પૂર્વાયોજિત હતી બાબા સિદ્દિકીની હત્યા, બે મહિનાથી આરોપીઓ કરી રહ્યા હતા રેકી

Baba Siddique: NCP નેતા અને મહારાષ્ટ્રના પૂર્વ મંત્રી બાબા સિદ્દીકીની હત્યાને લઈને પોલીસને શંકા છે કે આઆ હત્યાનું ષડયંત્ર પૂર્વ આયોજિત હતું. વાસ્તવમાં, પોલીસ તપાસમાં સામે આવ્યું છે કે ધરપકડ કરાયેલા આરોપીઓ છેલ્લા દોઢ-બે મહિનાથી કુર્લા વિસ્તારમાં ભાડે રહીને બાબા સિદ્દીકીની રેકી કરી રહ્યા હતા. પોલીસે ત્રીજા આરોપીની ઓળખ કરી લીધી છે અને તે પણ ઉત્તર પ્રદેશનો રહેવાસી છે. અગાઉ પોલીસે પકડેલા બે આરોપીઓમાંથી એક હરિયાણાનો અને બીજો યુપીનો રહેવાસી છે. અન્ય આરોપીઓને શોધી કાઢવા માટે પોલીસ ઠેર ઠેર દરોડા પાડી રહી છે.

આ એંગલથી પોલીસે શરૂ કરી તપાસ
પોલીસે કહ્યું કે તેઓ બાબા સિદ્દીકીની હત્યાના સંભવિત કારણોની તપાસ કરી રહ્યા છે. પોલીસ બાબા સિદ્દીકીની હત્યામાં સોપારી, ધંધાકીય અદાવત કે જમીન વિવાદના એંગલથી તપાસ કરી રહી છે. પોલીસના જણાવ્યા અનુસાર, ધરપકડ કરાયેલા આરોપીઓની ઓળખ હરિયાણાના રહેવાસી ગુરમેલ બલજીત સિંહ (23) અને ઉત્તર પ્રદેશના રહેવાસી ધર્મરાજ રાજેશ કશ્યપ (19) તરીકે થઈ છે. પોલીસ તપાસમાં બહાર આવ્યું છે કે આરોપીઓએ હત્યા માટે 50,000 રૂપિયા એડવાન્સ મેળવ્યા હતા અને તાજેતરમાં જ તેમને હથિયારો પૂરા પાડવામાં આવ્યા હતા. ત્રણેય આરોપીઓ વિરુદ્ધ સંબંધિત ભારતીય ન્યાય સંહિતા (BNS) કલમો હેઠળ કેસ નોંધવામાં આવ્યો છે, જેમાં હત્યા, તેમજ આર્મ્સ એક્ટ અને મહારાષ્ટ્ર પોલીસ એક્ટની જોગવાઈઓ સામેલ છે.

પૂછપરછમાં આરોપીઓનો ખુલાસો 

આરોપીઓએ પૂછપરછ દરમિયાન ક્રાઈમ બ્રાન્ચને જણાવ્યું કે તેઓ પંજાબની જેલમાં કેદ હતા, જ્યારે તેઓ બિશ્નોઈ ગેંગના એક સભ્યને મળ્યા હતા. આ ચાર આરોપીઓમાંથી ત્રણ આરોપી પંજાબની જેલમાં એકસાથે કેદ હતા. ત્યાં શૂટરોની ઓળખ પહેલાથી જ જેલમાં બંધ બિશ્નોઈ ગેંગના સભ્યોમાંથી થઈ હતી. જેના કારણે ત્રણેય આરોપીઓ બિશ્નોઈ ગેંગમાં જોડાયા હતા. આ પછી આરોપીઓને બાબા સિદ્દીકીની હત્યા કરવા માટે 2.5 લાખ રૂપિયાની સોપારી મળી હતી.

મકાન 14 હજાર રૂપિયામાં ભાડે લીધું હતું
હત્યા બાદ શૂટર્સ 50,000 રૂપિયાની વહેંચણી કરવા જઈ રહ્યા હતા, પરંતુ મુંબઈ પોલીસે તેઓને પહેલા જ પકડી લીધા હતા. પૂછપરછ દરમિયાન શૂટરોએ એ પણ જણાવ્યું કે એક મહિના પહેલા (2 સપ્ટેમ્બરે) શૂટરોએ મુંબઈના કુર્લા વિસ્તારમાં ભાડેથી એક ઘર લીધું હતું. આ માટે દર મહિને 14 હજાર રૂપિયા ભાડું ચૂકવવામાં આવતું હતું.

સલમાન ખાન ફાયરિંગ કેસમાં પણ આવો જ પ્લાન હતો
ક્રાઈમ બ્રાન્ચના સૂત્રોએ જણાવ્યું હતું કે બોલિવૂડ અભિનેતા સલમાન ખાન ફાયરિંગ કેસમાં ધરપકડ કરાયેલા આરોપીઓ પણ આવી જ રીતે ભાડાના મકાનમાં રહીને રેકી કરતા હતા અને પછી ફાયરિંગની ઘટનાને અંજામ આપ્યો હતો. હવે આ કેસની તપાસને આગળ ધપાવીને ક્રાઈમ બ્રાન્ચની અલગ-અલગ ટીમો ઉજ્જૈન (મધ્યપ્રદેશ), દિલ્હી અને હરિયાણા જવા રવાના થઈ ગઈ છે.

આ પણ વાંચો: મહારાષ્ટ્રમાં કાયદો અને વ્યવસ્થા સંપૂર્ણપણે નિષ્ફળ… બાબા સિદ્દીકીની હત્યા પર રાહુલ ગાંધીની પ્રતિક્રિયા

બાબા સિદ્દીકીના ઘરે પૂછપરછ ચાલી રહી છે
બાબા સિદ્દીકી હત્યા કેસમાં મુંબઈ પોલીસના અધિકારીઓ સિદ્દીકી પરિવારના ઘરે તેમનું નિવેદન નોંધવા ગયા હતા. અહીં ચોકીદાર અને સોસાયટીમાં કામ કરતા લોકોની પણ પૂછપરછ કરવામાં આવી રહી છે.

19 અને 23 વર્ષના શૂટર્સ
બાબા સિદ્દીકી હત્યા કેસમાં મુંબઈ પોલીસે નોંધેલી એફઆઈઆરમાં ધરપકડ કરાયેલા બે આરોપીઓના નામનો ઉલ્લેખ છે. 23 વર્ષનો ગુરમેલ બલજીત સિંહ હરિયાણાનો રહેવાસી છે. જ્યારે ઉત્તર પ્રદેશના ધરમરાજ રાજેશ કશ્યપ છે જે માત્ર 19 વર્ષના છે. BNSની કલમ 103 (1), 109, 125 અને 3 (5) હેઠળ FIR દાખલ કરવામાં આવી છે. આ સિવાય આર્મ્સ એક્ટની કલમ 3, 25, 5 અને 27 અને મહારાષ્ટ્ર પોલીસ એક્ટની કલમ 37 અને 137 હેઠળ કેસ નોંધવામાં આવ્યો છે.