કર્ણાટકમાં ગણપતિ વિસર્જનના વરઘોડા પર પથ્થરમારો, સ્થિતિને કાબૂમાં લેવા કલમ 144 લાગુ કરાઈ

Karnataka: કર્ણાટકના માંડ્યા જિલ્લામાં ગણપતિ વિસર્જન માટે જઈ રહેલા વરઘોડા પર પથ્થરમારો થયા બાદ સ્થિતિ વધુ વણસી ગઈ હતી. બંને જૂથો વચ્ચેનો વિવાદ એટલો વધી ગયો હતો કે આગચંપી અને વાહનોની તોડફોડના બનાવો બન્યા હતા. વધારાના પોલીસ દળોને તૈનાત કરીને સ્થિતિને નિયંત્રણમાં લાવવામાં આવી છે પરંતુ વિસ્તારમાં તણાવ યથાવત છે. હવે સવાલ એ થાય છે કે માંડ્યામાં ગણપતિ વિસર્જન વરઘોડા પર પથ્થરમારો કોણે કર્યો? શહેરમાં અત્યારે કેવી સ્થિતિ છે? વિસ્તારમાં શાંતિ જાળવવા વહીવટીતંત્રે શું તૈયારીઓ કરી છે?

અમે મસ્જિદ નજીકથી પસાર થતાની સાથે જ પથ્થરમારો શરૂ થયો
ગણપતિ વિસર્જન વરઘોડા પર પથ્થરમારાની આ ઘટના માંડ્યા જિલ્લાના નાગમંગલા ટાઉન પોલીસ સ્ટેશન વિસ્તારમાં બની હતી. અહેવાલો અનુસાર, બદરીકોપ્પાલુ ગામના યુવાનો ગણેશ વિસર્જન માટે વરઘોડો કાઢી રહ્યા હતા. આરોપ છે કે જ્યારે નાગમંગલામાં એક મસ્જિદ નજીકથી વરઘોડો પસાર થયો ત્યારે મુસ્લિમ સમુદાયના લોકોએ જુલૂસ પર પથ્થરમારો શરૂ કર્યો. પથ્થરમારો બાદ સ્થિતિ વધુ વણસી ત્યારે બંને જૂથો વચ્ચે અથડામણ શરૂ થઈ હતી અને ત્યારબાદ ઘણી દુકાનોમાં તોડફોડ કરવામાં આવી હતી. બદમાશો આટલેથી શાંત ન થયા અને તેમણે રસ્તા પર પાર્ક કરેલા વાહનોને પણ નિશાન બનાવ્યા અને અનેક વાહનોને આગ ચાંપી દીધી.

પોલીસે બદમાશો પર લાઠીચાર્જ કર્યો હતો
તોડફોડ અને આગચંપી બાદ સમગ્ર વિસ્તારમાં તણાવ વધી ગયો હતો. ઘટનાની માહિતી મળતાની સાથે જ પોલીસ ઘટનાસ્થળે પહોંચી ગઈ હતી અને પરિસ્થિતિને કાબૂમાં લેવા માટે બદમાશો પર લાઠીચાર્જ કર્યો હતો. આ સાથે જ વિસ્તારમાં હાઈ એલર્ટ જારી કરીને BNSની કલમ 163 લાગુ કરવામાં આવી હતી અને વધારાના દળોને પણ સ્થળ પર તૈનાત કરવામાં આવ્યા હતા. હવે પોલીસ વિસ્તારના સીસીટીવી અને અન્ય વાયરલ વીડિયોની મદદથી બદમાશોની ઓળખ કરવાની અને તેમની સામે કાર્યવાહી કરવાની તૈયારી કરી રહી છે. પરિસ્થિતિને કાબૂમાં લેવા માટે નાગમંગલા તાલુકામાં આગામી બે દિવસ માટે કલમ 144 પણ લાગુ કરવામાં આવી છે.

