સુરતમાં કાકાએ 16 વર્ષની ભત્રીજી પર આચર્યું દુષ્કર્મ, પાંચ માસનો ગર્ભ રહી જતા ભાંડો ફૂટ્યો

અમિત રુપાપરા, સુરતઃ શહેરમાં સંબંધોને શર્મસાર કરતી એક ઘટના સામે આવી છે. જેમાં પારિવારિક કાકાએ જ 16 વર્ષની સગીરા સાથે દુષ્કર્મ આચર્યું છે. તેટલું જ નહીં, સગીરાને પેટનો દુખાવો થતાં તેને પરિવારના સભ્યોને આ બાબતે જણાવ્યું હતું અને પરિવારના સભ્યો સગીરાને હોસ્પિટલ લઈ ગયા હતા. જ્યાં ડોક્ટર દ્વારા તપાસ કરતા સગીરાને પાંચ માસનો ગર્ભ હોવાનું સામે આવ્યું હતું. ત્યારબાદ પરિવારના સભ્યોએ સગીરાની પૂછપરછ કરતા કૌટુંબિક કાકાએ સગીરાને ઘરે બોલાવી દુષ્કર્મ આચર્યું હોવાના કારણે સગીરાને ગર્ભ રહ્યો હોવાનું સામે આવ્યું છે. પરિવારના સભ્યોએ આ મામલે ઈચ્છાપોર પોલીસ સ્ટેશનમાં ફરિયાદ નોંધાવતા પોલીસે સગીરાના કૌટુંબિક કાકાની ધરપકડ કરી વધુ તપાસ હાથ ધરી છે.

સુરતના ઈચ્છાપોર પોલીસ સ્ટેશન હદ વિસ્તારમાં સંબંધોને શર્મસાર કરતો એક કિસ્સો સામે આવ્યો છે. જેમાં પોલીસ સ્ટેશનમાં એક મહિલા દ્વારા કૌટુંબિક દિયર સામે ફરિયાદ નોંધાવવામાં આવી છે. આ ફરિયાદમાં મહિલાએ જણાવ્યું હતું કે, કૌટુંબિક દિયર ભાવેશ દ્વારા મહિલાની દીકરી સાથે દુષ્કર્મ આચરવામાં આવ્યું છે અને સગીરાને પેટનો દુખાવો થતા હોસ્પિટલે લઈ જતા સગીરાને પાંચ માસનો ગર્ભ હોવાનું સામે આવ્યું છે. પોલીસ દ્વારા મહિલાની ફરિયાદ લઈ તાત્કાલિક કૌટુંબિક કાકા ભાવેશ પટેલની ધરપકડ કરવામાં આવી છે. આ ઉપરાંત ભાવેશ પટેલ સામે BNSની કલમ 64 (2) (F), 64 (2) એમ 351 (2) તેમજ પ્રોટેક્શન ઓફ ચિલ્ડ્રન ફ્રોમ સસેક્સ્યુઅલ અફેન્સ એક્ટ 2012ની કલમ 4, 5 (L), 6, 8 અને 18 મુજબનો ગુનો દાખલ કરવામાં આવ્યો છે.

પોલીસે આ ભાવેશની પૂછપરછ કરી ત્યારે પોલીસને જાણવા મળ્યું હતું કે, ભાવેશ સગીરાની એકલતાનો લાભ ઉઠાવીને ઘરે લઈ જતો હતો અને ત્યારબાદ સગીરા સાથે ઘરમાં શરીર સંબંધ બાંધતો હતો. સગીરા સાથે દુષ્કર્મ આચર્યા બાદ ભાવેશ તેને ધમકાવતો હતો અને આ વાત કોઈને ન કહેવાનું જણાવતો હતો. કાકાની ધમકીથી ડરી ગયેલ સગીરા કાકાએ કરેલા કૃત્યોની વાત તેના પરિવારના સભ્યોને કહેતી ન હતી. પરંતુ અવારનવાર ભાવેશ પટેલે સગીરા સાથે દુષ્કર્મ આચર્યું હોવાથી સગીરાને ગર્ભ રહી ગયો હતો અને આ ગર્ભના કારણે સગીરાને પેટમાં દુખાવો થતાં તેને પરિવારના સભ્યોને પેટના દુખાવાની ફરિયાદ કરી હતી.

પરિવારના સભ્યો સગીરાને હોસ્પિટલ લઈ ગયા હતા. ડોક્ટરે પેટના દુખાવાનું કારણ જાણવા સોનોગ્રાફી કરતા સામે આવ્યું હતું કે, સગીરાને પાંચ માસનો ગર્ભ છે અને પરિવારના સભ્યોને આ માહિતી મળતા તેમના પગ તળેથી જમીન ખસી ગઈ હતી. ત્યારબાદ સગીરાને પરિવારના સભ્યોએ વિશ્વાસમાં લઈને માહિતી મેળવતા કૌટુંબિક કાકા ભાવેશ પટેલના કૃત્યનો ભાંડો ફૂટ્યો હતો. અંતે સગીરાની માતાએ પોલીસ સ્ટેશનમાં ફરિયાદ નોંધાવતા પોલીસે ભાવેશની ધરપકડ કરી વધુ તપાસ હાથ ધરી છે.