ધુમ્મસથી દિલ્હીની હાલત ખરાબ, અનેક જગ્યાએ AQI 400ને પાર
Delhi: દિવાળીના 6 દિવસ પછી પણ પ્રદૂષણ આપણને ડરાવે છે. દિલ્હીના વાયુ પ્રદૂષણમાં રહેલા ઝેરમાં ઘટાડો થવાના કોઈ સંકેત દેખાઈ રહ્યા નથી. ઓક્ટોબરના છેલ્લા અઠવાડિયાથી દિલ્હી ગેસ ચેમ્બર બની ગયું છે. દિલ્હી અને નોઈડામાં કેટલીક જગ્યાઓનો AQI 400ને પાર કરી ગયો છે. દિલ્હી એનસીઆરમાં સ્થિતિ ખૂબ જ ખરાબ છે. રાજધાની હજુ પણ પ્રદૂષણના મામલામાં ટોપ-3માં છે. બુધવારે સવારે 4:30 વાગ્યે, દિલ્હી ટોપ-10 પ્રદૂષણવાળા શહેરોમાં ત્રીજા સ્થાને હતું. અહીં AQI 362 નોંધાયો હતો. તમામ પ્રદૂષિત શહેરોની યાદીમાં પણ દિલ્હી ત્રીજા સ્થાને છે.
બવાનામાં હવાની ગુણવત્તા અત્યંત ગંભીર સ્થિતિમાં છે. અહીંનો AQI સવારે 6 વાગ્યે 414 નોંધાયો હતો. વજીરપુરમાં પણ સ્થિતિ ખૂબ જ ખરાબ છે. અહીંનો AQI સવારે 421 હતો.
દ્વારકા સેક્ટર 8 પણ પ્રદુષણના કારણે ખરાબ હાલતમાં છે. AQI સવારે 6 વાગ્યે 356 પર પહોંચ્યો હતો. અલીપોરમાં હવાની ગુણવત્તા પણ 372 સાથે ખૂબ જ નબળી નોંધવામાં આવી છે. દિલ્હીના જહાંગીરપુરીમાં હવાની ગુણવત્તા 397 નોંધવામાં આવી હતી. જ્યારે વિવેક વિહારમાં તે 383 ના અત્યંત ખરાબ સ્તરે રહી હતી. સવારે 5.30 વાગ્યે, દિલ્હીના NSIT દ્વારકામાં હવાની ગુણવત્તા 400 થી ઉપર એટલે કે 453 નોંધવામાં આવી હતી. જે ગંભીર શ્રેણીમાં ગણવામાં આવે છે.
દિલ્હીની હવામાં ધુમ્મસ, ક્યારે સુધરશે સ્થિતિ?
દિલ્હીમાં ગુલાબી શિયાળાએ દસ્તક આપી છે. પાટનગરનું વાતાવરણ સવાર-સાંજ ઠંડી પડવા લાગ્યું છે, તો બીજી તરફ પ્રદુષણ પણ પરેશાન કરી રહ્યું છે. હવા એટલી ખરાબ થઈ ગઈ છે કે શ્વાસ લેવામાં તકલીફ થઈ રહી છે. વૃદ્ધો, બાળકો અને બીમાર લોકો માટે સ્થિતિ ચિંતાજનક છે. એટલા માટે ઘરની બહાર નીકળતા પહેલા માસ્કનો ઉપયોગ કરવો જરૂરી છે.
આ પણ વાંચો: ટ્રમ્પ 17 રાજ્યોમાં તો હેરિસ 9 રાજ્યોમાં આગળ, જાણો કોણ કઈ બેઠક પર જીત તરફ?
દિલ્હીનો AQI ખૂબ જ ખરાબ
દિલ્હીનો 24-કલાકનો સરેરાશ હવા ગુણવત્તા સૂચકાંક (જે દરરોજ સાંજે 4 વાગ્યે નોંધવામાં આવે છે) મંગળવારે 373 હતો, સોમવારે 381 અને રવિવારે શહેરના આઠ સ્ટેશનો પર વાયુ પ્રદૂષણનું સ્તર ‘ગંભીર’ શ્રેણી 400 પર પહોંચી ગયું હતું.
ઓક્ટોબરમાં પ્રદૂષણની યાદીમાં દિલ્હી ટોપ-10માં છે
ઑક્ટોબર મહિનામાં દિલ્હી ભારતનું સૌથી પ્રદૂષિત શહેર હતું અને રાષ્ટ્રીય રાજધાનીની હવામાં ‘PM 2.5’ નું સરેરાશ સ્તર 111 માઇક્રોગ્રામ પ્રતિ ઘન મીટર હતું, એક નવા વિશ્લેષણમાં બહાર આવ્યું છે. ઇન્ડિપેન્ડન્ટ થિંક ટેન્ક સેન્ટર ફોર રિસર્ચ ઓન એનર્જી એન્ડ ક્લીન એર (CREA) દ્વારા વિશ્લેષણ દર્શાવે છે કે ઓક્ટોબરમાં ભારતના તમામ ટોચના 10 પ્રદૂષિત શહેરો નેશનલ કેપિટલ રિજન (NCR)માં સ્થિત હતા.