આ પણ વાંચો: ખુલાસો: સૈયદપુરામાં પથ્થરમારો કરવા 5 યુવાનો અઢી કિલોમીટર દૂરથી આવ્યા હતા

મળતી માહિતી અનુસાર સાંજે 6:30 વાગ્યે ડીજે વગાડતો વરઘોડો માંડ્યા સર્કલ પરની એક મસ્જિદ પાસે પહોંચ્યો હતો. કેટલાક યુવકોએ ડીજે વગાડવાનો વિરોધ કર્યો હતો અને તેને રોકવા બાબતે બંને જૂથો વચ્ચે બોલાચાલી થઈ હતી. સાંજે સાડા સાત વાગ્યે વરઘોડો મસ્જિદ પાસે પહોંચ્યો ત્યારે અચાનક પથ્થરમારો શરૂ થયો. આ ઘટનામાં વિસર્જન વરઘોડામાં આવેલા ત્રણ યુવકોને ઈજા થઈ હતી. તેમજ ઝપાઝપી પણ શરૂ થઈ હતી અને કેટલાક તોફાની તત્વો તલવારો અને સળિયા સાથે ત્યાં પહોંચી ગયા હતા. 09:30 થી 10 વાગ્યાની વચ્ચે, અચાનક કેટલાક બદમાશોએ માંડ્યા સર્કલ પર દુકાનોમાં તોડફોડ કરી અને કેટલાક વાહનોને આગ ચાંપી દીધી. ભારે જહેમત બાદ પોલીસે પરિસ્થિતિને કાબુમાં લીધી હતી.

VHP નાગમંગલા બંધનું એલાન
આ ઘટનાના વિરોધમાં વિશ્વ હિન્દુ પરિષદે આજે નાગમંગલા બંધનું એલાન આપ્યું છે. SDPIનો આરોપ છે કે નાગમંગલામાં મુસ્લિમોની દુકાનો અને વાહનોને નુકસાન પહોંચાડવામાં આવ્યું હતું. હિન્દુ સમાજના લોકોએ પોલીસ સ્ટેશન જઈને વિરોધ પ્રદર્શન કર્યું હતું અને આ માટે જવાબદારોની તાત્કાલિક ધરપકડ કરવાની માંગ કરી હતી. હિંદુ પક્ષનું કહેવું છે કે પથ્થરમારો અને આગચંપીની ઘટનામાં મુસ્લિમ સમુદાયના લોકો સામેલ હતા. જેમણે સુનિયોજિત કાવતરાના ભાગરૂપે આ હુમલો કર્યો હતો. એવા પણ આરોપ છે કે મુસ્લિમ યુવકો તલવારો લઈને આવ્યા હતા અને લોકોને ધમકાવવાનો પ્રયાસ કરી રહ્યા હતા. ઘટના બાદ સ્થિતિ કાબુમાં હોવાનું કહેવાય છે તેમ છતાં વિસ્તારમાં તણાવ યથાવત છે.

આ પણ વાંચો: પાટણમાં ગણેશ વિસર્જન દરમિયાન એક જ પરિવારના 4 લોકોના ડૂબી જતા મોત

કેન્દ્રીય મંત્રી કુમારસ્વામીએ આ ઘટનાની નિંદા કરી
માંડ્યાની ઘટનાને લઈને કેન્દ્રીય મંત્રી અને કર્ણાટકના પૂર્વ મુખ્યમંત્રી એચડી કુમારસ્વામીનું નિવેદન પણ સામે આવ્યું છે. કુમારસ્વામીએ X પર એક પોસ્ટમાં કહ્યું, ‘હું માંડ્યા જિલ્લાના નાગમંગલામાં ગણેશ વિસર્જન દરમિયાન બનેલી ઘટનાની સખત નિંદા કરું છું. શહેરમાં શાંતિ અને વ્યવસ્થાની નિષ્ફળતાનો આ પુરાવો છે કે એક સમુદાયના બદમાશોએ જાણીજોઈને ભગવાન ગણપતિની શોભાયાત્રામાં શાંતિપૂર્ણ રીતે ચાલતા ભક્તોને નિશાન બનાવીને હંગામો મચાવ્યો હતો. પોલીસ અને સામાન્ય લોકો પર પથ્થરો અને ચપ્પલ ફેંક્યા હતા. પેટ્રોલ બોમ્બ ફોડ્યા હતા અને કેન્દ્રીય મંત્રીએ તેમની પોસ્ટમાં સ્થાનિક પોલીસની નિષ્ફળતા પર પણ ગંભીર ચિંતા વ્યક્ત કરી હતી.