદ્ધતા પત્રકારોની ભાવિ પેઢીઓ સુધી પણ વિસ્તરવી જોઈએ. જો કે, તેમણે પ્રદેશમાં ‘સોપારી’ પત્રકારોની વધતી સંખ્યા પર ખેદ વ્યક્ત કર્યો અને કેટલાક પત્રકારો પર વ્યક્તિગત લાભ માટે માહિતી અધિકાર (RTI) કાયદાનો બ્લેકમેલિંગ અને દુરુપયોગ કરવાનો આરોપ મૂક્યો.
નીતિન ગડકરીએ ધ્યાન દોર્યું કે, કેવી રીતે કેટલાક પત્રકારોએ મર્સિડીઝ કાર સહિત લક્ઝરી વસ્તુઓ ખરીદવા માટે અનૈતિક માધ્યમોનો ઉપયોગ કર્યો છે. તેમના ભાષણ દરમિયાન ગડકરીએ તેમના મંત્રી તરીકેના સમયની એક ઘટના શેર કરી હતી. જ્યાં એક પત્રકારે જાહેર બાંધકામ વિભાગ (PWD)ના અધિકારીઓને બ્લેકમેલ કરવા માટે RTIનો કથિત ઉપયોગ કર્યો હતો. ગડકરીએ કહ્યું કે, મારા એક અધિકારીએ મને આ બ્લેકમેલ વિશે જણાવ્યું. મેં તેને કહ્યું, ‘જ્યારે તે પત્રકાર તમારી ઓફિસમાં આવે ત્યારે દરવાજો બંધ કરીને તેને સારી રીતે મારજો.’
