‘તહવ્વુર રાણા મુંબઈ જેવા અન્ય શહેરોમાં હુમલાઓનું આયોજન કરી રહ્યો હતો’, NIAનો દાવો

Tahawwur Rana: NIA એ 10 એપ્રિલે દિલ્હીની કોર્ટમાં સુનાવણી દરમિયાન કહ્યું હતું કે તહવ્વુર રાણા મુંબઈ જેવા દેશના અન્ય શહેરોમાં આતંકવાદી હુમલા કરવાનું કાવતરું ઘડી રહ્યો હતો. NIAએ સ્પેશિયલ જજ ચંદ્રજીત સિંહની કોર્ટમાં આ દાવો કર્યો હતો. સુનાવણી બાદ, ન્યાયાધીશે તહવ્વુર રાણાને 18 દિવસ માટે NIA કસ્ટડીમાં મોકલી આપ્યો.

ન્યાયાધીશે NIAને આ સૂચનાઓ આપી
ન્યાયાધીશ ચંદ્રજીત સિંહે પોતાના આદેશમાં NIAને દર 24 કલાકે તહવ્વુર રાણાની તબીબી તપાસ કરાવવાનો અને તેમને વૈકલ્પિક દિવસોમાં તેમના વકીલને મળવાની મંજૂરી આપવાનો નિર્દેશ આપ્યો. જોકે, આ બેઠક ફક્ત NIA અધિકારીની હાજરીમાં જ થશે. NIA અધિકારીએ તહવ્વુર રાણા અને તેમના વકીલ વચ્ચેની બેઠક દરમિયાન અમુક અંતરે ઊભા રહેવું પડશે, પરંતુ તે બંનેને સાંભળી શકે એટલા અંતરે જ રહેશે.

NIA તહવ્વુર રાણાને હુમલાના સ્થળે લઈ જશે
સુનાવણી દરમિયાન, NIAએ દલીલ કરી હતી કે મુંબઈ હુમલાના સમગ્ર કાવતરાનો પર્દાફાશ કરવા માટે વિગતવાર પૂછપરછની જરૂર પડશે અને તેને હુમલાના સ્થળો પર લઈ જવાની જરૂર પડશે જેથી ક્રાઈમ સીન રિક્રિએટ કરી શકાય. સુનાવણી દરમિયાન NIAના DIG, એક IG અને દિલ્હી પોલીસના પાંચ DCP કોર્ટમાં હાજર હતા. ગુરુવારે તહવ્વુર રાણાને અમેરિકાથી ભારત પ્રત્યાર્પણ કરવામાં આવ્યો. મુંબઈ હુમલાના માસ્ટમાઇન્ડ તહવ્વુર રાણાને ભારત લાવવાને ભારત માટે એક મોટી રાજદ્વારી જીત માનવામાં આવી રહી છે.

નોંધનીય છે કે, 2008ના મુંબઈ આતંકવાદી હુમલામાં 166 લોકો માર્યા ગયા હતા. આ સિવાય સેંકડો લોકો ઘાયલ થયા છે. આ હુમલામાં મુંબઈ પોલીસના ત્રણ વરિષ્ઠ અધિકારીઓ સહિત અનેક પોલીસકર્મીઓ શહીદ થયા હતા. આ ભયાનક હુમલો પાકિસ્તાનથી આવેલા આતંકવાદી સંગઠન લશ્કર-એ-તૈયબાના 10 આતંકવાદીઓ દ્વારા કરવામાં આવ્યો હતો. આ આતંકવાદીઓમાંથી એક, અજમલ કસાબ, જીવતો પકડાયો હતો અને તેને 2012માં ફાંસી આપવામાં આવી હતી.