દિલ્હી હાઈકોર્ટનો મોટો નિર્ણય, પ્રાઈવેટ અને સરકારી હોસ્પિટલોને યૌન અપરાધ પીડિતોને મફત સારવાર આપવાનો આદેશ
Delhi: દિલ્હી હાઈકોર્ટે આજે એક મહત્વપૂર્ણ આદેશ જાહેર કર્યો છે. તેમાં કહેવામાં આવ્યું છે કે રાજ્ય અને ખાનગી હોસ્પિટલોએ જાતીય હિંસા, સામૂહિક બળાત્કાર અને એસિડ હુમલા જેવી ઈમરજન્સી પરિસ્થિતિ હોય તો એવા પીડિતોની સારવારનો ઇનકાર કરવો જોઈએ નહીં. કોર્ટે એમ પણ કહ્યું કે જો કોઈ ડૉક્ટર આવા પીડિતોને સારવાર આપવાનો ઈન્કાર કરશે તો તેની સામે પોલીસ ફરિયાદ દાખલ કરવામાં આવશે, જે સજાપાત્ર ગુનો હશે. આ આદેશ દિલ્હી હાઈકોર્ટના જસ્ટિસ પ્રતિભા એમ. સિંહ અને અમિત શર્માની બેન્ચે આપ્યો હતો.
ન્યાયાધીશે કહ્યું કે બળાત્કાર, ગેંગરેપ, એસિડ એટેક અથવા બાળકો વિરુદ્ધ જાતીય અપરાધો જેવા કોઈપણ જાતીય અપરાધનો ભોગ બનેલી વ્યક્તિએ કોઈપણ ઓળખ પુરાવા વિના હોસ્પિટલમાં સારવાર મેળવવી જોઈએ. કોર્ટે સ્પષ્ટ કર્યું છે કે કોઈપણ તબીબી સુવિધાએ તેમની પાસે ઓળખ કાર્ડ ન હોવાના આધારે સારવારનો ઇનકાર કરવો જોઈએ નહીં. તેમ છતાં જો આમ થશે તો તેમની સામે કાર્યવાહી કરવામાં આવશે.
સારવારમાં કોઈ વિક્ષેપ ન હોવો જોઈએ
હાઈકોર્ટે કહ્યું કે આ આદેશ તે પીડિતો માટે છે જેઓ જાતીય અપરાધો, ગેંગ રેપ, એસિડ એટેક અને બાળકો વિરુદ્ધ જાતીય અપરાધોનો ભોગ બને છે. આ સિવાય કોર્ટે એમ પણ કહ્યું કે પીડિતોની સારવારમાં કોઈ અડચણ ન હોવી જોઈએ અને તેમને તમામ પ્રકારની તબીબી સહાય આપવામાં આવે. તેમાં પ્રાથમિક સારવાર, નિદાન, હોસ્પિટલમાં દાખલ, બહારના દર્દીઓની સહાય, લેબ પરીક્ષણો, સર્જરી, માનસિક અને શારીરિક પરામર્શ અને કુટુંબ પરામર્શ જેવી સેવાઓનો પણ સમાવેશ થાય છે.
આ પણ વાંચો: મહીસાગરમાં SOGને મળી મોટી સફળતા, 6KG ગાંજા સાથે એક ઈસમની કરી ધરપકડ
દિલ્હી હાઈકોર્ટે એ પણ સ્પષ્ટ કર્યું કે આવા પીડિતોને સરકારી અને ખાનગી હોસ્પિટલોમાંથી સારવાર લેવા માટે રાજ્ય અથવા જિલ્લા કાનૂની સેવા સત્તામંડળના રેફરલની જરૂર રહેશે નહીં. આ તબીબી સારવારનો અધિકાર છે અને તે ભારતીય દંડ સંહિતાની કલમ 357C, BNSS ની કલમ 397 અને POCSO નિયમો 2020 હેઠળ વૈધાનિક અધિકાર છે.
વધુમાં, હાઈકોર્ટે નિર્દેશ આપ્યો હતો કે તમામ તબીબી સુવિધાઓમાં એક બોર્ડ મૂકવામાં આવે જેમાં સ્પષ્ટપણે જણાવવામાં આવે કે જાતીય હિંસાનો ભોગ બનેલા લોકોને મફત તબીબી સારવાર ઉપલબ્ધ છે. આ બોર્ડ હોસ્પિટલના પ્રવેશદ્વાર, રિસેપ્શન, કાઉન્ટર અને અન્ય અગ્રણી સ્થાનો પર અંગ્રેજી અને સ્થાનિક બંને ભાષામાં લગાવવામાં આવશે. આ પગલું એ સુનિશ્ચિત કરશે કે પીડિતોને તેમની તબીબી જરૂરિયાતો વિશે કોઈ મૂંઝવણ ન હોય અને તાત્કાલિક મદદ મળી શકે.
